ઓનલાઈન ફૂડ ઓર્ડર મામલે ચોંકાવનારો કિસ્સો, ઓનલાઈન ઓર્ડર કરાયેલ કેક ખાવાથી 10 વર્ષની બાળકીનું થયું મોત

પંજાબ : ઓનલાઈન ફૂડ ઓર્ડર મામલે ચોંકાવનારો કિસ્સો સામે આવ્યો છે. ઓનલાઈન ઓર્ડર કરાયેલ કેક ખાવાથી 10 વર્ષની બાળકીનું થયું મોત થવાનો મામલો સામે આવતા સમગ્ર વિસ્તારમાં હડકંપ મચ્યો છે.

પંજાબના પટિયાલામાં ઓનલાઈન ઓર્ડર કરાયેલ કેક ખાવાથી 10 વર્ષની બાળકીના મોતનો મામલો જટિલ બની રહ્યો છે. ઓનલાઈન ફૂડ ઓર્ડર કરવાની ઘટના 24 માર્ચે બનવા પામી હતી. છતાં આ ઘટનામાં હજુ સુધી એ જાણી શકાયું નથી કે બર્થડે કેકમાં એવું શું હતું કે તે ખાવાથી બાળકીનું મોત થયું હતું. હવે મૃતક બાળકી માનવીના દાદા હરબન લાલે પોલીસ પ્રશાસન પર બેદરકારીનો આરોપ લગાવ્યો છે. દાદાએ આરોગ્ય વિભાગ પર બેદરકારીથી કામ કરવાનો આરોપ પણ લગાવ્યો છે. એટલું જ નહીં ડિલિવરી શોપના એડ્રેસને લઈને પણ મામલો અટવાઈ ગયો છે. પટિયાલા પોલીસે આ કેસમાં 4 લોકોની ઓળખ કરી છે અને તેમાંથી 3ની ધરપકડ કરી છે. ચારેયની ઓળખ ગ્રીન વ્યૂ કોલોનીના ગુરમીત સિંહ, રણજીત, પવન મિશ્રા અને વિજય કુમાર તરીકે થઈ છે. પોલીસે તેની સામે આઈપીસીની કલમ 304 હેઠળ કેસ નોંધ્યો છે.

પીડિતાના પરિવારનો આરોપ છે કે ઓનલાઈન ફૂડ ઓર્ડર કરવાના કેસમાં એફઆઈઆર પણ બાળકીના મૃત્યુના 5 દિવસ પછી નોંધવામાં આવી હતી. પરિવારે એમ પણ કહ્યું છે કે આરોગ્ય વિભાગે તેમને કોઈ મદદ કરી નથી.

માનવીએ 24 માર્ચે તેનો જન્મદિવસ ઉજવ્યો હતો અને તેનો પરિવાર સૂઈ ગયો તેના કલાકો પછી તેનું મૃત્યુ થયું હતું. પરિવારજનોએ જણાવ્યું કે કેક ખાધા બાદ બાળકીને ઉલ્ટી થઈ હતી અને તેના મૃત્યુ પહેલા પણ તેને શ્વાસ લેવામાં તકલીફ થઈ રહી હતી. કેક ખાનારા પરિવારના અન્ય સભ્યો પણ બીમાર પડ્યા હતા.

પરિવારનું કહેવું છે કે આ ઘટનાને સ્થાનિક મીડિયાએ ઉઠાવી હતી, ત્યારપછી આ મુદ્દો દરેક જગ્યાએ ચર્ચામાં આવ્યો હતો. દાદાએ એનડીટીવીને જણાવ્યું કે આરોગ્ય વિભાગની તકેદારીનો અભાવ હેરાન કરે છે. દાદાએ કહ્યું, “આરોગ્ય વિભાગના અધિકારીએ અમે મંગાવેલી કેકના નમૂના લેવાનો ઇનકાર કર્યો હતો. એટલે કે જે ખાવાથી યુવતીનું મોત થયું હતું. અમને અધિકારી દ્વારા ભારપૂર્વક કહેવામાં આવ્યું હતું કે તેઓ કેકનો નમૂનો માત્ર દુકાનમાંથી જ લેશે…બેકરી જ્યાં કેક બનાવવામાં આવી હતી.

24 માર્ચે સાંજે 6 વાગે છોકરી માનવીની માતાએ પટિયાલાની કાન્હા ફર્મમાંથી કેક ઓનલાઈન મંગાવી હતી. માનવીના મૃત્યુ પછી, જ્યારે પરિવારના સભ્યોએ કેક મોકલનાર કાન્હા ફર્મ સામે ફરિયાદ કરી, ત્યારે તપાસમાં જાણવા મળ્યું કે આપેલા સરનામે કેકની કોઈ દુકાન નથી. સરનામે કાન્હા ફર્મ નામની કોઈ બેકરીની દુકાન ન હતી. આ પછી, છોકરીના પરિવારે આઈડી બદલ્યો અને 30 માર્ચે ફરીથી તે જ કાન્હા ફર્મમાંથી Zomato દ્વારા કેકનો ઓર્ડર આપ્યો. જ્યારે ડિલિવરી એજન્ટ કેકની ડિલિવરી કરવા પહોંચ્યો ત્યારે પરિવારના સભ્યોએ તેને પકડી લીધો અને પછી દુકાનનું સરનામું જાણ્યું.

પરિવાર અને પોલીસ ડિલિવરી એજન્ટ સાથે કેક મોકલનાર દુકાન પર પહોંચ્યા ત્યારે તેમને જાણવા મળ્યું કે કાન્હા પેઢી નકલી હતી અને કેક ‘ન્યૂ ઈન્ડિયા બેકરી’માંથી મોકલવામાં આવી હતી. પોલીસના જણાવ્યા અનુસાર, ન્યૂ ઈન્ડિયા બેકરીના માલિકે ઝોમેટો પર કાન્હા ફર્મ નામની બીજી બેકરીની નોંધણી કરાવી હતી. પટિયાલાના પોલીસ અધિક્ષક સરફરાઝ આલમે જણાવ્યું હતું કે, “અમે ક્લાઉડ કિચનના આ ખ્યાલની પણ તપાસ કરી રહ્યા છીએ કારણ કે ઝોમેટો પર બેકરીનું નામ બદલાતું રહે છે.”

આરોગ્ય અધિકારીએ જણાવ્યું કે છોકરીનો પરિવાર ગુરુવારે તેમને મળ્યો હતો. “મેં તેમને પોલીસ અને આરોગ્ય વિભાગમાં ઔપચારિક ફરિયાદ નોંધાવવા કહ્યું. ફૂડ ટીમોને ઘરની મુલાકાત લેવા અને કેકના નમૂના લેવા માટે નિર્દેશિત કરવામાં આવ્યા હતા,” અધિકારીએ જણાવ્યું હતું, સમાચાર એજન્સી પીટીઆઈએ અહેવાલ આપ્યો હતો.