ઈંગ્લેન્ડના દિગ્ગજ ઓલરાઉન્ડર ખેલાડી બેન સ્ટોક્સે ODI ફોર્મેટમાંથી નિવૃત્તિની જાહેરાત કરી છે. તેણે તેની ODI કારકિર્દી દરમિયાન ઘણી યાદગાર ઇનિંગ્સ રમી હતી. સ્ટોક્સે વનડેમાં 3 સદી અને 21 અડધી સદી ફટકારવાની સાથે 74 વિકેટ ઝડપી છે.બેન સ્ટોક્સે એક નિવેદન જારી કરીને કહ્યું કે, હું મંગળવારે ઈંગ્લેન્ડ માટે મારી છેલ્લી વનડે મેચ રમીશ. મેં આ ફોર્મેટમાંથી નિવૃત્તિ લેવાનો નિર્ણય કર્યો છે. મારા માટે આ ખૂબ જ મુશ્કેલ નિર્ણય રહ્યો છે. મેં ઈંગ્લેન્ડ માટે રમવાની દરેક મિનિટનો આનંદ માણ્યો છે. મારી સફર શાનદાર રહી છે.
❤️🏴 pic.twitter.com/xTS5oNfN2j
— Ben Stokes (@benstokes38) July 18, 2022
બેન સ્ટોક્સે વધુમાં કહ્યું કે, અહીં સુધી પહોંચવાનો નિર્ણય ઘણો મુશ્કેલ હતો. પરંતુ હું આ ફોર્મેટમાં મારું 100% આપી શકતો નથી. આ ફોર્મેટ મારા માટે નથી. મારું શરીર પણ મને એ રીતે સાથ નથી આપી રહ્યું. મને લાગે છે કે હું કોઈ અન્ય ખેલાડીનું સ્થાન લઈ રહ્યો છું. આગળ વધવાનો આ સમય છે.”બેન સ્ટોક્સ હવે ટેસ્ટ ક્રિકેટ પર ધ્યાન કેન્દ્રિત કરશે. તેણે કહ્યું, મારી પાસે જે પણ છે તે હવે હું માત્ર ટેસ્ટ ક્રિકેટને જ આપીશ. આ સાથે મને લાગે છે કે હું T20 ક્રિકેટ પર ધ્યાન આપી શકીશ.
નોંધનીય છે કે સ્ટોક્સે ઓગસ્ટ 2011માં આયરલેન્ડ સામે ડેબ્યૂ વનડે મેચ રમી હતી. આ પછી તેણે 104 મેચમાં 2919 રન બનાવ્યા. આ દરમિયાન સ્ટોક્સે 3 સદી અને 21 અડધી સદી ફટકારી હતી. તેણે આ ફોર્મેટમાં 74 વિકેટ લીધી હતી. સ્ટોક્સનું વનડેમાં સર્વશ્રેષ્ઠ પ્રદર્શન 61 રનમાં 5 વિકેટ રહ્યું છે.
