જેડીયુ અને ભાજપે 2020ની બિહાર વિધાનસભા ચૂંટણી સાથે મળીને લડી હતી. ભાજપે ઓછી સીટો મેળવીને પણ નીતિશ કુમારને સીએમ બનાવ્યા, ત્યારથી બંને પક્ષો વચ્ચે બોલાચાલી ચાલી રહી હતી. બંને પક્ષોના નેતાઓ પણ ઘણા મુદ્દાઓ પર અલગ-અલગ નિવેદન આપતા જોવા મળ્યા હતા. પરંતુ હવે નીતીશે રાજીનામું આપી દીધું છે, તેઓ NDAથી અલગ થઈ ગયા છે.નીતિશ કુમાર અને તેજસ્વી યાદવે બિહારના રાજ્યપાલ ફાગુ ચૌહાણ સાથે મુલાકાત કરીને સરકાર બનાવવાનો દાવો કર્યો છે. તેમણે 164 ધારાસભ્યોને સમર્થનનો પત્ર સોંપ્યો છે. નવી સરકારનો શપથ ગ્રહણ સમારોહ કાલે યોજાશે,બનેંના 14-14 ધારાસભ્યોને મંત્રીમંડળમાં સમાવેશ કરવામાં આવશે.
જ્યારે નીતિશ રાજીનામું આપવા માટે રાજ્યપાલ પાસે આવ્યા હતા, ત્યારે તેમણે મીડિયાને કહ્યું હતું કે પાર્ટીના તમામ લોકોની ઈચ્છા છે કે તેઓ ભાજપથી અલગ થઈ જાય. તેમણે કહ્યું કે ધારાસભ્યો અને સાંસદોની સહમતિ બાદ ગઠબંધન તોડવાનો નિર્ણય લેવામાં આવ્યો છે. ગઠબંધન તૂટવા પર તેમણે કહ્યું હતું કે ભાજપ સાથે તેમની એક નહીં પરંતુ ઘણી સમસ્યાઓ છે.
તેમના નેતાઓ તમામ સમસ્યાઓને વિગતવાર સમજાવશે. ભાજપે હંમેશા મારું અપમાન કર્યું છે જેડીયુ વિધાયક દળની બેઠક બાદ નીતિશ કુમારે ભાજપ પર આરોપ લગાવતા કહ્યું કે ભાજપે હંમેશા અમને અપમાનિત કર્યા છે. 2019માં પણ મંત્રી બનાવવાનું આશ્વાસન અપાયું હતું, પરંતુ રજૂઆત મળી ન હતી. નીતિશે કહ્યું કે આરસીપી સિંહ દ્વારા જેડીયુને નબળો પાડવાનો પ્રયાસ કરવામાં આવ્યો હતો. 2020ની ચૂંટણીમાં ચિરાગ પાસવાન દ્વારા અમને નબળા પાડવાનો પ્રયાસ કરવામાં આવ્યો હતો. અમારા ધારાસભ્યોને તોડવાનું ષડયંત્ર હતું અમને ખતમ કરવાનું કાવતરું ઘડવામાં આવ્યું હતું. પાર્ટીને એક રાખવાનું મુશ્કેલ હતું, તેથી અમે ભાજપ સાથેના સંબંધો તોડી નાખ્યા.
