ભારતીય ક્રિકેટ ટીમના કેપ્ટન રોહિત શર્મા હજુ સુધી ઈંગ્લેન્ડ સામેની પાંચમી ટેસ્ટમાંથી બહાર થઈ શક્યા નથી. ટીમ ઈન્ડિયાના મુખ્ય કોચ રાહુલ દ્રવિડે આ વાતની પુષ્ટિ કરી છે.
અગાઉ, ઘણા અહેવાલોમાં દાવો કરવામાં આવ્યો હતો કે રોહિત એજબેસ્ટનમાં રમાનારી પાંચમી ટેસ્ટમાંથી બહાર થઈ ગયા છે. તેમની જગ્યાએ ઝડપી બોલર જસપ્રીત બુમરાહને કેપ્ટન બનાવવામાં આવ્યા છે. પરંતુ દ્રવિડે આ તમામ અહેવાલોને ફગાવી દીધા હતા.
રાહુલ દ્રવિડે પ્રેસ કોન્ફરન્સમાં કહ્યું, “અમારી મેડિકલ ટીમ દ્વારા રોહિત શર્મા પર નજર રાખવામાં આવી રહી છે. તે ટેસ્ટ મેચમાંથી બહાર નથી થયો. તેમનો આરટી પીસીઆર ટેસ્ટ આજે અને પછી આવતી કાલે કરવામાં આવશે. અમારી પાસે રમવા માટે 36 કલાક છે, હજુ પણ સમય છે.
નોંધનીય છે કે રોહિત શર્મા કોવિડ પોઝિટિવ છે અને હાલમાં આઈસોલેશનમાં છે. ટીમ ઈન્ડિયાએ આજે એજબેસ્ટન ખાતે પ્રેક્ટિસ શરૂ કરી હતી, પરંતુ કેપ્ટન રોહિતે તેમાં ભાગ લીધો ન હતો. આ ટેસ્ટ વર્ષ 2021 માં કોરોના વાયરસને કારણે રદ કરવામાં આવી હતી. હાલમાં ટીમ ઈન્ડિયા શ્રેણીમાં 2-1થી આગળ છે. પરંતુ તાજેતરમાં ન્યુઝીલેન્ડ સામેની ક્લીન સ્વીપ બાદ ઈંગ્લેન્ડનો ઉત્સાહ ઉંચો છે.
ભારતીય ટીમ કોઈપણ ભોગે શ્રેણીની છેલ્લી ટેસ્ટ જીતવા માંગે છે. આવી સ્થિતિમાં ટીમના તમામ ખેલાડીઓ મહેનત કરી રહ્યા છે. ભારતીય ટીમના વિકેટ કીપર બેટ્સમેન ઋષભ પંતે પણ તેની ઈન્સ્ટાગ્રામ સ્ટોરી પર એક ફોટો શેર કર્યો છે. આ ફોટોમાં જોઈ શકાય છે કે ભારતીય ખેલાડીઓ મેદાનમાં છે. જયારે ભારતીય ટીમની પ્રેક્ટિસના કેટલાક વીડિયો પણ સોશિયલ મીડિયા પર વાયરલ થઈ રહ્યા છે. આ વીડિયોમાં રોહિત શર્મા દેખાતો નથી. રોહિત શર્માનો રિપોર્ટ કોરોના પોઝિટિવ આવ્યો હતો, ત્યારથી તે આઈસોલેશનમાં છે.
