Kheda News: ખેડા જિલ્લાના કપડવંજ ખાતે ડમ્પિંગ સ્ટેશન સામે આવેલી ફટાકડા બનાવવાની એક ફેક્ટરીમાં શનિવારે અચાનક ભયાનક વિસ્ફોટ થતાં સમગ્ર વિસ્તારમાં અફરાતફરીનો માહોલ સર્જાયો હતો. વિસ્ફોટ એટલો પ્રચંડ હતો કે તેનો ધડાકો આસપાસના અનેક ગામોમાં સંભળાયો હતો અને લોકોમાં ભૂકંપ જેવા આંચકાનો અહેસાસ થતાં ગભરાટ ફેલાયો હતો.
પ્રત્યક્ષદર્શીઓના જણાવ્યા મુજબ, વિસ્ફોટની તીવ્રતા એટલી વધુ હતી કે આશરે 10 કિલોમીટર સુધી તેનો પ્રભાવ અનુભવાયો હતો. ધડાકાના અવાજથી સ્થાનિક રહેવાસીઓ ઘરોમાંથી બહાર દોડી આવ્યા હતા. ઘટનાની જાણ થતાં આસપાસના વિસ્તારોમાંથી મોટી સંખ્યામાં લોકો ઘટનાસ્થળે પહોંચી ગયા હતા.
પ્રાથમિક માહિતી અનુસાર, અકસ્માત સમયે ફેક્ટરીમાં કામ કરી રહેલા 5થી 6 શ્રમિકો ગંભીર રીતે ઈજાગ્રસ્ત થયા છે. તમામ ઈજાગ્રસ્તોને તાત્કાલિક સારવાર માટે નજીકની હોસ્પિટલમાં ખસેડવામાં આવ્યા છે. તેમની હાલત અંગે વધુ વિગતોની રાહ જોવાઈ રહી છે.
સ્થાનિક સૂત્રોના જણાવ્યા મુજબ, જે ફેક્ટરીમાં વિસ્ફોટ થયો તે જરૂરી મંજૂરી વિના ગેરકાયદેસર રીતે સંચાલિત થતી હોવાની આશંકા વ્યક્ત કરવામાં આવી રહી છે. રહેણાંક વિસ્તારની નજીક સુરક્ષા નિયમોને અવગણીને ફટાકડાનું ઉત્પાદન કરવામાં આવતું હોવાના પણ આક્ષેપો થઈ રહ્યા છે.
વિસ્ફોટ બાદ પોલીસ, ફાયર બ્રિગેડ અને સ્થાનિક વહીવટી તંત્રની ટીમો તાત્કાલિક ઘટનાસ્થળે પહોંચી ગઈ હતી. આગ પર કાબૂ મેળવવાની કામગીરી સાથે સમગ્ર વિસ્તારને સુરક્ષિત કરવામાં આવ્યો છે. હાલ અધિકારીઓ દ્વારા વિસ્ફોટનું ચોક્કસ કારણ જાણવા તપાસ શરૂ કરવામાં આવી છે. જો ફેક્ટરી ગેરકાયદેસર રીતે ચાલતી હોવાનું સામે આવશે તો જવાબદારો સામે કાયદેસરની કાર્યવાહી કરવામાં આવશે.
