ટાટા ગ્રુપ ઇલેક્ટ્રિક બેટરીના ક્ષેત્રમાં વિશ્વની સૌથી મોટી શક્તિ તરીકે ઉભરી આવવાની તૈયારી કરી રહ્યું છે. આ માટે કંપનીએ 4 અરબ ડોલરના જંગી રોકાણની જાહેરાત કરી છે. ટાટા જૂથ આ રોકાણ સાથે મેગા ફેક્ટરી સ્થાપવા જઈ રહ્યું છે. પરંતુ આપને જણાવી દઈએ કે આ ફેક્ટરી ભારતમાં નહીં પરંતુ યુરોપમાં લગાવવામાં આવી રહી છે. ટાટા ગ્રુપે જાહેરાત કરી છે કે તેણે આ ગીગાફેક્ટરી માટે ઈંગ્લેન્ડમાં સમરસેટના બ્રિજવોટર વિસ્તારને પસંદ કર્યો છે. અગાઉ આ ફેક્ટરી સ્પેનમાં સ્થાપવાની યોજના હતી.
યુરોપમાં સૌથી મોટી હશે ગીગાફેક્ટરી
આ રોકાણની જાહેરાત કરતાં ટાટા જૂથે જણાવ્યું હતું કે આ ગીગાફેક્ટરી જગુઆર લેન્ડ રોવર (JLR) તેમજ અન્ય વાહન કંપનીઓ માટે બેટરીનું ઉત્પાદન કરશે. તેને બનાવવામાં ચાર અબજ પાઉન્ડ (રૂ. 42,500 કરોડ) ખર્ચ થશે. આપને જણાવી દઈએ કે બ્રિટિશ લક્ઝરી કાર નિર્માતા કંપની જગુઆર લેન્ડ રોવરની માલિકી ‘ટાટા મોટર્સ’ની છે. નિવેદન અનુસાર 40 GWh ની ગીગાફેક્ટરી યુરોપમાં સૌથી મોટી અને ટાટાની ભારત બહારની પ્રથમ ફેક્ટરી હશે.
બ્રિટન પાસેથી સરકારી મદદ માંગવામાં આવી
એવી અટકળો છે કે ટાટાએ યુકે સરકારની સહાયમાં £500 મિલિયનની માંગ કરી છે, જેમાં સમરસેટ ફેક્ટરીના ઉચ્ચ-ઉર્જા ઉપયોગ માટે સબસિડી, વ્હીકલ ટ્રાન્સફોર્મેશન ફંડમાંથી એક વખતની ગ્રાન્ટ અને સાઇટ પર રસ્તા સુધારણાનો સમાવેશ થાય છે. યુકે સરકારે જણાવ્યું છે કે નિયમિત પારદર્શિતાના ડેટાના ભાગરૂપે ટાટા સન્સને સરકારી સહાયની વિગતો સમયસર જાહેર કરવામાં આવશે.
સૌથી વધુ રોકાણ બ્રિટનમાં થશે
યુકેમાં, નિસાનની સન્ડરલેન્ડ ફેક્ટરી પાસે હાલમાં માત્ર એક પ્લાન્ટ કાર્યરત છે, અને નોર્થમ્બરલેન્ડમાં બીજા પ્લાન્ટની નિષ્ફળતા પછી ફરીથી કામ કરવામાં આવી રહ્યું છે. તેનાથી વિપરીત, યુરોપિયન યુનિયન પાસે 35 પ્લાન્ટ કાર્યરત છે, બાંધકામ હેઠળ છે અથવા આયોજનના તબક્કામાં છે. ટાટા સન્સના ચેરમેન નટરાજન ચંદ્રશેકરને જણાવ્યું હતું કે, “ટાટા જૂથ અમારા તમામ વ્યવસાયોના ટકાઉ ભવિષ્ય માટે પ્રતિબદ્ધ છે. આજે મને એ જાહેરાત કરતાં આનંદ થાય છે કે જૂથ યુકેમાં યુરોપની સૌથી મોટી બેટરી સેલ મેન્યુફેક્ચરિંગ સુવિધાઓમાંની એકની સ્થાપના કરશે.”
બ્રિટનમાં હજારો નોકરીઓ ઉપલબ્ધ થશે
યુકેના વડાપ્રધાન ઋષિ સુનકે આ જાહેરાત પર જણાવ્યું હતું કે, “ભારતની બહાર તેનો પ્રથમ અને યુરોપનો સૌથી મોટો પ્લાન્ટ સ્થાપવાનો ટાટા જૂથનો નિર્ણય યુકેમાં જે વિશ્વાસ ધરાવે છે તે દર્શાવે છે. યુકેના વાહન ઉદ્યોગમાં આ સૌથી મોટા રોકાણોમાંનું એક હશે. તે સમગ્ર દેશમાં બ્રિટિશરો માટે હજારો નોકરીઓનું સર્જન કરશે એટલું જ નહીં, પરંતુ તે ઇલેક્ટ્રિક વાહનોના વૈશ્વિક સંક્રમણમાં અમારી આગેવાનીને મજબૂત કરશે, જે ભવિષ્યના સ્વચ્છ ઉદ્યોગો અમારી અર્થવ્યવસ્થાના વિકાસમાં મદદ કરશે.” યુકે સરકારે એક અલગ નિવેદનમાં જણાવ્યું હતું કે રોકાણ સીધા 4,000 નોકરીઓનું સર્જન કરશે. આ ઉપરાંત આડકતરી રીતે હજારો નોકરીઓ પણ ઉપલબ્ધ થશે.
આ પણ વાંચો:હિંડનબર્ગ રિપોર્ટ જાણીજોઈને અમારી પ્રતિષ્ઠાને નુકસાન પહોંચાડવાનો પ્રયાસઃ અદાણી
આ પણ વાંચો:નિફ્ટીએ રચ્યો ઈતિહાસ, પહેલીવાર આ સ્તરને પાર, સેન્સેક્સે પણ તોડ્યો રેકોર્ડ
આ પણ વાંચો:31 જુલાઇ પહેલા ટેક્સ પેયર્સ માટે નાણામંત્રીની મોટી જાહેરાત, સાંભળીને મધ્યમ વર્ગને રાહત
આ પણ વાંચો:પાન કાર્ડ બંધ હોવા છતાં આ વસ્તુઓ માટે કરી શકાય છે ટ્રાન્ઝેક્શન, જાણો સંપૂર્ણ વિગતો
