ભૂતપૂર્વ અનુભવી બેટ્સમેન રાહુલ દ્રવિડને ન્યૂઝીલેન્ડ ક્રિકેટ ટીમ સામેની હોમ સીરીઝ માટે ટીમ ઈન્ડિયાનાં વચગાળાનાં કોચ તરીકે નિયુક્ત કરી શકાય છે. BCCI આ બાબતે તેમને એપ્રોચ કરશે. મુખ્ય કોચ રવિ શાસ્ત્રી સહિત કોર સપોર્ટ સ્ટાફનો કાર્યકાળ T20 વર્લ્ડકપ પછી સમાપ્ત થશે અને તે પછી તુરંત જ ન્યૂઝીલેન્ડને ભારતનો પ્રવાસ કરવાનો છે. તેથી રાહુલ દ્રવિડને વચગાળાનાં કોચ તરીકે નિયુક્ત કરી શકાય છે.
આ પણ વાંચો – IPL / રોમાંચક મેચમાં કોલકાતાએ દિલ્હીને ત્રણ વિકેટથી હરાવીને ફાઇનલમાં પહોચ્યું
જાણવા મળ્યું છે કે, કેટલાક ઓસ્ટ્રેલિયન કોચે આ કામ માટે રસ દાખવ્યો છે, પરંતુ BCCI આ માટે ઉત્સુક નથી કારણ કે તેઓ આ ભૂમિકા માટે ભારતીય પર ધ્યાન કેન્દ્રિત કરી રહ્યા છે. એવી પણ વાત હતી કે ટોમ મૂડી પણ ભારતીય ટીમને કોચિંગ આપવા આતુર છે. જો કે, શાસ્ત્રીનાં કાર્યકાળ દરમિયાન BCCI એ સારા પરિણામો જોયા છે અને કોઈ વિદેશી કોચની જરૂર દેખાઇ રહી નથી. તેથી BCCI દ્રવિડને ભારતીય ટીમનાં પૂર્ણકાલીન કોચ બનાવવા ઈચ્છે છે, પરંતુ તેણે આ વિશે ના કહી દીધી છે, કારણ કે તે વધુ પ્રવાસ કરવા માંગતો નથી. દ્રવિડ બેંગલુરુમાં નેશનલ ક્રિકેટ એકેડમીનો હવાલો સંભાળે છે. ભારતીય બોર્ડે બાદમાં થોડા વધુ કોચનો સંપર્ક કર્યો પરંતુ હજુ સુધી તેમને સકારાત્મક પ્રતિસાદ મળ્યો નથી. BCCI એ કોચ માટે સત્તાવાર રીતે કોઈ જાહેરાત આપી નથી, પરંતુ તે ટીમમાં ફિટ થઈ શકે તેવા ઉમેદવારની શોધમાં છે. ભારતીય ક્રિકેટ બોર્ડ જાહેરાત પોસ્ટ કરતા પહેલા સંભવિત ઉમેદવારોની ઉપલબ્ધતા શોધવાનો પ્રયાસ કરી રહ્યું છે. BCCI નાં એક અધિકારીએ જાહેરાતમાં વિલંબનું કારણ સમજાવ્યું, “અમે ઇચ્છતા હતા કે જે ઉમેદવાર અમને નોકરી માટે સૌથી યોગ્ય લાગે તે પહેલા કામ કરવા માટે સંમત થાય. અમે એવી પરિસ્થિતિ નથી ઈચ્છતા કે જ્યાં અમને અરજીઓ મળે પરંતુ કોઈ એક આદર્શ ઉમેદવાર ન હોય. તે બોર્ડ અને ઉમેદવારો માટે પણ શરમજનક હશે. તેથી પહેલા યોગ્ય ઉમેદવાર શોધવો વધુ સારું છે, ત્યાં સુધી દ્રવિડ વચગાળાનાં કોચ બની શકે છે.”
આ પણ વાંચો – IPL 2021 / દિનેશ કાર્તિકને IPL આચારસંહિતાનાં ભંગ કરવા બદલ ફટકારવામાં આવ્યો દંડ
બોર્ડે શરૂઆતમાં ન્યૂઝીલેન્ડ સીરીઝ સુધી શાસ્ત્રીને ચાલુ રાખવાની શક્યતા પર વિચાર કર્યો હતો, પરંતુ તેમણે પોતાનો વિચાર બદલી નાખ્યો છે. જ્યારે મુખ્ય ટીમ ઈંગ્લેન્ડમાં રમી રહી હતી ત્યારે દ્રવિડે શ્રીલંકામાં બીજી લાઇનની ભારતીય ટીમને કોચિંગ આપ્યું હતું. ભારતને T20 વર્લ્ડકપ બાદ તુરંત જ ન્યૂઝીલેન્ડ સામે બે ટેસ્ટ અને ત્રણ T20 મેચ રમવાની છે. શાસ્ત્રી, બોલિંગ કોચ ભરત અરુણ અને ફિલ્ડિંગ કોચ આર શ્રીધરનો કાર્યકાળ T20 વર્લ્ડકપ બાદ સમાપ્ત થાય છે. ભારતીય ટીમનાં ટ્રેનર નિક વેબ પણ T20 વર્લ્ડકપ બાદ નિવૃત્ત થશે.
