Mehsana News: મહેસાણા મહાનગરપાલિકાની સિટી બસ સેવાને લઈને ગંભીર પ્રશ્નો ઊભા થયા છે. GSRTCની જરૂરી NOC વગર મહાનગરપાલિકા દ્વારા વધારાના રૂટ પર સિટી બસો (Mehsana City Bus) દોડાવવામાં આવી રહી હોવાનો આક્ષેપ થયો છે. આ મામલે ગુજરાત રાજ્ય માર્ગ વાહન વ્યવહાર નિગમ (GSRTC) અને મહેસાણા મહાનગરપાલિકા વચ્ચે વિવાદ સર્જાયો છે. મળતી માહિતી મુજબ, શહેરમાં હાલમાં 15 રૂટ પર આશરે 25 સિટી બસો દોડી રહી છે. GSRTC દ્વારા મનપાને આ અંગે લેખિત ખુલાસો આપવા માટે પત્ર પાઠવવામાં આવ્યો હોવાનું જણાવાયું છે.
2021માં શરૂ થઈ હતી સિટી બસ સેવા
મહેસાણા શહેરમાં ઓગસ્ટ 2021થી સિટી બસ (Mehsana City Bus) સેવા શરૂ કરવામાં આવી હતી. શરૂઆતના તબક્કે મહેસાણા નગરપાલિકા દ્વારા માત્ર 8 રૂટ માટે જરૂરી NOC લેવામાં આવી હતી. ત્યારબાદ મહેસાણા નગરપાલિકાને મહાનગરપાલિકાનો દરજ્જો મળ્યો અને શહેરની હદમાં વધારો થયો. મુસાફરોની જરૂરિયાતને ધ્યાનમાં રાખીને સિટી બસ (Mehsana City Bus)ના રૂટની સંખ્યા વધારીને 15 કરવામાં આવી હતી.
Mehsana City Bus: 8ના બદલે 15 રૂટ પર બસ સેવા
આક્ષેપ મુજબ, વધારાના રૂટ શરૂ કરતાં પહેલાં જરૂરી મંજૂરી અથવા NOC મેળવવામાં આવી ન હતી. પરિણામે હાલ 15 રૂટ પર આશરે 25 સિટી બસો (Mehsana City Bus) દોડી રહી છે. GSRTCના જણાવ્યા પ્રમાણે, નિયમ મુજબ નવા રૂટ માટે સંબંધિત વિભાગની મંજૂરી મેળવવાની પ્રક્રિયા જરૂરી છે. આ મંજૂરી અંગેનો મુદ્દો સામે આવ્યા બાદ હવે સમગ્ર મામલો ચર્ચામાં આવ્યો છે.
GSRTCએ મનપાને પત્ર લખી ખુલાસો માંગ્યો
આ મામલે GSRTCના અધિકારી હેતલ પટેલે જણાવ્યું હોવાનું સામે આવ્યું છે કે સિટી બસના વધારાના રૂટ અંગેની બાબત નિગમના ધ્યાને આવ્યા બાદ મહાનગરપાલિકાને લેખિત પત્ર પાઠવી ખુલાસો માંગવામાં આવ્યો હતો. GSRTC તરફથી વારંવાર રજૂઆતો કરવામાં આવી હોવા છતાં વધારાના રૂટ માટે NOC લેવામાં આવી ન હોવાનું જણાવાયું છે. જોકે, વિદ્યાર્થીઓ અને સામાન્ય મુસાફરોને હાલ મુશ્કેલી ન પડે તે ધ્યાનમાં રાખીને સિટી બસ સેવા ચાલુ રાખવામાં આવી હોવાનું GSRTC તરફથી જણાવાયું છે.
બસ સેવા બંધ થવાની ભીતિ
જો NOC અને જરૂરી મંજૂરીનો મુદ્દો ઉકેલાશે નહીં તો આગામી સમયમાં સિટી બસ સેવા બંધ કરવાની સ્થિતિ ઊભી થઈ શકે છે. જો આવું થાય તો શહેરના વિવિધ વિસ્તારોમાં અવરજવર કરતા વિદ્યાર્થીઓ, નોકરીયાતો અને સામાન્ય મુસાફરોને મુશ્કેલીનો સામનો કરવો પડી શકે છે. હાલ સેવા ચાલુ હોવાથી તાત્કાલિક મુસાફરોને રાહત છે, પરંતુ મંજૂરીનો પ્રશ્ન ઉકેલવો બંને વિભાગો માટે મહત્વપૂર્ણ બન્યો છે.
ડ્રાઇવરોની તાલીમ અંગે પણ સવાલ
NOCના મુદ્દા સાથે સિટી બસના ડ્રાઇવરોની તાલીમ અંગે પણ સવાલો ઊભા થયા છે. બસો ચલાવતા ડ્રાઇવરો યોગ્ય રીતે તાલીમબદ્ધ છે કે નહીં અને તમામ જરૂરી નિયમોનું પાલન થાય છે કે નહીં તેની ચકાસણી અંગે પણ ચર્ચા થઈ રહી છે. ભવિષ્યમાં કોઈ અકસ્માત કે ગંભીર ઘટના બને તો તેની જવાબદારી કોની રહેશે તે મુદ્દો પણ હવે મહત્વનો બની ગયો છે.
મુસાફરોની સુરક્ષા અને નિયમોનું પાલન જરૂરી
સિટી બસ (Mehsana City Bus) સેવા શહેરના જાહેર પરિવહન માટે મહત્વપૂર્ણ છે. એક તરફ મોટી સંખ્યામાં મુસાફરોને પરિવહનની સુવિધા મળી રહી છે, તો બીજી તરફ જરૂરી NOC અને મંજૂરી અંગે ઊભા થયેલા પ્રશ્નોનું નિરાકરણ આવવું જરૂરી છે. હવે મહેસાણા મહાનગરપાલિકા તરફથી GSRTCના પત્રનો શું જવાબ આપવામાં આવે છે અને વધારાના રૂટ માટે જરૂરી મંજૂરી ક્યારે લેવામાં આવે છે તેના પર સૌની નજર છે.
આ પણ વાંચો:8,000થી વધુ GSRTC બસોમાં QR કોડ આધારિત ફીડબેક સિસ્ટમ અમલમાં; મુસાફરો તરફથી ઉત્તમ પ્રતિસાદ
આ પણ વાંચો:ગુજરાતમાં વરસાદી વિરામ વચ્ચે આફત: પંચમહાલમાં વીજળી પડતાં 65 વર્ષીય મહિલાનું મોત
