ભારતીય ક્રિકેટ ટીમ ICC T20 વર્લ્ડકપમાં તેની પ્રથમ મેચ હારી ગઈ છે, જે 24 ઓક્ટોબરે પાકિસ્તાન સામે હતી. હવે ભારતે તેની આગામી મેચ 31 ઓક્ટોબરે દુબઈમાં ન્યૂઝીલેન્ડ સામે રમવાની છે. બન્ને ટીમો માટે આ મેચ જીતવી મહત્વપૂર્ણ છે, કારણ કે ન્યૂઝીલેન્ડ પણ પાકિસ્તાન સામે પોતાની મેચ હારી ચૂક્યું છે. જોકે, ભારતને ટાઈટલ જીતવા માટે દાવેદાર માનવામાં આવી રહ્યું છે. આવી સ્થિતિમાં ભારતીય ટીમે આ મેચ કોઈપણ સંજોગોમાં જીતવી જ પડશે. જો ભારતે ન્યૂઝીલેન્ડ સામે જીતવું હોય તો ત્રણ ફેરફાર કરવા જોઈએ.
ભુવનેશ્વર કુમારનાં સ્થાને શાર્દુલ ઠાકુરને મળે તક
ભારતીય ટીમે ભુવનેશ્વર કુમારનાં સ્થાને શાર્દુલ ઠાકુરને સામેલ કરીને પ્લેઈંગ ઈલેવનમાં વધુ એક ફેરફાર કરવો જોઈએ. મીડિયમ પેસ સ્વિંગ બોલર ભુવનેશ્વર કુમાર તાજેતરનાં સમયમાં તેના ફોર્મથી પ્રભાવશાળી નથી. તે તેની ઇન-સ્વિંગ બોલિંગ અને પાવરપ્લેમાં બેટ્સમેનોને આઉટ કરવા માટે જાણીતો છે, પરંતુ તાજેતરમાં તે ટીમ માટે પ્રારંભિક વિકેટ લેવામાં પાછળ રહ્યો છે. ભુવનેશ્વર પાકિસ્તાન સામે ભારતીય બોલિંગ વિભાગમાં ખરાબ રીતે નિષ્ફળ રહ્યો હતો. સનરાઈઝર્સ હૈદરાબાદ માટે 11 મેચમાં માત્ર 6 વિકેટ લઈને IPL પુરી કરી હોવા છતાં અનુભવને કારણે તેને ટીમમાં તક આપવામાં આવી હતી. ભારતીય ક્રિકેટ ટીમનાં નવા ઉભરતા સ્ટાર શાર્દુલ ઠાકુરે ન્યૂઝીલેન્ડ સામે ભુવનેશ્વર કુમારની જગ્યાએ ટીમમાં સ્થાન મેળવવું જોઈએ. આ 30 વર્ષીય ખેલાડીને XIમાં લાવવાથી ટીમ માટે મોટો ફાયદો થઈ શકે છે કારણ કે તેની પાસે વિકેટ લેવાની ક્ષમતા છે અને સમય આવે ત્યારે તે બેટથી રન પણ બનાવી શકે છે.
વરૂણ ચક્રવર્તીની જગ્યાએ અશ્વિનને મળે તક
મિસ્ટ્રી સ્પિનર વરુણ ચક્રવર્તી ભારત માટે મહત્વની ભૂમિકા ભજવશે તેવી અપેક્ષા હતી. પરંતુ તે પાકિસ્તાન સામે ટીમ ઈંન્ડિયા માટે સારું પ્રદર્શન કરી શક્યો નહતો. તેણે હજુ સુધી રાષ્ટ્રીય ટીમ માટે પ્રદર્શન કર્યું નથી કારણ કે તે IPL માં KKR તરફથી રમ્યો હતો. વરુણે 4 ઓવર નાંખી અને એકપણ વિકેટ લીધા વિના 33 રન આપ્યા હતા. તેણે પાકિસ્તાની બેટ્સમેનોને તેટલી મુશ્કેલી ન પહોંચાડી જેટલી તેની પાસેથી અપેક્ષા રાખવામાં આવી હતી. આવી સ્થિતિમાં રવિચંદ્રન અશ્વિનને T20 ટીમમાં સામેલ કરવો જોઈએ. તે છેલ્લે 2017માં મર્યાદિત ઓવરનાં ફોર્મેટમાં જોવા મળ્યો હતો. અશ્વિન એક ચતુર બોલર છે અને તે બેટિંગમાં પણ સારું યોગદાન આપી શકે છે. જાડેજાની સાથે અનુભવી સ્પિનર રવિ અશ્વિન ઘાતક સાબિત થઈ શકે છે. અશ્વિનનો અનુભવ કેપ્ટન અને અન્ય બોલરો માટે પણ કામમાં આવી શકે છે.
હાર્દિક પંડ્યાની જગ્યાએ ઈશાન કિશનને મળે તક
ઈશાન કિશનને પ્લેઇંગ ઇલેવનમાં તક આપવી જોઇએ. હાર્દિક પંડ્યાની જગ્યાએ તેનો સમાવેશ કરવો જોઈએ. હાર્દિક પંડ્યા પાકિસ્તાન સામે બેટ્સમેન તરીકે રમ્યો હતો. તેણે બોલિંગ ન કરવાનો નિર્ણય પહેલેથી જ લઈ લીધો હતો, તેથી તેની પાસેથી પાકિસ્તાન સામે મોટી ઈનિંગ્સની અપેક્ષા હતી, પરંતુ મુશ્કેલ સમયમાં તે 8 બોલમાં 11 રન જ બનાવી શક્યો હતો. એટલું જ નહીં, હાર્દિક ફરી મેદાનમાં પણ આવ્યો ન હતો. તેના ખભા પર તણાવ હતો. બીજું, છેલ્લા બે વર્ષમાં હાર્દિકે 35 T20માંથી માત્ર છ બોલ ફેંક્યા છે. હાર્દિક બેટ્સમેન તરીકે સફળ રહ્યો નથી. જ્યારે ઈશાન કિશન જે અત્યારે ફોર્મમાં છે. જ્યારે તેને પાકિસ્તાન સામે MACA આપવામાં આવ્યું ન હોતું, ત્યારે ઘણા પ્રશ્નો ઉભા થયા હતા. ઓપનર તરીકે કિશન સારી ભૂમિકા ભજવી શકે છે. તેણે ઈંગ્લેન્ડ સામેની પ્રેક્ટિસ મેચમાં માત્ર 46 બોલમાં 70* રનની તોફાની ઇનિંગ રમી હતી.
