તમે રોજિંદા વપરાશ માટે સરેરાશ 50 રૂપિયા પ્રતિ લિટરના ભાવે દૂધ ખરીદતા હશો પરંતુ શું તમે ક્યારેય વિચાર્યું છે કે દૂધની કિંમત હજારો રૂપિયા પ્રતિ લિટર હોઈ શકે છે? હા આ વાત સાચી છે. મહારાષ્ટ્રના ઘણા વિસ્તારોમાં ગધેડીના દૂધનું વેચાણ થાય છે. અને જાણીને નવાઇ લાગશે કે તેની કિંમત અંદાજે દસ હજાર રૂપીયા હોય છે. ગધેડાનો ઉપયોગ મોટાભાગે ભાર વહન કરવા માટે થાય છે, પરંતુ ગધેડીના દૂધની અનેક વિશેષતાઓ છે જેના વિશે બહુ ઓછા લોકો જાણતા હશે.
રોગપ્રતિકારક શક્તિ વધારવાના ગુણ
એક રિપોર્ટ અનુસાર ગધેડીના દૂધનો ઉપયોગ ફાર્માસ્યુટિકલ અને કોસ્મેટિક પ્રોડક્ટ્સ બનાવવામાં થાય છે. ગધેડીના દૂધમાં કોષોને સાજા કરવાના અને રોગપ્રતિકારક શક્તિ વધારવાના ગુણ હોય છે. એમ પણ કહેવાય છે કે પ્રાચીન મિસ્રની રાણી ક્લિયોપેટ્રા પોતાની ત્વચાને ચમકદાર રાખવા માટે ગધેડીના દૂધમાં સ્નાન કરતી હતી.
દૂધમાં ચરબી અને પ્રોટીન ઓછું
જે લોકોને ગાય કે ભેંસના દૂધની એલર્જી હોય, નિષ્ણાતો તેમને ગધેડીનું દૂધ પીવાની સલાહ આપે છે. રિપોર્ટ અનુસાર ગધેડીનું દૂધ માનવ દૂધ જેવું છે. ગધેડીના દૂધમાં ચરબી અને પ્રોટીન ઓછું હોય છે. જો કે, તેમાં લેક્ટોઝનું પ્રમાણ વધુ હોય છે. પરંતુ ગધેડીનું દૂધ ઝડપથી ફાટી જાય છે અને તેમાંથી પનીર બનાવી શકાતું નથી.
વિશેષ ગુણ
નિષ્ણાતોના મતે ગધેડીના દૂધમાં બે વિશેષ ગુણ હોય છે. પ્રથમ ગધેડીનું દૂધ સ્ત્રીના દૂધ જેવું હોય છે. તેમાં એન્ટી ઓક્સિડન્ટ, એન્ટી એજિંગ અને રિજનરેટીંગ કમ્પાઉન્ડ હોય છે. તેનાથી ત્વચા કોમળ રહે છે. આ દૂધનો ઉપયોગ ક્રીમ, મોઇશ્ચરાઇઝર અને સાબુ વગેરે બનાવવામાં થાય છે. ઘણી જગ્યાએ ગધેડીના દૂધમાંથી બનેલી બ્યુટી પ્રોડક્ટ્સની માંગ વધારે છે.
