Himmatnagar News: સાબરકાંઠા જિલ્લામાં સાયબર છેતરપિંડીની (Himmatnagar Cyber Crime) રકમને મ્યુલ બેન્ક એકાઉન્ટ મારફતે ફેરવતા નેટવર્કનો હિંમતનગર સાયબર ક્રાઈમે પર્દાફાશ કર્યો છે. પોલીસ તપાસમાં હિંમતનગર અને ઈડર તાલુકાના આસપાસના વિસ્તારોમાં સાયબર ફ્રોડની રકમ માટે ઉપયોગમાં લેવાતા 12 બેન્ક એકાઉન્ટ સામે આવ્યા છે. સમગ્ર મામલે પોલીસે 10 આરોપીઓની ઓળખ કરી છે, જેમાંથી 9 આરોપીઓની ધરપકડ કરવામાં આવી છે.

Himmatnagar Cyber Crime: ચાર રાજ્યોમાંથી 17 ફરિયાદો મળી

પોલીસ તપાસ દરમિયાન સામે આવ્યું કે આ મ્યુલ બેન્ક એકાઉન્ટ (Mule Bank Account) સામે નેશનલ સાયબર ક્રાઈમ રિપોર્ટિંગ પોર્ટલ (NCRP) પર કેરળ, તેલંગાણા, કર્ણાટક અને મહારાષ્ટ્ર સહિતના રાજ્યોમાંથી કુલ 17 ફરિયાદો નોંધાઈ છે. આ ફરિયાદોના આધારે પોલીસે એકાઉન્ટના વ્યવહારો અને તેની સાથે સંકળાયેલા લોકોની તપાસ હાથ ધરી હતી.

રૂ.14.24 કરોડના સાયબર ફ્રોડની કડી

તપાસમાં આ નેટવર્ક સાથે સંકળાયેલા સાયબર ફ્રોડની (Cyber Fraud Network) કુલ રકમ રૂ.14 કરોડ 24 લાખ 59 હજાર 668 હોવાનું સામે આવ્યું છે. જ્યારે તપાસ હેઠળ આવેલા મ્યુલ એકાઉન્ટમાં રૂ.20 લાખ 31 હજાર 466ના વ્યવહારો થયાનું પોલીસને જાણવા મળ્યું છે.

પોલીસના જણાવ્યા મુજબ, આરોપીઓ ઓનલાઈન છેતરપિંડીથી મેળવેલી રકમ મ્યુલ ખાતાધારકોના બેન્ક એકાઉન્ટમાં જમા કરાવતા હતા. ત્યારબાદ ખાતાધારકોને વ્યવહાર બદલ 3થી 4 ટકા સુધીનું કમિશન આપવામાં આવતું હતું. કમિશન બાદની રકમ ATM, ચેક અથવા અન્ય માધ્યમથી ઉપાડી ફરી અલગ-અલગ ખાતાઓમાં ટ્રાન્સફર કરવામાં આવતી હતી. આ રીતે સાયબર ફ્રોડની રકમને અનેક ખાતાઓ (Online Fraud) મારફતે ફેરવવામાં આવતી હોવાની વિગતો તપાસમાં સામે આવી છે.

9 આરોપીઓ ઝડપાયા, એકની શોધખોળ

આ સમગ્ર કેસમાં પોલીસે અત્યાર સુધી 10 આરોપીઓની ઓળખ કરી છે. તેમાંથી 9 આરોપીઓને ઝડપી લેવામાં આવ્યા છે, જ્યારે વધુ એક આરોપીને પકડવા માટે પોલીસની ટીમો તપાસ કરી રહી છે.

મુખ્ય સૂત્રધારો સુધી પહોંચવા તપાસ

હિંમતનગર સાયબર ક્રાઈમે હવે ઝડપાયેલા આરોપીઓના અગાઉના ગુનાહિત ઇતિહાસની તપાસ શરૂ કરી છે. આ ઉપરાંત મ્યુલ એકાઉન્ટનું નેટવર્ક અન્ય સાયબર ગુનાઓ સાથે સંકળાયેલું છે કે કેમ અને અન્ય જિલ્લાઓમાં પણ આ જ પદ્ધતિથી છેતરપિંડીની રકમ ફેરવવામાં આવી છે કે કેમ તે દિશામાં તપાસ ચાલી રહી છે. પોલીસનું મુખ્ય ધ્યાન આ નેટવર્કના સંભવિત મુખ્ય સૂત્રધારો સુધી પહોંચવા અને સાયબર ફ્રોડની રકમની વધુ વિગતો મેળવવા પર છે. સાથે જ છેતરપિંડીથી મેળવેલી રકમની રિકવરી માટે પણ કાર્યવાહી આગળ ધપાવવામાં આવી રહી છે.

@દિપકસિંહ રાઠોડ

આ પણ વાંચો: અમદાવાદમાં ડેન્ગ્યુની દહેશત! જુલાઈ કરતાં ઓગસ્ટમાં કેસ ચાર ગણાથી વધુ

આ પણ વાંચો: PM મોદીની મુલાકાત પહેલાં વડોદરા બનશે ચકાચક! શરૂ થયું ‘સ્વચ્છતા સપ્તાહ’ અભિયાન

આ પણ વાંચો: ગુજરાતમાં ચોમાસું પડ્યું ધીમું, 7 સપ્ટેમ્બર સુધી વરસાદની આગાહી; જાણો ક્યાં પડશે ઝાપટાં