દક્ષિણ આફ્રિકા અને ઓસ્ટ્રેલિયા વચ્ચે રમાઈ રહેલી 5 મેચની ODI શ્રેણીની છેલ્લી મેચ 122 રને આફ્રિકાએ જીતી લીધી અને શ્રેણી 3-2થી જીતવામાં સફળ રહી. છેલ્લી ODIમાં દક્ષિણ આફ્રિકાની ટીમે પ્રથમ બેટિંગ કરતા એડન માર્કરમની 93 રનની ઇનિંગના આધારે 50 ઓવરમાં 9 વિકેટના નુકસાન પર 315 રન બનાવ્યા હતા. આ પછી ટાર્ગેટનો પીછો કરતી વખતે ઓસ્ટ્રેલિયાની ટીમ માત્ર 193 રનમાં જ સમેટાઈ ગઈ હતી. દક્ષિણ આફ્રિકા તરફથી બોલિંગમાં માર્કો જેન્સને સૌથી વધુ 5 વિકેટ લીધી હતી.
દક્ષિણ આફ્રિકા સામે 316 રનના લક્ષ્યનો પીછો કરવા આવેલી ઓસ્ટ્રેલિયન ટીમની શરૂઆત ખૂબ જ ખરાબ રહી હતી. ટીમે 34ના સ્કોર પર ડેવિડ વોર્નર અને જોશ ઈંગ્લિશની વિકેટ ગુમાવી દીધી હતી. અહીંથી કેપ્ટન મિચેલ માર્શ અને માર્નસ લાબુશેન વચ્ચે ત્રીજી વિકેટ માટે 90 રનની ભાગીદારી જોવા મળી હતી. જ્યારે ઓસ્ટ્રેલિયાને 124ના સ્કોર પર માર્શના રૂપમાં ત્રીજો ઝટકો લાગ્યો હતો, ત્યારે ટીમ નિયમિત અંતરે વિકેટો ગુમાવતી રહી હતી. માર્શ 71 રનના વ્યક્તિગત સ્કોર પર પેવેલિયન પરત ફર્યો હતો.
માર્નસ લાબુશેન પણ 44 રન બનાવી માર્કો જેન્સેનનો શિકાર બન્યો હતો. આ મેચમાં ઓસ્ટ્રેલિયાની ટીમનો દાવ 34.1 ઓવર સુધી મર્યાદિત હતો. આ મેચમાં કાંગારૂ ટીમના છ બેટ્સમેન બે આંકડા સુધી પણ પહોંચી શક્યા ન હતા. માર્કો જેન્સને પોતાની 8 ઓવરમાં 39 રન આપીને અડધી ઓસ્ટ્રેલિયન ટીમને પોતાનો શિકાર બનાવી હતી. સ્પિન બોલર કેશવ મહારાજે પણ 9.1 ઓવરમાં 33 રન આપીને 4 વિકેટ ઝડપી હતી.
જો આ મેચમાં સાઉથ આફ્રિકન ટીમના બેટિંગ પ્રદર્શનની વાત કરીએ તો એડન માર્કરામે 87 બોલમાં 93 રનની ઇનિંગ રમી હતી અને ડેવિડ મિલરે 65 બોલમાં 63 રનની ઇનિંગ રમીને ટીમને મોટા સ્કોર તરફ દોરી હતી. બંને વચ્ચે પાંચમી વિકેટ માટે 109 રનની મહત્વપૂર્ણ ભાગીદારી પણ જોવા મળી હતી.આફ્રિકન ટીમ માટે નીચેના ક્રમમાં માર્કો જાનસેને પણ બેટથી પોતાની તાકાત બતાવી હતી અને 23 બોલમાં 4 ચોગ્ગા અને 3 છગ્ગાની મદદથી 47 રનની મહત્વપૂર્ણ ઇનિંગ રમી હતી. આ સિવાય એન્ડીલે ફેલુકવાયોએ પણ 19 બોલમાં અણનમ 39 રન બનાવ્યા છે. ઓસ્ટ્રેલિયા તરફથી આ મેચમાં એડમ ઝમ્પાએ 3 અને સીન એબોટે 2 વિકેટ ઝડપી હતી.
