National News : દેશના લાખો ગ્રામ્ય નાગરિકોને હાઈ-સ્પીડ ઇન્ટરનેટ (Internet) સાથે જોડવાના કેન્દ્ર સરકારના મહત્ત્વાકાંક્ષી ભારતનેટ ફેઝ-3 (BharatNet Phase 3)પ્રોજેક્ટ સામે નવા પડકારો ઊભા થયા છે. ઓપ્ટિકલ ફાઇબર કેબલ અને નેટવર્ક રાઉટર્સના ભાવમાં થયેલા ભારે વધારાને કારણે પ્રોજેક્ટની ગતિ ધીમી પડવાની આશંકા વ્યક્ત કરવામાં આવી રહી છે.
મળતી માહિતી મુજબ, પશ્ચિમ એશિયામાં ચાલી રહેલા ભૂરાજકીય તણાવ અને કાચા માલની અછતના કારણે ઓપ્ટિકલ ફાઇબર કેબલ, IP-MPLS રાઉટર્સ અને અન્ય નેટવર્ક સાધનોના ભાવમાં નોંધપાત્ર વધારો થયો છે. કેટલીક વસ્તુઓના ભાવ તો લગભગ બમણા થઈ ગયા હોવાનું કહેવાય છે.
કેન્દ્ર સરકાર દ્વારા મંજૂર કરાયેલ ભારતનેટ ફેઝ-3 (BharatNet Phase 3)યોજનાનો મુખ્ય હેતુ દેશના 6 લાખથી વધુ ગામડાઓ સુધી બ્રોડબેન્ડ ઇન્ટરનેટ (Internet) સેવા પહોંચાડવાનો છે. આ પ્રોજેક્ટના અમલીકરણમાં BSNL અને BBNL મહત્વની ભૂમિકા ભજવી રહ્યા છે.
વધતી કિંમતોના કારણે પોલીકેબ અને STL જેવી કંપનીઓએ સરકાર સમક્ષ ‘ફોર્સ મેજ્યોર’ હેઠળ રાહતની માંગ કરી છે. કંપનીઓનું કહેવું છે કે અગાઉ નક્કી કરાયેલા દરે કામ કરવું હવે આર્થિક રીતે શક્ય નથી. જો કરારની શરતોમાં રાહત નહીં મળે તો પ્રોજેક્ટના કામકાજ અને ખરીદી પ્રક્રિયા પર ગંભીર અસર પડી શકે છે.
ટેલિકોમ ક્ષેત્રના નિષ્ણાતોનું માનવું છે કે કાચા માલની સપ્લાય ચેઇનમાં આવેલા વિક્ષેપો અને વૈશ્વિક બજારમાં વધતી માંગને કારણે ખર્ચમાં ભારે વધારો થયો છે. ખાસ કરીને સિલિકા પ્રીફોર્મ, FRP અને એરામિડ યાર્ન જેવા કાચા માલના ભાવમાં થયેલા વધારાએ ઉત્પાદન ખર્ચ વધારી દીધો છે.
જો આ સમસ્યાનો સમયસર ઉકેલ નહીં આવે તો દેશના ગ્રામ્ય વિસ્તારોમાં ડિજિટલ કનેક્ટિવિટી મજબૂત બનાવવાના સરકારના લક્ષ્યને અસર પહોંચી શકે છે.
