Ahmedabad News: ગુજરાતમાં ધર્મપરિવર્તનનો મુદ્દો ફરી એકવાર ચર્ચામાં (Religious Conversion Gujarat) આવ્યો છે. અમદાવાદમાં ચાલુ વર્ષના છેલ્લા 10 મહિનામાં ધર્મપરિવર્તન માટે અંદાજે 120 અરજીઓ કરવામાં આવી છે. એટલે કે, દર મહિને સરેરાશ 12 લોકો ધર્મપરિવર્તન માટે અરજી કરી રહ્યા છે. આ અરજીઓમાંથી આશરે 95 ટકા લોકોએ બૌદ્ધ ધર્મ અપનાવવા (Buddhist Conversion) માટે અરજી કરી હોવાનું જાણવા મળ્યું છે. બાકીના 5 ટકા લોકોએ અન્ય ધર્મોમાં પરિવર્તન માટે અરજી કરી હતી.
એક તરફ વ્યક્તિગત શ્રદ્ધા, માન્યતા અને સામાજિક કારણોસર સ્વેચ્છાએ ધર્મ બદલવાની પ્રક્રિયા ચાલી રહી છે, તો બીજી તરફ લાલચ, દબાણ કે છેતરપિંડીથી ધર્મપરિવર્તન કરાવવાના આક્ષેપો પણ સામે આવી રહ્યા છે. સગીરોને લલચાવીને અન્ય સ્થળે લઈ જવા અને ધર્મપરિવર્તન કરાવવાના પ્રયાસોના બનાવોને કારણે આ મુદ્દો વધુ ચર્ચાસ્પદ બન્યો છે.
Religious Conversion Gujarat: અઢી વર્ષમાં 545 અરજીઓ, 60 ટકા અરજદારો શહેરી વિસ્તારના
અમદાવાદમાં ચાલુ વર્ષના પ્રથમ 10 મહિનામાં ધર્મપરિવર્તન માટે 120 જેટલી અરજીઓ મળી છે. જ્યારે છેલ્લા અઢી વર્ષનો આંકડો જોવામાં આવે તો કુલ 545 અરજીઓ કરવામાં આવી હતી. ધર્મપરિવર્તન માટે અરજી કરનારા લોકોમાંથી આશરે 60 ટકા શહેરી વિસ્તારના હોવાનું જણાવાયું છે.
પૂર્વ અમદાવાદના અમરાઈવાડી સહિતના વિસ્તારોમાંથી પ્રમાણમાં વધુ અરજીઓ મળી હોવાનું સામે આવ્યું છે. આ ઉપરાંત ધોળકા, સાણંદ અને વિરમગામ જેવા ગ્રામ્ય વિસ્તારોમાંથી પણ અરજીઓ કરવામાં આવી હતી. લગ્ન, વ્યક્તિગત માન્યતાઓ અને સામાજિક પરિબળો ધર્મપરિવર્તન પાછળનાં મુખ્ય કારણો હોવાનું જણાવાયું છે.
ધર્મપરિવર્તન માટે ગુજરાતમાં કાયદાકીય જોગવાઈ
ગુજરાતમાં ગુજરાત ધર્મ સ્વાતંત્ર્ય અધિનિયમ, 2003 અમલમાં (Gujarat Freedom of Religion Act) છે. વર્ષ 2021માં આ કાયદામાં સુધારો કરવામાં આવ્યો હતો. જેમાં બળજબરી, લાલચ, કપટપૂર્ણ રીતો તેમજ લગ્નના માધ્યમથી કરાતા ગેરકાયદે ધર્મપરિવર્તન સામે કડક જોગવાઈઓ કરવામાં આવી હતી. આવા કિસ્સાઓમાં કાયદા મુજબ કાર્યવાહી અને સંબંધિત અધિકારી સમક્ષ જરૂરી પ્રક્રિયા મહત્ત્વપૂર્ણ છે.
બીજી તરફ, ભારતીય બંધારણની કલમ 25 દરેક નાગરિકને અંતરાત્માની સ્વતંત્રતા તેમજ પોતાનો ધર્મ માનવા, પાળવા અને તેનો પ્રચાર કરવાનો અધિકાર આપે છે. જોકે, આ અધિકારનો ઉપયોગ કાયદાની જોગવાઈઓને આધીન રહીને કરવાનો હોય છે.
કાયદાકીય પ્રક્રિયા હેઠળ અરજીઓમાં વધારો
ધર્મપરિવર્તન માટેની કાયદાકીય પ્રક્રિયા હેઠળ સંબંધિત અધિકારી સમક્ષ અરજી અને જરૂરી વિગતો રજૂ કરવાની જોગવાઈ છે. ત્યારબાદ પોલીસ વેરિફિકેશન અને જરૂરી તપાસ સહિતની પ્રક્રિયા હાથ ધરવામાં આવે છે. આ પ્રક્રિયાને કારણે સ્વેચ્છાએ ધર્મ બદલવા ઇચ્છતા લોકો દ્વારા પણ હવે વિધિવત રીતે અરજી કરવામાં આવતી હોવાનું સામે આવ્યું (Gujarat News) છે.
આમ, અમદાવાદમાં છેલ્લા અઢી વર્ષમાં ધર્મપરિવર્તન માટે 545 અરજીઓ અને ચાલુ વર્ષના 10 મહિનામાં 120 અરજીઓ નોંધાવાના આંકડાએ રાજ્યમાં ધર્મપરિવર્તનના મુદ્દાને ફરી ચર્ચામાં લાવ્યો છે.
આ પણ વાંચો: જૂનાગઢમાં યુવતી સાથે દુષ્કર્મ અને ધર્મપરિવર્તનના આક્ષેપ! પીડિતાના ઘરેથી બુરખો, કલમાની બુક સહિતની વસ્તુઓ મળી
આ પણ વાંચો: બનાસકાંઠામાં તાંત્રિકવિધિના બહાને ધર્મપરિવર્તનનો આક્ષેપ, 4 સામે ફરિયાદ; એક આરોપીની અટકાયત
આ પણ વાંચો: એરફોર્સ કર્મચારીની પત્નીનો ક્લાસમેટ પર બળાત્કાર, બ્લેકમેઇલ અને બળજબરીથી ધર્મપરિવર્તનનો આરોપ
