Air India Phuket Delhi Flight Technical Glitch and Pilot Drug Test News: ફુકેટથી દિલ્હી આવી રહેલી એર ઈન્ડિયાની ફ્લાઇટ AI2379 અંગે હવે એક મહત્વપૂર્ણ માહિતી સામે આવી છે. અગાઉ વિમાનની ઊંચાઈમાં અચાનક ઘટાડો થવાનું કારણ ટર્બ્યુલન્સ હોવાનું જણાવાયું હતું, પરંતુ કોકપિટમાં નોંધાયેલા મેઇન્ટેનન્સ રિપોર્ટમાં વિમાનની હાઇડ્રોલિક સિસ્ટમ સહિત કેટલીક ટેકનિકલ ચેતવણીઓ નોંધાઈ હોવાનું સામે આવ્યું છે.
ફ્લાઇટમાં અચાનક 300 ફૂટનો ઘટાડો
4 ઓગસ્ટે ફુકેટથી દિલ્હી આવી રહેલી Airbus A320 NEO ફ્લાઇટમાં ઉડાન દરમિયાન અચાનક ઊંચાઈમાં મોટો ફેરફાર થયો હતો. અહેવાલ મુજબ વિમાન લગભગ 300 ફૂટ નીચે ગયું હતું. ઘટનામાં કેટલાક મુસાફરો અને ક્રૂ મેમ્બર્સને ઈજાઓ થઈ હતી. ફ્લાઇટ સવારે 11:07 વાગ્યે દિલ્હી એરપોર્ટ પર સુરક્ષિત રીતે લેન્ડ થઈ હતી. રિપોર્ટ અનુસાર, સવારે લગભગ 9:32 વાગ્યે વિમાનની ત્રણેય હાઇડ્રોલિક સિસ્ટમમાં લો પ્રેશરની ચેતવણી જોવા મળી હતી. સાથે જ બે રિઝર્વોયરમાં પ્રવાહીનું સ્તર ઓછું હોવાની ચેતવણી પણ નોંધાઈ હતી. જોકે, આવી ચેતવણીનો અર્થ સિસ્ટમ સંપૂર્ણપણે નિષ્ફળ થઈ ગઈ એવો સીધો અર્થ થતો નથી.
ઓટોપાયલટ પણ ડિસ્કનેક્ટ થયું
આ જ સમયગાળા દરમિયાન ઓટોપાયલટ ડિસ્કનેક્ટ થયું હતું અને વિમાનના એલિવેટર કન્ટ્રોલ સાથે જોડાયેલી ખામીના સંકેતો પણ મળ્યા હતા. ત્યારબાદ કોકપિટમાં ઇમરજન્સી એક્ઝિટના દરવાજા અંગે ચેતવણીઓ અને એન્જિનની એન્ટી-આઇસ સિસ્ટમ સંબંધિત ખામીના સંકેતો પણ નોંધાયા હોવાનું રિપોર્ટમાં જણાવાયું છે.
Air Indiaના નિવેદનમાં શું જણાવાયું?
એર ઈન્ડિયાએ(Air India) શરૂઆતમાં ઘટનાને ટર્બ્યુલન્સ દરમિયાન ઊંચાઈમાં અચાનક થયેલા ફેરફાર સાથે જોડીને માહિતી આપી હતી. બાદમાં અપડેટ કરાયેલા નિવેદનમાં ‘ટર્બ્યુલન્સ’ શબ્દનો ઉલ્લેખ કરવામાં આવ્યો નહોતો. એરલાઇન તરફથી વિમાનમાં ગંભીર ટેકનિકલ સમસ્યા હોવાની કોઈ સત્તાવાર પુષ્ટિ કરવામાં આવી નથી.
પાયલટના ડોપ ટેસ્ટ અંગે પણ ચર્ચા
આ ઘટનાની તપાસ દરમિયાન ફ્લાઇટના પાયલટના ડોપ ટેસ્ટ અંગે પણ અહેવાલો સામે આવ્યા છે. મીડિયા રિપોર્ટ્સમાં દાવો કરવામાં આવ્યો છે કે પ્રથમ ટેસ્ટ બાદ કરવામાં આવેલા કન્ફર્મેટરી ટેસ્ટમાં પણ સાયકોએક્ટિવ પદાર્થ માટે પરિણામ પોઝિટિવ આવ્યું હતું અને તેમાં મારિજુઆના એટલે કે ગાંજાના સેવનનો સંકેત મળ્યો હતો.
તપાસ પૂર્ણ ન થાય ત્યાં સુધી બંને પાયલટ ડ્યુટીથી દૂર
રિપોર્ટ મુજબ, ફ્લાઇટ દરમિયાન કો-પાયલટ એર ઈન્ડિયા (Air India) વિમાન ઉડાવી રહ્યા હતા. અચાનક ઊંચાઈ ઘટતાં કોકપિટમાં રહેલી કેટલીક વસ્તુઓ પણ ઉછળી ગઈ હતી. સીટ બેલ્ટ ન પહેરેલા કેટલાક મુસાફરોને ઈજાઓ થઈ હતી. સમગ્ર ઘટનાની તપાસ ચાલી રહી હોવાથી બંને પાયલટોને તપાસ પૂર્ણ થાય ત્યાં સુધી ડ્યુટી પરથી દૂર રાખવામાં આવ્યા છે.
પાયલટના ડોપ ટેસ્ટ અને વિમાનની(Air India) ટેકનિકલ ખામીઓ અંગેના કેટલાક દાવા મીડિયા રિપોર્ટ્સ અને સૂત્રો પર આધારિત છે. સત્તાવાર તપાસ પૂર્ણ થયા બાદ જ ઘટનાનું ચોક્કસ કારણ સ્પષ્ટ થશે.
આ પણ વાચો:એર ઈન્ડિયા ફ્લાઇટમાં અચાનક ઝટકો, 17 મુસાફરો ઘાયલ; ગાંજા પીને પાયલોટ વિમાન ઉડાડી રહ્યો હતો
આ પણ વાચો:ચેન્નાઈ જઈ રહેલી ઈન્ડિગો ફ્લાઈટનું એન્જિન ફેલ, 224 મુસાફરો સાથે ઈમરજન્સી લેન્ડિંગ
આ પણ વાચો:અમદાવાદથી રાંચી જતી ઇન્ડિગો ફ્લાઈટમાં યુવકનું મોત, જબલપુરમાં કરાવવું પડ્યું ઈમરજન્સી લેન્ડિંગ
