Ganesh Festival Updates: કર્ણાટકની રાજધાની બેંગલુરુના ઈદગાહ મેદાનમાં ગણેશ પૂજાને લઈને સુપ્રીમ કોર્ટે મોટો નિર્ણય સંભળાવ્યો છે. કોર્ટે કહ્યું છે કે ઈદગાહ મેદાનમાં ગણેશ પૂજા કરવામાં આવશે નહીં. અહીં યથાસ્થિતિ યથાવત રહેશે. સુપ્રીમ કોર્ટે હાઈકોર્ટના નિર્ણયને રદ કર્યો છે. અગાઉ, હાઈકોર્ટે ઈદગાહ મેદાનમાં ગણેશ ઉત્સવની પરવાનગી આપી હતી, જેને મુસ્લિમ પક્ષે સર્વોચ્ચ અદાલતમાં પડકાર્યો હતો. સુપ્રીમ કોર્ટે વિવાદિત ઈદગાહ મેદાન પર યથાસ્થિતિ જાળવી રાખવા જણાવ્યું છે. હાલમાં અહીં કોઈ ગણેશ ઉત્સવ થશે નહીં.
તમને જણાવી દઈએ કે ઈદગાહ મેદાનમાં ગણેશ પૂજાની પરવાનગી આપ્યા બાદ વધુ એક વિવાદ ઉભો થયો હતો. આ પછી મેદાનની આસપાસ પોલીસ તૈનાત કરવામાં આવી હતી. રાજ્યના વક્ફ બોર્ડે આ મામલે સુપ્રીમ કોર્ટનો સંપર્ક કર્યો હતો. ત્રણ જજની બેંચ આ મામલાની સુનાવણી કરી રહી હતી.
હાઈકોર્ટે શું કહ્યું?
તાજેતરમાં, હાઈકોર્ટે રાજ્ય સરકારને બેંગલુરુના ચામરાજપેટ ઈદગાહ મેદાનમાં ગણેશ ચતુર્થીની ઉજવણી કરવા માટે વિચારણા કરવા જણાવ્યું હતું. આ પછી રાજ્ય સરકારે આ મેદાનમાં ગણેશ ઉત્સવ માટે બે દિવસની મંજૂરી પણ આપી હતી. જે બાદ વિવાદ સર્જાયો હતો. વક્ફ બોર્ડે તેનો વિરોધ કર્યો અને હાઈકોર્ટના આ નિર્દેશ સામે સુપ્રીમ કોર્ટમાં પહોંચ્યા.
બંને જજો વચ્ચે મતભેદ
આ મામલો સુપ્રીમ કોર્ટમાં પહોંચ્યો ત્યારે વચગાળાના આદેશને લઈને બંને જજો વચ્ચે મતભેદ થયો હતો. ત્યારબાદ મામલો CJIને મોકલવામાં આવ્યો હતો. CJI જસ્ટિસ યુયુ લલિતે આ મામલો જસ્ટિસ ઈન્દિરા બેનર્જી, એમએમ સુંદરેશ અને એએસ ઓકાની બેન્ચને મોકલ્યો. આ જ બેન્ચે ચુકાદો આપ્યો છે કે જે રીતે અગાઉ ઇદગાહ મેદાનમાં ગણેશ ઉત્સવનું આયોજન કરવામાં આવ્યું ન હતું તે રીતે યથાસ્થિતિ યથાવત રહેશે અને આ વખતે પણ ગણેશ પૂજા થશે નહીં.
આ પહેલા હાઈકોર્ટની સિંગલ બેન્ચે કહ્યું હતું કે આ મેદાનનો ઉપયોગ સ્વતંત્રતા દિવસ અને પ્રજાસત્તાક દિવસની ઉજવણી માટે થઈ શકે છે. આ સિવાય તેનો ઉપયોગ રમતના મેદાન તરીકે પણ થઈ શકે છે. આ સિવાય મુસ્લિમ સમુદાયના લોકો બંને ઈદ પર નમાઝ અદા કરી શકે છે. બાદમાં ડિવિઝન બેન્ચે આદેશમાં ફેરફાર કર્યો હતો અને રાજ્ય સરકારને નિર્ણય લેવાની મંજૂરી આપી હતી. આ પછી રાજ્ય સરકારે ગણેશ ચતુર્થીને મંજૂરી આપી હતી.
આ પણ વાંચો: ક્રુરતાની હદ/ ભાજપની મહિલા નેતાની કરતૂત, નોકરાણીને બંધક બનાવી, પછી દાંત તોડી નાખ્યા, શરીર દામ આપ્યા
