શિવસેનાના સાંસદ સંજય રાઉતે MNS ચીફ રાજ ઠાકરેની અયોધ્યા મુલાકાત પર કટાક્ષ કર્યો છે. સંજય રાઉતે કહ્યું કે, જે લોકો રાજકીય કારણોસર અને ખોટી માન્યતાઓ સાથે આવે છે તેમને ભગવાન રામ આશીર્વાદ આપતા નથી. રાજ ઠાકરે 5 જૂને રામ લલ્લાના દર્શન કરવા અયોધ્યા જશે. નોંધનીય છે કે, ગયા મહિને રાજ ઠાકરેએ મસ્જિદોમાં લાઉડસ્પીકરના ઉપયોગ પર સવાલ ઉઠાવ્યા હતા અને તેને રાષ્ટ્રીય મુદ્દો બનાવ્યો હતો. આ દરમિયાન રાજ ઠાકરેએ કહ્યું હતું કે, તેઓ રામ લલ્લાના દર્શન કરવા 5 જૂને અયોધ્યા જશે.
રાજ ઠાકરે બાદ આદિત્ય ઠાકરે પણ અયોધ્યા પહોંચશે
રાજ ઠાકરેના અયોધ્યા જવાની જાહેરાતની સાથે જ મહારાષ્ટ્રના પ્રવાસન મંત્રી અને સીએમ ઉદ્ધવ ઠાકરેના પુત્ર આદિત્ય ઠાકરેએ પણ અયોધ્યા જવાની જાહેરાત કરી હતી. સંજય રાઉતના મતે આદિત્ય ઠાકરે 10 જૂનની આસપાસ અયોધ્યા જઈ શકે છે. સંજય રાઉતના જણાવ્યા અનુસાર મહારાષ્ટ્ર સિવાય દેશભરમાંથી અનેક શિવસૈનિકો પણ આદિત્ય ઠાકરે સાથે અયોધ્યા જશે.
આદિત્ય ઠાકરેની અયોધ્યા મુલાકાતને લઈને સંજય રાઉતે કહ્યું કે, અયોધ્યાની મુલાકાત અમારા માટે રાજકીય નહીં પણ આસ્થાનો મામલો છે. તેમણે કહ્યું કે, આદિત્ય ઠાકરેને સમાજના ઘણા વર્ગો તરફથી અયોધ્યા આવવા અને વિશ્વને હિન્દુત્વનો સાચો અર્થ જણાવવાનું આમંત્રણ મળ્યું છે.
ભગવાન રામ ખોટી શ્રદ્ધા સાથે આવનારને આશીર્વાદ આપતા નથી
આ દરમિયાન, રાજ ઠાકરેની અયોધ્યા મુલાકાતને લઈને સંજય રાઉતે કહ્યું, ભગવાન રામ એવા લોકોને આશીર્વાદ નથી આપતા જેઓ નકલી ભાવના સાથે તેમની રાજનીતિ કરવા માટે તેમના દરબારમાં આવે છે. આવા લોકોનો વિરોધ થવાનો જ છે.
ભાજપ સાંસદનો રાજ ઠાકરેને પડકાર
બીજી તરફ બીજેપી સાંસદ બ્રિજભૂષણ શરણ સિંહે રાજ ઠાકરેની અયોધ્યા મુલાકાતનો વિરોધ કરતા કહ્યું છે કે, તેઓ જ્યાં સુધી રાજ ઠાકરે તેમના કૃત્ય માટે ઉત્તર ભારતીયોની માફી નહીં માંગે ત્યાં સુધી તેઓને અયોધ્યામાં પ્રવેશવા દેશે નહીં. બ્રિજભૂષણ શરણ સિંહે પણ સીએમ યોગી આદિત્યનાથને જ્યાં સુધી રાજ ઠાકરે ઉત્તર ભારતીયોની માફી ન માંગે ત્યાં સુધી તેમને ન મળવાની અપીલ કરી હતી.
આ પણ વાંચો: સરકારના આ પ્રોજેક્ટથી 114 ગામોને મળશે ફાયદો, પ્રોજેક્ટનું નિરીક્ષણ કરવા પહોંચ્યા CM યોગી
આ પણ વાંચો:વલસાડના છેવાડાના આદિવાસીઓને સરકારી ઓળખપત્ર મેળવવામાં મુશ્કેલી
