ઓનલાઈન અને ડિજિટલના જમાનામાં ગુનાખોરીની વ્યાખ્યા પણ બદલાતી જઈ રહી છે. શિક્ષણના અભાવ અને ટેકનોલોજીનો પૂરતો જ્ઞાન ન હોવાને કારણે આજે ઓનલાઇન છેતરપિંડીના કિસ્સા ખુબજ વધી રહ્યા છે. લોકોને ખ્યાલ પણ હોતું નથી ને પળભરમાં તેમના એકાઉન્ટમાંથી રૂપિયા ટ્રાન્સફર થઇ જતા હોય છે. અને પછી પાછળથી તે વ્યક્તિને પસ્તાવાનો વારો આવે છે. બે દિવસ પહેલા પણ અમદાવાદમાં એક સાથે 20 જેટલી ઓનલાઇન છેતરપિંડીની ફરિયાદ નોંધાઈ હતી. તે બનાવની હજી શાહી પણ સુખાઈ નથી ને ત્યાં વધુ એક બનાવ આણંદ શહેરમાંથી સામે આવ્યો છે.
આણંદ શહેરના ગામડીમાં રહેતા એક શખ્સ પર મોબાઈલ પર ફોન આવ્યો હતો કે આઈડીએફસી ફર્સ્ટ બેંકમાંથી બોલું છું તમારું એકાઉન્ટ બ્લોક થઈ ગયું છે. જે શરુ કરાવવા માટે જરુરી વિગતો આપો તેમ કહીને ગઠીયાએ બેંક એકાઉન્ટની વિગતો લઈને ખાતામાંથી ૪૬,૧૩૪ ઉપાડી લઈને છેતરપીંડી આચરતા આણંદ સાઈબર ક્રાઈમ પોલીસ મથકમાં ફરિયાદ નોંધાઈ છે.
પ્રાપ્ત માહિતી અનુસાર ગામડી ગામે ધરણીવિહાર સોસાયટીમાં કાંતિભાઈ ધુરાભાઈ મકવાણા રહે છે. તેઓનું ખાતું આઈડીએફસી ફર્સ્ટ બેંકમાં છે. ગત તા. ૨૩મી મેના રોજ કાંતિભાઈના મોબાઈલ ઉપર ફોન આવ્યો હતો કે હું આઈડીએફસી બેંકમાંથી બોલું છું તમારું સેવીંગ એકાઉન્ટ બ્લોક થઈ ગયું છે. તેને પુનઃ શરુ કરવા માટે જરુરી વિગતો માંગી હતી તેમાં બેંક એકાઉન્ટ તથા કસ્ટરમર આઈડી અને ડેબીટ કાર્ડની વિગતો માંગી હતી. જેથી તેઓએ વિગતો આપી હતી. ત્યારબાદ ગઠીયાએ કોઈપણ સમયે રુા. ૪૬,૧૩૪ બેંકમાંથી ઉપાડી લીધા હતા. જેની જાણ કાંતિભાઈ મકવાણાને થતા તેઓએ સાઈબર ક્રાઈમ પોલીસ મથક આણંદ ખાતે અજાણ્યા ગઠીયા વિરુદ્ધ ફરિયાદ નોંધાવતા ગુનો દાખલ કર્યો છે.