NTA દ્વારા પરીક્ષાઓ પારદર્શક બનાવવા ઉચ્ચ સ્તરીય સમિતિનું નેતૃત્વ ડૉ. કે. રાધાકૃષ્ણન કરશે

reform/ NTA દ્વારા પરીક્ષાઓ પારદર્શક બનાવવા ઉચ્ચ સ્તરીય સમિતિનું નેતૃત્વ ડૉ. કે. રાધાકૃષ્ણન કરશે

કેન્દ્રીય શિક્ષણ મંત્રાલયે જાહેરાત કરી છે કે નેશનલ ટેસ્ટિંગ એજન્સી (NTA) દ્વારા પરીક્ષાઓનું પારદર્શક, સરળ અને ન્યાયિક સંચાલન………….

New Delhi News: કેન્દ્રીય શિક્ષણ મંત્રાલયે જાહેરાત કરી છે કે નેશનલ ટેસ્ટિંગ એજન્સી (NTA) દ્વારા પરીક્ષાઓનું પારદર્શક, સરળ અને ન્યાયિક સંચાલન સુનિશ્ચિત કરવા માટે નિષ્ણાતોની ઉચ્ચ સ્તરીય સમિતિની રચના કરવામાં આવી છે. સાત સભ્યોની પેનલનું નેતૃત્વ ઈસરોના ભૂતપૂર્વ વડા ડૉ. કે. રાધાકૃષ્ણન કરશે.

આ સ્ટેપ NTA એ UGC-NET રદ કર્યા બાદ લેવામાં આવ્યું છે. જ્યારે તેનું પ્રશ્નપત્ર ડાર્કનેટ પર લીક થયું હોવાનું જાણવા મળ્યું હતું. તે ઉપરાંત, NEETમાં ગેરરીતિના આક્ષેપો પણ થયા છે, જેના કારણે પરીક્ષાઓની પ્રક્રિયા અંગે ચર્ચાઓ થઈ છે. ઉચ્ચ સ્તરીય સમિતિ(હાઈ લેવલ કમિટી)ને પરીક્ષા પ્રક્રિયામાં સુધારાઓ, ડેટા સુરક્ષા પ્રોટોકોલમાં સુધારો કરવા અને NTAની રચના અને કાર્યપદ્ધતિને વધારવા અંગે ભલામણો કરવાની જવાબદારી સોંપવામાં આવી છે.

કમિટીને બે મહિનામાં રિપોર્ટ આપવા માટે કહેવામાં આવ્યું છે.

સમિતિના સભ્યો
ISROના ભૂતપૂર્વ અધ્યક્ષ અને IIT કાનપુરના બોર્ડ ઑફ ગવર્નર્સના અધ્યક્ષ ડૉ. કે. રાધાકૃષ્ણનને સમિતિના અધ્યક્ષ તરીકે નિયુક્ત કરવામાં આવ્યા છે. અન્ય સભ્યોમાં ડૉ. રણદીપ ગુલેરિયા, એઈમ્સ દિલ્હીના ભૂતપૂર્વ નિયામક; પ્રો. બી.જે. રાવ, સેન્ટ્રલ યુનિવર્સિટી ઓફ હૈદરાબાદના વાઇસ ચાન્સેલર; પ્રો. રામામૂર્તિ કે, સિવિલ એન્જિનિયરિંગ વિભાગ, IIT મદ્રાસ ખાતે પ્રોફેસર એમેરિટસ; પંકજ બંસલ, પીપલ સ્ટ્રોંગના સહ-સ્થાપક અને કર્મયોગી ભારતના બોર્ડ સભ્ય; પ્રો. આદિત્ય મિત્તલ, IIT દિલ્હી ખાતે વિદ્યાર્થી બાબતોના ડીન; અને શિક્ષણ મંત્રાલયના સંયુક્ત સચિવ ગોવિંદ જયસ્વાલ, જેઓ સભ્ય સચિવ તરીકે સેવા આપશે.

સમિતિનું કાર્ય
સમિતિનું પ્રાથમિક ધ્યાન પરીક્ષા પ્રક્રિયામાં સુધારા પર રહેશે. આમાં સિસ્ટમની કાર્યક્ષમતા સુધારવા અને કોઈપણ સંભવિત ભંગને રોકવા માટે પગલાં સૂચવવા માટે સમગ્ર પરીક્ષા પ્રક્રિયાનું વિશ્લેષણ શામેલ છે. વધુમાં, સમિતિ સ્ટાન્ડર્ડ ઓપરેટિંગ પ્રોસિજર (SOPs) અને NTA ના પ્રોટોકોલ્સની સંપૂર્ણ સમીક્ષા કરશે, આ પ્રક્રિયાઓને મજબૂત કરવાનાં પગલાંની ભલામણ કરશે અને એક મજબૂત મોનિટરિંગ મિકેનિઝમ દ્વારા દરેક સ્તરે અનુપાલન સુનિશ્ચિત કરશે.

પેનલ ડેટા સિક્યુરિટી પ્રોટોકોલને મજબૂત કરવાની રીતો પર પણ ધ્યાન આપશે. સમિતિ NTAની હાલની ડેટા સુરક્ષા પ્રક્રિયાઓનું મૂલ્યાંકન કરશે અને વૃદ્ધિ માટેના પગલાંની ભલામણ કરશે. આમાં સિસ્ટમને વધુ મજબૂત અને સુરક્ષિત બનાવવાની રીતો સૂચવવા માટે પેપર-સેટિંગ અને અન્ય પરીક્ષા પ્રક્રિયાઓ સંબંધિત વર્તમાન સુરક્ષા પ્રોટોકોલ્સની તપાસ કરવામાં આવશે.