Kalol GIDC Accident: કલોલ GIDC પંથકમાં આજે એક કાળજું કંપાવી દે તેવી ઘટના સામે આવી છે. અહીંની મફતલાલ ગુજરાત ઇન્ડસ્ટ્રીઝમાં સફાઈ કામગીરી દરમિયાન ત્રણ શ્રમિકોના કરૂણ મોત નિપજ્યા છે. પાણીનો ભૂગર્ભ ટાંકો સાફ કરવા ઉતરેલા આ શ્રમિકોને ગૂંગળામણ થતા તેઓએ જીવ ગુમાવ્યા છે, જેના પગલે સમગ્ર કલોલ પંથકમાં અરેરાટી વ્યાપી ગઈ છે.
જાણો કેવી રીતે સર્જાઈ આ ગમખ્વાર ઘટના?
મળતી વિગતો અનુસાર, કલોલ GIDC માં આવેલી મફતલાલ ગુજરાત ઇન્ડસ્ટ્રીઝમાં આજે સવારના સમયે પાણીના ટાંકાની સફાઈની પ્રક્રિયા ચાલી રહી હતી. આ કામગીરી માટે ત્રણ શ્રમિકો ટાંકાની અંદર ઉતર્યા હતા. જોકે, અંદર ઉતર્યા બાદ ત્રણેય શ્રમિકો લાંબા સમય સુધી બહાર ન આવતા અન્ય કર્મચારીઓને ચિંતા થઈ હતી. જ્યારે ટાંકાની અંદર તપાસ કરવામાં આવી ત્યારે ત્રણેય કામદારો બેભાન અવસ્થામાં મળી આવ્યા હતા.
ઝેરી ગેસ કે ઓક્સિજનની કમી?
પ્રાથમિક અનુમાન મુજબ, ભૂગર્ભ ટાંકાની અંદર ઓક્સિજનનું પ્રમાણ ઘટી જવાથી અથવા કોઈ ઝેરી ગેસના કારણે શ્રમિકો ગૂંગળાઈ ગયા હતા. આ દુર્ઘટનામાં અમિત પરીહાર, અમર શ્રીવાસ્તવ અને શિવનાથ દુબે નામના શ્રમિકોના મોત નીપજ્યા છે. આ ત્રણેય યુવાન શ્રમિકોના મોતની ખબર મળતા જ તેમના પરિવારજનો પર આભ ફાટી પડ્યું છે.
Kalol પોલીસ અને ફાયર બ્રિગેડની કાર્યવાહી
ઘટનાની જાણ થતા જ કલોલ પોલીસ અને ફાયર બ્રિગેડની ટીમ તાત્કાલિક ઘટનાસ્થળે દોડી આવી હતી. ભારે જહેમત બાદ ત્રણેય મૃતદેહોને ટાંકામાંથી બહાર કાઢવામાં આવ્યા હતા. પોલીસે આ મામલે અકસ્માતે મોતનો ગુનો નોંધી તપાસ તેજ કરી છે. પોલીસ એ દિશામાં પણ તપાસ કરી રહી છે કે શું કંપની દ્વારા શ્રમિકોને જરૂરી સુરક્ષા સાધનો (Safety Gears) પૂરા પાડવામાં આવ્યા હતા કે નહીં. હાલ ત્રણેય મૃતદેહોને પોસ્ટમોર્ટમ માટે સિવિલ હોસ્પિટલ ખસેડવામાં આવ્યા છે.
