Bangladesh News: બાંગ્લાદેશની જાણીતી જ્વેલરી ચેઇન ડાયમંડ વર્લ્ડના મેનેજિંગ ડિરેક્ટર દિલીપ કુમાર અગ્રવાલ(Dilip Agrawal)ની મની લોન્ડરિંગ કેસમાં ધરપકડ કરવામાં આવી છે. ઢાકા મેટ્રોપોલિટન પોલીસની ડિટેક્ટિવ બ્રાન્ચે 19 ઑક્ટોબર 2026ના રોજ ઢાકાના બનાની વિસ્તારમાંથી તેમની ધરપકડ કરી હતી.

આ કેસમાં સોનાની અને હીરાની કથિત દાણચોરી દ્વારા આશરે 678.19 કરોડ બાંગ્લાદેશી ટાકાના મની લોન્ડરિંગ(Money Laundering)નો આરોપ છે. 20 ઑક્ટોબરે અદાલતે તેમને એક દિવસના પોલીસ રિમાન્ડ પર મોકલવાનો આદેશ આપ્યો હતો.

ઢાકાના બનાની વિસ્તારમાંથી Dilip Agrawalની ધરપકડ

બાંગ્લાદેશી અહેવાલો અનુસાર, ઢાકા મેટ્રોપોલિટન પોલીસ(Dhaka Metropolitan Police)ની ડિટેક્ટિવ બ્રાન્ચે દિલીપ અગ્રવાલની 19 ઑક્ટોબરે ધરપકડ કરી હતી. પોલીસના જણાવ્યા પ્રમાણે, આ કાર્યવાહી મની લોન્ડરિંગના કેસમાં ક્રિમિનલ ઇન્વેસ્ટિગેશન ડિપાર્ટમેન્ટ (CID)ની વિનંતી પર કરવામાં આવી હતી.

આ કેસમાં સોનાની અને હીરાની ખરીદીના સ્ત્રોત તથા સપ્લાયરોના દસ્તાવેજોની કાયદેસરતા અંગે સવાલો ઊભા થયા છે. ધરપકડ બાદ કેસની તપાસ આગળ વધારવામાં આવી રહી છે.

678 કરોડ ટાકાના મની લોન્ડરિંગનો આરોપ

બાંગ્લાદેશના CIDએ નવેમ્બર 2025માં દિલીપ અગ્રવાલ સામે મની લોન્ડરિંગનો કેસ નોંધ્યો હતો. તપાસ એજન્સીના જણાવ્યા મુજબ, 6 સપ્ટેમ્બર 2006થી 8 ફેબ્રુઆરી 2024 દરમિયાન કંપનીએ લેટર ઑફ ક્રેડિટ (LC) મારફતે આશરે 38.47 કરોડ ટાકાની સોનાની લગડીઓ, ઘરેણાં, હીરા અને અન્ય વસ્તુઓ કાયદેસર રીતે આયાત કરી હતી.

પરંતુ આ જ સમયગાળામાં સ્થાનિક બજારમાંથી આશરે 678.19 કરોડ ટાકાના સોના અને હીરા ખરીદવામાં આવ્યા હોવા છતાં તેમના સ્ત્રોત અને સપ્લાયરો અંગે માન્ય દસ્તાવેજો રજૂ કરવામાં આવ્યા ન હોવાનો CIDનો આરોપ છે. તપાસ એજન્સીને શંકા છે કે આ કિંમતી વસ્તુઓમાંથી કેટલીક દાણચોરી દ્વારા દેશમાં લાવવામાં આવી હોઈ શકે છે. આ આરોપોની તપાસ ચાલુ છે.

અદાલતે એક દિવસના રિમાન્ડ પર મોકલ્યા

અહેવાલ મુજબ, 20 ઑક્ટોબર 2026ના રોજ ઢાકા મેટ્રોપોલિટન મેજિસ્ટ્રેટે દિલીપ અગ્રવાલાને એક દિવસના પોલીસ રિમાન્ડ પર મોકલવાનો આદેશ આપ્યો હતો. પોલીસ દ્વારા ત્રણ દિવસના રિમાન્ડની માગ કરવામાં આવી હતી, પરંતુ અદાલતે એક દિવસની મંજૂરી આપી હતી.

મની લોન્ડરિંગ અને દાણચોરીના આરોપો અંગે તપાસ એજન્સીઓ નાણાકીય વ્યવહારો, બેંક ખાતાં અને સંબંધિત દસ્તાવેજોની તપાસ કરી રહી છે. આ તબક્કે આરોપો તપાસ હેઠળ છે; કેસમાં અંતિમ દોષિતતા અદાલતી કાર્યવાહીથી જ નક્કી થશે.

આ પણ વાંચો: મની લોન્ડરિંગ કેસમાં ED એક્શનમાં, કોલકાતાના DCP અને ઉદ્યોગપતિના ઘરે EDના દરોડા

આ પણ વાંચો: અમદાવાદમાં ગેરકાયદે ઓનલાઈન સટ્ટાબાજી,  મની લોન્ડરિંગના મોટા રેકેટનો પર્દાફાશ!

આ પણ વાંચો: મેહુલ ચોક્સીનો પુત્ર રોહન પણ મની લોન્ડરિંગમાં સંડોવાયેલો હતો, 8 વર્ષ પછી EDનો મોટો ખુલાસો