Moody’s Ratings India Report 2026: વૈશ્વિક ક્રેડિટ રેટિંગ એજન્સી ‘મૂડીઝ રેટિંગ્સ’ દ્વારા મંગળવારે જારી કરવામાં આવેલા તાજા રિપોર્ટમાં ભારતીય અર્થતંત્રની (Economy) પ્રશંસા કરવામાં આવી છે. મૂડીઝના મતે, વર્ષ 2020 પછી વિશ્વભરમાં આવેલા આર્થિક સંકટો અને ભૌગોલિક-રાજકીય તણાવ વચ્ચે ભારત સૌથી મજબૂત અને લચીલી (Resilient) ઉભરતી બજાર અર્થતંત્ર તરીકે ઉભરી આવ્યું છે.
ભારતની મજબૂતીના મુખ્ય સ્તંભો
મૂડીઝના રિપોર્ટમાં ભારતની સફળતા પાછળ કેટલાક મહત્વના પરિબળોને જવાબદાર ગણાવ્યા છે:
વિશાળ વિદેશી મુદ્રા ભંડાર: ભારત પાસે પર્યાપ્ત વિદેશી મુદ્રા ભંડાર (Forex Reserves) ઉપલબ્ધ છે, જે ચલણમાં આવતી અસ્થિરતાને રોકવામાં અને રોકાણકારોનો વિશ્વાસ જાળવી રાખવામાં ઢાલ સમાન સાબિત થયો છે. 24 એપ્રિલ 2026 ના આંકડા મુજબ ભારતનો ભંડાર 698.49 અબજ ડોલરની સપાટીએ છે.
સ્પષ્ટ નાણાકીય નીતિ: ભારતનું મોનેટરી પોલિસી (Economy) માળખું ખૂબ જ સ્પષ્ટ અને અનુમાનિત છે. દેશમાં મોંઘવારીનું નિયંત્રણ અને વિનિમય દરોમાં જરૂર મુજબ ફેરફાર કરવાની ક્ષમતા અર્થતંત્રને ગમે તેવા ઝટકા સહન કરવા માટે તૈયાર રાખે છે.
સ્થાનિક બજાર પર નિર્ભરતા: ભારતની ઘરેલું ફંડિંગ પરની નિર્ભરતા અને મજબૂત સ્થાનિક બજારો તેને વૈશ્વિક ઉથલપાથલથી સુરક્ષિત રાખે છે.
4 મોટા વૈશ્વિક ઝટકા અને ભારતનું પ્રદર્શન
મૂડીઝે 10 મોટા ઉભરતા બજારો (ભારત, ઈન્ડોનેશિયા, મેક્સિકો, બ્રાઝિલ વગેરે) ના પ્રદર્શનનું આકલન કર્યું હતું. ભારતે નીચે મુજબના સંકટોમાં અન્ય દેશો કરતા વધુ સારી સ્થિતિસ્થાપકતા દર્શાવી છે:
કોવિડ-19 મહામારી (2020): વૈશ્વિક સપ્લાય ચેઈન ખોરવાઈ છતાં ભારતે રિકવરી ઝડપી બનાવી.
મોંઘવારી અને વ્યાજ દરો (2022): અમેરિકી ફેડરલ રિઝર્વ દ્વારા વ્યાજ દરમાં વધારો કરવા છતાં ભારત સ્થિર રહ્યું.
બેંકિંગ સંકટ (2023): અમેરિકાના પ્રાદેશિક બેંકિંગ તણાવની ભારત પર નહિવત અસર થઈ.
ટેરિફ તણાવ (2025): નવા પેદા થયેલા વ્યાપારી ટેરિફ તણાવ વચ્ચે પણ ભારતીય બજારોએ મજબૂતી જાળવી રાખી.
ભવિષ્યના પડકારો: દેવાનો બોજ (Economy)
રિપોર્ટમાં સકારાત્મક પાસાઓની સાથે એક ચેતવણી પણ આપવામાં આવી છે. મૂડીઝના જણાવ્યા મુજબ, ભારત પર જાહેર દેવાનો (Public Debt) ઊંચો બોજ અને રાજકોષીય સંતુલન નબળું હોવાથી ભવિષ્યમાં આવનારા સંકટો સામે પ્રતિક્રિયા આપવા માટેની નાણાકીય ક્ષમતા (Economy) મર્યાદિત બની શકે છે. તેમ છતાં, મજબૂત નીતિઓ અને બફર સ્ટોકને કારણે ભારત અન્ય દેશોની સરખામણીએ વધુ સારી સ્થિતિમાં છે.
