જર્મન સરકારે કહ્યું છે કે યુક્રેન તેના દ્વારા મોકલવામાં આવેલા હથિયારોનો ઉપયોગ રશિયાના હુમલા સામે કરી શકે છે. જર્મન સરકારનું કહેવું છે કે તે અને તેના સહયોગી દેશો રશિયા-યુક્રેન વચ્ચે ચાલી રહેલા યુદ્ધ પર ચાંપતી નજર રાખી રહ્યા છે. યુક્રેનને પણ યુદ્ધને લઈને સમર્થન આપવામાં આવી રહ્યું છે. રશિયાએ તાજેતરમાં ખાર્કિવ ક્ષેત્રમાં ખાસ કરીને રશિયન સરહદની નજીકના લક્ષ્યો પર હુમલા કર્યા પછી જર્મનીની પ્રતિક્રિયા આવી છે.
યુક્રેનને પોતાનો બચાવ કરવાનો અધિકાર છે
જર્મન સરકાર તરફથી એક નિવેદનમાં કહેવામાં આવ્યું છે કે, “અમે માનીએ છીએ કે યુક્રેનને આંતરરાષ્ટ્રીય કાયદા હેઠળ આ હુમલાઓથી પોતાનો બચાવ કરવાનો અધિકાર છે.” “આ માટે, તે (યુક્રેન) તેની આંતરરાષ્ટ્રીય કાનૂની પ્રતિબદ્ધતાઓ અનુસાર, અમારા દ્વારા પ્રદાન કરવામાં આવેલા શસ્ત્રોનો પણ ઉપયોગ કરી શકે છે,” નિવેદનમાં કહેવામાં આવ્યું છે.
બેલ્જિયમ F-16 ફાઈટર એરક્રાફ્ટ આપશે
અત્રે એ પણ જણાવી દઈએ કે બેલ્જિયમે રશિયા સાથે યુદ્ધ લડી રહેલા યુક્રેનને મદદ કરવાનું વચન આપ્યું છે અને તેણે આગામી ચાર વર્ષમાં યુક્રેનને 30 F-16 ફાઈટર પ્લેન આપવાનું વચન આપ્યું છે. આ અંગે યુક્રેનના રાષ્ટ્રપતિ વોલોડીમિર ઝેલેન્સકીએ કહ્યું, “અમે આ વર્ષે યુદ્ધના મેદાનમાં F-16 ફાઈટર એરક્રાફ્ટનો ઉપયોગ કરીશું અને આ રીતે (યુદ્ધમાં) અમારી સ્થિતિ મજબૂત કરીશું.”
યુક્રેનને અમેરિકા સહિત અન્ય દેશો તરફથી મદદ મળી રહી હોવા છતાં રશિયાના રાષ્ટ્રપતિ વ્લાદિમીર પુતિન આ અંગે ચેતવણી આપી ચૂક્યા છે. ઉઝબેકિસ્તાનની તાજેતરની મુલાકાત દરમિયાન, રશિયન પ્રમુખ પુતિને પત્રકારોને જણાવ્યું હતું કે જો યુક્રેન રશિયન પ્રદેશ પર હુમલો કરવા માટે પશ્ચિમી દેશો દ્વારા આપવામાં આવેલી લાંબા અંતરની મિસાઇલોનો ઉપયોગ કરશે, તો યુદ્ધ ભડકી શકે છે. તેમણે નાટો (નોર્થ એટલાન્ટિક ટ્રીટી ઓર્ગેનાઈઝેશન)ને ચેતવણી આપી હતી કે આવી સ્થિતિમાં તેણે સંભવિત પરિણામોથી વાકેફ રહેવું જોઈએ.
આ પણ વાંચો: રશિયાના રાષ્ટ્રપતિએ તેમના ઉત્તરાધિકારીની પસંદગી કોના પર ઉતારી?
આ પણ વાંચો: જાદૂગરે રાતોરાત આબેહૂબ શહેર બનાવ્યું, જર્મન સૈનિકો ઈજીપ્ત સમજી ફાયરિંગ કરવા લાગ્યા!!!
