નીતિ આયોગે પ્રથમ વખત રાજ્ય ઉર્જા અને આબોહવા સૂચકાંક બહાર પાડ્યો છે. જેમાં સ્વચ્છ ઉર્જા પ્રદાન કરવાના આધારે રાજ્યોને સ્થાન આપવામાં આવ્યું છે. રેન્કિંગ માટે છ માપદંડનો ઉપયોગ કરવામાં આવ્યો છે.નીતિ આયોગ દ્વારા બહાર પાડવામાં આવેલા ઉર્જા સૂચકાંકમાં મોટા રાજ્યોની યાદીમાં ગુજરાતને પ્રથમ સ્થાન મળ્યું છે. ગુજરાતનો એકંદર સ્કોર 50.1 છે અને તેણે રાજ્યની વીજ વિતરણ કંપનીઓની કામગીરી અને સ્વચ્છ ઊર્જામાં નવીનતા માટે ટોચનું રેન્કિંગ મેળવ્યું છે. ગુજરાત પછી કેરળ અને પછી પંજાબને 20 મોટા રાજ્યોમાં સ્થાન મળ્યું છે.
મોટા રાજ્યોમાં સૌથી નીચું સ્થાન છત્તીસગઢ હતું, જેને 20મું સ્થાન મળ્યું હતું અને તેનો સ્કોર 31.7 હતો. સૌથી ખરાબ પ્રદર્શન કરનારા રાજ્યોની યાદીમાં છત્તીસગઢ ઉપરાંત મધ્યપ્રદેશ, ઝારખંડ અને રાજસ્થાનનો સમાવેશ થાય છે. બીજી તરફ હિમાચલ પ્રદેશે સુધારાની દૃષ્ટિએ શ્રેષ્ઠ દેખાવ કર્યો છે.
જો ઈન્ડેક્સમાં નાના રાજ્યોની વાત કરીએ તો ગોવાને શ્રેષ્ઠ પ્રદર્શન કરનાર રાજ્ય જાહેર કરવામાં આવ્યું છે. ત્રિપુરાને બીજું સ્થાન મળ્યું જ્યારે મણિપુરને ત્રીજું સ્થાન મળ્યું. કેન્દ્રશાસિત પ્રદેશોની વાત કરીએ તો ચંદીગઢને પ્રથમ સ્થાન મળ્યું છે જ્યારે દિલ્હીને બીજું સ્થાન મળ્યું છે.
નીતિ આયોગના સીઈઓ અમિતાભ કાંતે અહેવાલ જાહેર કરતાં કહ્યું કે ભારત વિશ્વમાં ઉર્જાનો ત્રીજો સૌથી મોટો ઉપભોક્તા અને તેલનો આયાતકાર દેશ છે. તેમણે કહ્યું કે વડાપ્રધાનનું વિઝન ભારતની આઝાદીના 100 વર્ષ પૂર્ણ થવા પર 2047 સુધીમાં ભારતને ઊર્જા અને તેલની આયાતમાં આત્મનિર્ભર બનાવવાનું છે.
અમિતાભ કાંતે કહ્યું કે આ માટે રાજ્યોમાં સાનુકૂળ વાતાવરણની જરૂર છે અને આયોગ દ્વારા બહાર પાડવામાં આવેલ સૂચકાંક પણ રાજ્યોને આ માટે પ્રોત્સાહિત કરશે અને માર્ગદર્શન આપશે. રાજ્યોનું રેન્કિંગ છ પરિમાણો પર આધારિત છે જેમ કે રાજ્ય વિતરણ કંપનીઓની કામગીરી, ઊર્જા વિશ્વસનીયતા અને પોષણક્ષમતા, ઊર્જા ક્ષેત્રમાં નવીનતાઓ અને ઊર્જા કાર્યક્ષમતા.
