Gujarat News: ગુજરાતમાં તૃણમૂલ કોંગ્રેસ (TMC) દ્વારા ગુજરાતના ક્રિકેટર યુસુફ પઠાણને બહેરામપુરથી મેદાનમાં ઉતારવાની ચર્ચા ચાલી રહી છે. યુસુફ પઠાણ ચૂંટણી લડાઈમાં જીત મેળવે કે ન મેળવે, પરંતુ તેમની હાર અને જીત બંનેમાં TMCનો ફાયદો જોવા મળી રહ્યો છે. જો યુસુફ પઠાણ બહેરામપુરથી લોકસભાની ચૂંટણી જીતીને લોકસભામાં પહોંચશે તો 35 વર્ષ પછી એવું થશે કે ગુજરાતનો કોઈ મુસ્લિમ રહેવાસી લોકસભામાં પહોંચશે. 1984માં કોંગ્રેસના નેતા અહેમદ પટેલ છેલ્લે ગુજરાતમાંથી મુસ્લિમ તરીકે ચૂંટણી જીત્યા હતા અને 1989 સુધી સાંસદ રહ્યા હતા. આ પછી ગુજરાતમાંથી એકપણ મુસ્લિમ સાંસદ ચૂંટાયા નથી. ઝોહરા ચાવડાનું નામ ગુજરાતના પ્રથમ મુસ્લિમ સાંસદ તરીકે નોંધાયેલું છે. તેઓ 1962માં બનાસકાંઠામાંથી ચૂંટાયા હતા. જો યુસુફ પઠાણ બહેરામપુરમાં કોંગ્રેસના કિલ્લામાં ઘૂસવામાં સફળ રહેશે તો તે આ રાહનો અંત લાવશે. એટલું જ નહીં પશ્ચિમ બંગાળમાં પહેલીવાર તૃણમૂલ બહેરામપુર સીટ પર કબ્જો કરી શકશે. અત્યાર સુધી આ બેઠક કોંગ્રેસના કબજામાં હતી.
મુસ્લિમો પાસે કોઈ નેતા નથી
ક્રિકેટ બાદ કોમેન્ટ્રીની દુનિયામાં સક્રિય રહેલા યુસુફ પઠાણે ટીએમસીના વડા મમતા બેનર્જી સાથે ટીકીટ જાહેર થયા બાદ વિજયના નિશાની સાથે ફોટો પડાવ્યો હતો. 1977માં ગુજરાતમાંથી સૌથી વધુ ત્રણ મુસ્લિમો સંસદમાં પહોંચ્યા હતા. ગુજરાતમાં ભાજપ બાદ કોંગ્રેસ પણ મુસ્લિમોને ઓછી ટિકિટ આપી રહી છે. ભરૂચ લોકસભા બેઠક પર ગુજરાતમાં સૌથી વધુ મુસ્લિમ મતદારો છે. આ બેઠક પરથી અહેમદ પટેલની પુત્રીને ટિકિટ આપવાની સ્થાનિક કોંગ્રેસના નેતાઓની માગ હતી, પરંતુ જ્યારે આ બેઠક I.N.D.I.A ગઠબંધનમાં આમ આદમી પાર્ટીના હાથમાં ગઈ ત્યારે અહેમદ પટેલની પુત્રી મુમતાઝ અને પુત્ર ફૈઝલ નારાજ થઈ ગયા હતા. રાહુલ ગાંધીની ભારત જોડો ન્યાય યાત્રા જ્યારે ભરૂચ પહોંચી ત્યારે મુમતાઝ કે અહેમદ પટેલના પુત્ર ફૈઝલ પટેલે હાજરી આપી ન હતી, જોકે, ભરૂચમાંથી પસાર થયા બાદ મુમતાઝ પટેલે સોશિયલ મીડિયા પ્લેટફોર્મ X પર કેટલીક પોસ્ટ કરી અને રાહુલ ગાંધીના ભાષણના વખાણ કર્યા હતા. અહેમદ પટેલના પરિવારમાં હજુ પણ નારાજગી યથાવત હોવાનું માનવામાં આવે છે.
મુમતાઝ માટે ટિકિટની માંગણી કરવામાં આવી હતી
ભરૂચ બેઠક AAPના હાથમાં ગયા બાદ અહેમદ પટેલના સમર્થકોએ પશ્ચિમ બંગાળ અને ઉત્તર પ્રદેશની મુસ્લિમ બહુમતીવાળી બેઠકો પરથી મુમતાઝ પટેલને મેદાનમાં ઉતારવાની માગ કરી હતી, પરંતુ તૃણમૂલ કોંગ્રેસ પાર્ટીએ ગુજરાતમાંથી મુસ્લિમ ચહેરા તરીકે યુસુફ પઠાણને પસંદ કર્યા હતા. રાજકીય વર્તુળોમાં એવી ચર્ચા છે કે TMC સુપ્રીમો મમતા બેનર્જી અને પાર્ટીના મહાસચિવ અભિષેક બેનર્જીએ યુસુફ પઠાણને મોટો સંદેશ આપવાનો પ્રયાસ કર્યો છે. પાર્ટીએ એ સંદેશ આપવાનો પ્રયાસ કર્યો છે કે યુસુફ પઠાણ ભલે બહેરામપુરથી લોકસભામાં પહોંચશે, પરંતુ તેઓ ગૃહમાં મુસ્લિમોનો અવાજ હશે. જો યુસુફ પઠાણ ચૂંટણી જંગ જીતશે તો તેની અસર ગુજરાત સુધી જોવા મળશે. 182 સભ્યોની ગુજરાત વિધાનસભામાં ઈમરાન ખેડાવાલા એકમાત્ર મુસ્લિમ ધારાસભ્ય છે. તેઓ અમદાવાદની જમાલપુર બેઠક પરથી કોંગ્રેસની ટિકિટ પર જીત્યા હતા.
આ પણ વાંચો:ધનસુરામાં ચકચાર, સગીરા બની હવસખોરનો શિકાર
આ પણ વાંચો:અચાનક ઈન્સ્પેક્ટર સાથેના બ્રેકઅપને કારણે તનાણમાં હતી ડો.વૈશાલી જોષી, આપઘાતની દર્દનાક કહાની આવી સામે
આ પણ વાંચો:ગુજરાત સરકારની મોટી જાહેરાત, આ શાળાના વિદ્યાર્થીઓને મળશે 50 હજાર રૂપિયા
