માલદીવમાંથી ભારતીય સૈન્ય પાછા ખેંચવાને લઈને બંને દેશો વચ્ચે શુક્રવારે દિલ્હીમાં બીજા તબક્કાની વાતચીત થઈ. વાતચીત બાદ સંયુક્ત નિવેદન જારી કરવામાં આવ્યું છે. આ મુજબ, બંને પક્ષો સંમત થયા છે કે માલદીવના લોકોને માનવતાવાદી સહાય અને તબીબી બચાવ સેવાઓ પ્રદાન કરતું ભારતીય ઉડ્ડયન પ્લેટફોર્મ કાર્યરત રહેવું જોઈએ. જોકે, નિવેદનમાં એ સ્પષ્ટ નથી થયું કે માલદીવમાંથી ભારતીય સૈનિકો પાછા ખેંચવા અંગે કોઈ નિર્ણય લેવામાં આવ્યો છે કે નહીં. ભારતીય વિદેશ મંત્રાલયના જણાવ્યા અનુસાર હવે ઉચ્ચ સ્તરીય કોર ગ્રુપની આગામી બેઠક માલેમાં યોજાશે. તેની તારીખ બંને પક્ષોની સંમતિથી નક્કી કરવામાં આવશે.
નોંધનીય છે કે ડિસેમ્બરમાં વડાપ્રધાન નરેન્દ્ર મોદી અને માલદીવના રાષ્ટ્રપતિ મોહમ્મદ મુઈઝુ વચ્ચે દુબઈમાં COP28 સમિટ દરમિયાન બેઠક બાદ બંને પક્ષોએ કોર ગ્રુપ બનાવવાનો નિર્ણય લીધો હતો. ગયા મહિને માલદીવના રાષ્ટ્રપતિ મુઈઝુએ ભારતને 15 માર્ચ સુધીમાં દેશમાંથી પોતાના સૈન્ય જવાનોને પાછા ખેંચવા કહ્યું હતું. હાલમાં, લગભગ 80 ભારતીય સૈન્ય કર્મચારીઓ માલદીવમાં છે, મુખ્યત્વે બે હેલિકોપ્ટર અને એક વિમાન ચલાવવા માટે. આના દ્વારા સેંકડો તબીબી બચાવ અને માનવતાવાદી સહાય મિશન પૂર્ણ થયા છે.
ગયા વર્ષે નવેમ્બરમાં મુઇઝુ સત્તામાં આવ્યા બાદ બંને દેશો વચ્ચેના સંબંધોમાં તણાવ આવ્યો હતો. પદ સંભાળ્યા પછી, ચીન તરફી નેતા ગણાતા મુઇઝુ કહેતા રહ્યા છે કે તેઓ ભારતીય સૈન્ય કર્મચારીઓને દેશમાંથી હાંકી કાઢીને તેમનું ચૂંટણી વચન પૂરું કરશે. મુઈઝુ (45)એ ગયા વર્ષે સપ્ટેમ્બરમાં યોજાયેલી રાષ્ટ્રપતિની ચૂંટણીમાં ભારત તરફી ઉમેદવાર ઈબ્રાહિમ મોહમ્મદ સોલિહને હરાવ્યા હતા. માલદીવ હિંદ મહાસાગર ક્ષેત્રમાં ભારતનો મુખ્ય દરિયાઈ પડોશી દેશ છે અને અગાઉની (માલદીવ) સરકાર હેઠળ સંરક્ષણ અને સુરક્ષાના ક્ષેત્રોમાં એકંદરે દ્વિપક્ષીય સંબંધોમાં પ્રગતિ થઈ હતી.
