આમ આદમી પાર્ટીના કન્વીનર અને દિલ્હીના મુખ્યમંત્રી અરવિંદ કેજરીવાલે એન્ફોર્સમેન્ટ ડિરેક્ટોરેટ (ED)ના દરોડાને લઈને હવે મુખ્યમંત્રી ચરણજીત સિંહ ચન્ની પર સીધો પ્રહાર કર્યો છે. AAP કન્વીનરે કહ્યું છે કે મુખ્યમંત્રી ચન્ની તેમની ચમકૌર સાહિબ બેઠક પરથી ચૂંટણી હારી જશે. EDના દરોડામાં ચન્નીના ભત્રીજાના ઘરેથી કરોડો રૂપિયા મળ્યા બાદ પંજાબના લોકો ચોંકી ગયા છે.
આ પહેલા અરવિંદ કેજરીવાલે ઈડીના દરોડા માટે મુખ્યમંત્રીને ‘બેઈમાન માણસ’ કહ્યા હતા. આ અંગે AAP અને કોંગ્રેસના નેતાઓ વચ્ચે રાજકીય ખેંચતાણ ચાલી રહી છે. અરવિંદ કેજરીવાલે શુક્રવારે ટ્વિટ કરીને મુખ્યમંત્રી ચન્ની પર ફરી પ્રહાર કર્યા છે. તેમણે કહ્યું કે, આમ આદમી પાર્ટીના સર્વે અનુસાર મુખ્યમંત્રી ચરણજીત સિંહ ચન્ની આગામી મહિને યોજાનારી વિધાનસભા ચૂંટણીમાં તેમની ચમકૌર સાહિબ બેઠક પરથી હારી જશે. પંજાબના લોકો EDના અધિકારીઓને નોટોના બંડલ ગણતા જોઈને આશ્ચર્યચકિત થઈ ગયા છે.
EDએ ચન્નીના ભત્રીજા સહિત અનેક સ્થળોએ દરોડા પાડ્યા બાદ આમ આદમી પાર્ટી ચન્નીને નિશાન બનાવી રહી છે. આ પહેલા બુધવારે કેજરીવાલે કહ્યું હતું કે ચન્ની સામાન્ય માણસ નથી પરંતુ “બેઈમાન માણસ” છે. AAP સંયોજક સતત તેમની ટિપ્પણી દ્વારા ચન્નીની સામાન્ય વ્યક્તિની છબીને નિશાન બનાવવાનો પ્રયાસ કરી રહ્યા છે.
અરવિંદ કેજરીવાલ બાદ SAD નેતા અને પૂર્વ મંત્રી બિક્રમ સિંહ મજીઠિયાએ મુખ્યમંત્રી ચરણજીત ચન્ની વિરુદ્ધ મોરચો ખોલ્યો છે. મજીઠિયાએ ચેતવણી આપી છે કે તેઓ શનિવારે સીએમ ચન્નીના કરોડો રૂપિયાના કૌભાંડનો પર્દાફાશ કરશે. હાલમાં જ ચન્ની સરકાર દ્વારા મજીઠિયા સામે ડ્રગ્સના કેસમાં કેસ નોંધવામાં આવ્યો છે. જો કે તેને પંજાબ અને હરિયાણા હાઈકોર્ટમાંથી વચગાળાના જામીન મળી ગયા છે.
