હિમાચલ પ્રદેશમાં વિધાનસભાની ૬૮ બેઠકો માટે મતદાન થઇ રહ્યું છે. ગુરુવાર સવારે ૮ વાગ્યાથી શરુ થયેલી મતદાન સાંજે ૫ વાગ્યા સુધી ચાલશે. મતદાનને લઇ લોકોમાં પણ ભારે ઉત્સાહ જોવા મળી રહ્યો છે. સવારે ૧૦ વાગ્યા સુધી ૧૩.૭૨ % વોટીંગ થયું હતું. ભારતીય જનતા પાર્ટીના સીએમ પદના ઉમેદવાર પ્રેમ કુમાર ધુમલ, વર્તમાન મુખ્યમંત્રી વીરભદ્ર સિંહ, ભાજપના નેતા અનુરાગ ઠાકુર સહિતના તમામ પાર્ટીના દિગ્ગજ નેતાઓએ મતદાન કર્યું હતું.
વિધાનસભાની ચુંટણીને લઇ રાજ્યભરમાં સુરક્ષાનો ચુસ્ત બંધોબસ્ત કરવામાં આવ્યો છે. ચુંટણી દરમિયાન પોલીસના ૧૧૫૦૦, હોમગાર્ડના ૬૪૦૦ જવાનો તેમજ અર્ધસૈનિક દળની ૬૫ કંપનીઓને તૈનાત કરવામાં આવી છે.
મહત્વનું છે કે, આ વખતે હિમાચલ પ્રદેશની ચુંટણીમાં ભાજપના સીએમ પદના ઉમેદવાર પ્રેમ કુમાર ધુમલ અને મુખ્યમંત્રી વીરભદ્ર સિંહ વચ્ચે સીધી ટક્કર જોવા મળી રહી છે. ત્યારે પ્રેમ કુમાર ધુમલે ચુંટણીમાં ૬૦ થી વધુ સીટ જીતવાનો દાવો કર્યો છે.