Ahmedabad Weather Update: ખાણીપીણી અને મોજમસ્તી માટે જાણીતા અમદાવાદ શહેરમાં આજે વહેલી સવારથી જ કુદરતે રૌદ્ર મિજાજ બતાવ્યો છે. વહેલી સવારથી જ આખા શહેરમાં ફૂંકાયેલા અતિ તેજ પવનને કારણે ‘મિની વાવાઝોડા’ જેવી સ્થિતિ સર્જાઈ છે. પવનની ગતિ એટલી તીવ્ર હતી કે અનેક વિસ્તારોમાં ઝાડ ધરાશાયી થવાની સાથે વાહનચાલકોને ધૂળની ડમરીઓનો સામનો કરવો પડ્યો હતો.
ધૂળની ડમરીઓથી અંધારપટ જેવો માહોલ
શહેરના ઉજાલા સર્કલ અને એસ.પી. રિંગ રોડના પટ્ટામાં પવનની ગતિ સૌથી વધુ જોવા મળી હતી. અહીં રસ્તા પર રેતી અને ધૂળની ડમરીઓ એટલી મોટી માત્રામાં ઉડી હતી કે વાહનચાલકો માટે વિઝિબિલિટી ઓછી થઈ ગઈ હતી. સવારના સમયે નોકરી-ધંધાર્થે નીકળેલા લોકોએ ધૂળિયો વાતાવરણને કારણે ભારે હાલાકી ભોગવી હતી.
Ahmedabad : દાણીલીમડા અને યુનિવર્સીટી વિસ્તારમાં નુકસાન
ભારે પવનના કારણે શહેરના મધ્ય અને પશ્ચિમ વિસ્તારોમાં ઝાડ પડવાની અનેક ઘટનાઓ સામે આવી છે. ખાસ કરીને દાણીલીમડા વિસ્તારમાં રસ્તા પર એક મોટું ઝાડ ધરાશાયી થતા ભારે ટ્રાફિક જામની સ્થિતિ સર્જાઈ હતી. આ ઉપરાંત, ગુજરાત યુનિવર્સીટી કેમ્પસ અને તેની આસપાસના રસ્તાઓ પર પણ ઝાડની ડાળીઓ તૂટી પડવાના બનાવો બન્યા છે. શહેરમાં અન્ય અનેક જગ્યાએ પાર્ક કરેલા વાહનો પર ઝાડ પડવાને કારણે માલસામાનને પણ નુકસાન થયું હોવાના અહેવાલો છે.
તાપમાનમાં ઘટાડો, પણ પવનનો ફફડાટ
ગઈકાલ સુધી ઉનાળાની ગરમીનો અનુભવ કરી રહેલા અમદાવાદીઓને આજે અચાનક ઠંડા પવનના સૂસવાટાથી રાહત તો મળી છે, પરંતુ પવનની ગતિએ લોકોમાં ડર પેદા કર્યો છે. હવામાન વિભાગના મતે વેસ્ટર્ન ડિસ્ટર્બન્સને કારણે આ પલટો આવ્યો છે, જેની અસર આગામી 24 કલાક સુધી જોવા મળી શકે છે.
આ પણ વાંચો: Gujarat Rain Alert: આજે ગુજરાતનાં 9 જિલ્લાઓમાં પડશે મુશળધાર વરસાદ, બે દિવસ બાદ ભૂકકા બોલાવશે!
આ પણ વાંચો: આગામી ત્રણ દિવસ ભૂકા બોલાવશે મેઘરાજા, જાણો કયા વિસ્તારમાં કેવો રહેશે વરસાદ
આ પણ વાંચો: અમરેલી જીલ્લામા મોડી રાત્રે વરસાદ , લોકોને બફારામાંથી મળી રાહત
