West Bengal News : પશ્ચિમ બંગાળ (West Bengal)માં ચૂંટણી પૂર્ણ થયા બાદ પણ રાજકીય ગરમાવો યથાવત્ છે. તાજેતરમાં માલદા (Malda) જિલ્લાના ચંચલ (Chanchal)વિસ્તારમાં કોંગ્રેસ (Congress)ના પાર્ટી કાર્યાલયને લઈને પાર્ટીના બે જૂથો આમને-સામને આવી ગયા હતા. જિલ્લા સ્તરના નેતાઓની હાજરીમાં જ કાર્યકરો વચ્ચે ઉગ્ર બોલાચાલી બાદ મામલો મારામારી સુધી પહોંચી ગયો હતો, જેના કારણે વિસ્તારમાં તણાવનો માહોલ સર્જાયો હતો.
મળતી માહિતી મુજબ, કોંગ્રેસના સ્થાનિક કાર્યાલય પર કબજો મેળવવાના મુદ્દે પાર્ટીના એક જૂથ અને બળવાખોર કાર્યકરો વચ્ચે વિવાદ શરૂ થયો હતો. બેઠક પૂર્ણ થયા બાદ કોંગ્રેસ (Congress)ના કેટલાક નેતાઓ અને કાર્યકરો પાર્ટી ઓફિસ પહોંચ્યા હતા. તે દરમિયાન ઓફિસમાં પહેલેથી હાજર બળવાખોર જૂથના કાર્યકરો સાથે તેમની ઉગ્ર બોલાચાલી થઈ હતી.
પ્રત્યક્ષદર્શીઓના જણાવ્યા અનુસાર, વિવાદ વધતા બંને પક્ષો વચ્ચે ધક્કામુક્કી અને મારામારી થઈ હતી. કેટલાક લોકોએ લાકડીઓનો પણ ઉપયોગ કર્યો હોવાના અહેવાલ છે. આ અથડામણમાં બંને પક્ષના કાર્યકરોને ઈજાઓ પહોંચી હોવાનું સામે આવ્યું છે. ઘાયલોમાં એક બળવાખોર કાર્યકરના નાકમાં ઈજા થઈ હોવાનું તેમજ કોંગ્રેસના એક કાર્યકરને પણ ઈજા પહોંચી હોવાનું જાણવા મળ્યું છે.
ઘટનાની જાણ થતાં જ ચંચલ પોલીસ સ્ટેશનનો કાફલો તેમજ કેન્દ્રીય દળોના જવાનો ઘટનાસ્થળે પહોંચ્યા હતા. સુરક્ષા દળોએ તાત્કાલિક પરિસ્થિતિને કાબૂમાં લઈને બંને જૂથોને અલગ કર્યા હતા અને વિસ્તારમાં કાયદો-વ્યવસ્થા જાળવવા માટે પોલીસ બંદોબસ્ત ગોઠવાયો હતો.
આ ઘટના બાદ કોંગ્રેસ (Congress)ના સ્થાનિક સંગઠનમાં ચાલી રહેલા આંતરિક મતભેદો ફરી એકવાર જાહેરમાં સામે આવ્યા છે. હાલ સમગ્ર મામલે પોલીસ પરિસ્થિતિ પર નજર રાખી રહી છે અને વિસ્તારમાં શાંતિ જળવાઈ રહે તે માટે જરૂરી કાર્યવાહી હાથ ધરવામાં આવી રહી છે.
