Increased Interest Rates: નવા વર્ષ 2023 પહેલા નરેન્દ્ર મોદી સરકારે સામાન્ય જનતાને મોટી ભેટ આપી છે. સરકારે 1 જાન્યુઆરીથી નેશનલ સેવિંગ્સ સર્ટિફિકેટ, પોસ્ટ ઓફિસ ફિક્સ્ડ ડિપોઝિટ, સિનિયર સિટિઝન્સ સેવિંગ્સ સ્કીમ પર વ્યાજદરમાં વધારો કર્યો છે. PPF અને સુકન્યા સમૃદ્ધિ યોજનાના વ્યાજ દરોમાં કોઈ ફેરફાર કરવામાં આવ્યો નથી. આ વધારો જાન્યુઆરી-માર્ચ ક્વાર્ટરના વ્યાજદરમાં કરવામાં આવ્યો છે. 1 વર્ષની બચત યોજના પર વ્યાજ દર વધારીને 6.6% કરવામાં આવ્યો છે, જે પહેલા 5.5% હતો. જ્યારે 2 વર્ષની સ્કીમમાં 6.8%ના દરે વ્યાજ મળશે, જે પહેલા 5.7% હતું. 3 વર્ષની સ્કીમ પર વ્યાજ દર વધીને 6.9% થઈ ગયો છે, જે પહેલા 5.8% હતો. તો 5 વર્ષની યોજના પર 7%ના દરે વ્યાજ આપવામાં આવશે, જે પહેલા 6.7 ટકા હતું. સિનિયર સિટીઝન સેવિંગ્સ પ્લાન પર વ્યાજ દર હવે 8% થઈ ગયો છે, જે પહેલા 7.6% હતો.
માસિક આવક યોજના પર વ્યાજ દર વધીને 7.1% થઈ ગયો છે, જે પહેલા 6.7% હતો. આ સિવાય કિસાન વિકાસ પત્ર પર હવે 7.2 ટકાના દરે વ્યાજ મળશે. તો નેશનલ સેવિંગ્સ સર્ટિફિકેટ પર વ્યાજ દર વધારીને 7% કરવામાં આવ્યો છે, જે પહેલા 6.8% હતો. નાણા મંત્રાલયે શુક્રવારે સાંજે એક પરિપત્ર બહાર પાડ્યો હતો, જેમાં જણાવ્યું હતું કે આ નાની બચત યોજનાઓ પરના વ્યાજ દરમાં જાન્યુઆરી-માર્ચ 2023 ક્વાર્ટર માટે 110 બેસિસ પોઈન્ટ્સ સુધીનો વધારો કરવામાં આવ્યો છે. સરકાર દર ક્વાર્ટરમાં નાની બચત યોજનાઓ પરના વ્યાજ દરોની સમીક્ષા કરે છે. શ્યામલા ગોપીનાથ સમિતિ દ્વારા નાની બચત યોજનાઓ માટે વ્યાજ દરની ગણતરી કરવાની ફોર્મ્યુલા આપવામાં આવી હતી.
સમિતિએ સૂચવ્યું હતું કે વિવિધ યોજનાઓના વ્યાજ દરો સમાન પાકતી મુદતના સરકારી બોન્ડની ઉપજ કરતાં 25-100 bps વધારે હોવા જોઈએ. લગભગ ચાર વર્ષ બાદ સરકારે છેલ્લા ત્રિમાસિક ગાળામાં કેટલીક નાની બચત યોજનાઓના વ્યાજદરમાં વધારો કર્યો હતો. ઓક્ટોબર-ડિસેમ્બર 2022 ક્વાર્ટર માટે ત્રણ નાની બચત યોજનાઓના વ્યાજ દરોમાં 10 bps થી 30 bps નો વધારો કરવામાં આવ્યો હતો.
આ પણ વાંચો: Entertentment/આ બોલિવૂડ કલાકારોની વર્ષ 2023માં OTT પ્લેટફોર્મ પર થશે એન્ટ્રી
