Sports News: ક્રિકેટ ઓસ્ટ્રેલિયાએ તમામ ફોર્મેટમાં વર્ષના શ્રેષ્ઠ ક્રિકેટરોના એવોર્ડની જાહેરાત કરી છે. જેમાં ટ્રેવિસ હેડે (Travis Head)સતત બીજી વખત પ્રતિષ્ઠિત ‘એલન બોર્ડર મેડલ’ જીતીને ખાસ સિદ્ધિ મેળવી છે. મિચેલ સ્ટાર્કને ટેસ્ટ ક્રિકેટમાં ‘પ્લેયર ઓફ ધ યર’ તરીકે પસંદ કરવામાં આવ્યા છે, જ્યારે મિચેલ માર્શને વનડે ક્રિકેટર ઓફ ધ યર અને ટિમ ડેવિડને T20 ઈન્ટરનેશનલ ક્રિકેટર ઓફ ધ યરનો એવોર્ડ મળ્યો છે.
Travis Headએ માત્ર એક વોટથી જીત્યો પ્રતિષ્ઠિત એવોર્ડ
ઓસ્ટ્રેલિયન ક્રિકેટમાં ‘એલન બોર્ડર મેડલ’ને સૌથી પ્રતિષ્ઠિત વ્યક્તિગત એવોર્ડ પૈકી એક માનવામાં આવે છે. ટ્રેવિસ હેડે સતત બીજી વખત આ એવોર્ડ પોતાના નામે કર્યો છે. હેડે વિકેટકીપર બેટ્સમેન એલેક્સ કેરીને માત્ર એક વોટના નજીવા અંતરથી પાછળ છોડીને એવોર્ડ જીત્યો હતો. 29 જાન્યુઆરી 2025થી 8 જાન્યુઆરી 2026 સુધી ચાલેલી વોટિંગ પ્રક્રિયામાં હેડને એલેક્સ કેરી કરતાં એક અને મિચેલ સ્ટાર્ક કરતાં ત્રણ વધુ વોટ મળ્યા હતા.
આ સાથે ટ્રેવિસ હેડ એકથી વધુ વખત ‘એલન બોર્ડર મેડલ’ જીતનારા ખેલાડીઓની ખાસ યાદીમાં સામેલ થઈ ગયા છે. તેઓ હવે સ્ટીવ સ્મિથ અને નાથન લાયન સાથે આ સિદ્ધિ મેળવનારા ખેલાડીઓમાં સ્થાન ધરાવે છે.
સતત બે વખત એવોર્ડ જીતનારા ખેલાડીઓની યાદીમાં હેડ
ટ્રેવિસ હેડ સતત બે વર્ષ ‘એલન બોર્ડર મેડલ’ જીતનારા પાંચમા ખેલાડી બન્યા છે. આ પહેલાં રિકી પોન્ટિંગ, માઈકલ ક્લાર્ક, ડેવિડ વોર્નર અને શેન વોટસને સતત બે વખત આ પ્રતિષ્ઠિત એવોર્ડ જીત્યો હતો. હેડ માટે આ સિદ્ધિ ખાસ છે, કારણ કે તેઓ ઓસ્ટ્રેલિયાની બેટિંગ લાઇનઅપના મહત્વના ખેલાડી તરીકે સતત શાનદાર પ્રદર્શન કરી રહ્યા છે.
મિચેલ સ્ટાર્ક ટેસ્ટ ક્રિકેટમાં નંબર-1
ઓસ્ટ્રેલિયાના અનુભવી ઝડપી બોલર મિચેલ સ્ટાર્ક (Mitchell Starc)ને ‘શેન વોર્ન મેન્સ ટેસ્ટ પ્લેયર ઓફ ધ યર’ એવોર્ડ મળ્યો છે. સ્ટાર્કે 11 ટેસ્ટ મેચમાં કુલ 57 વિકેટ ઝડપી હતી. સ્ટાર્કને આ પ્રતિષ્ઠિત એવોર્ડ દિવંગત મહાન સ્પિનર શેન વોર્નના પિતા કીથ વોર્ને એનાયત કર્યો હતો. ટેસ્ટ ક્રિકેટમાં તેમના શાનદાર પ્રદર્શનને કારણે તેમને આ સન્માન મળ્યું છે.
મિચેલ માર્શ શ્રેષ્ઠ વનડે ક્રિકેટર
ઓસ્ટ્રેલિયાના વ્હાઇટ-બોલ ફોર્મેટના કેપ્ટન મિચેલ માર્શ (Mitchell Marsh)ને ‘વનડે ક્રિકેટર ઓફ ધ યર’ તરીકે પસંદ કરવામાં આવ્યા છે. માર્શે ઓસ્ટ્રેલિયાની વનડે ટીમમાં બેટ અને બોલ બંનેથી મહત્વની ભૂમિકા ભજવી છે. તેમના ઓલરાઉન્ડ પ્રદર્શનને ધ્યાનમાં રાખીને તેમને આ એવોર્ડ આપવામાં આવ્યો છે.
ટિમ ડેવિડને T20 ઈન્ટરનેશનલ ક્રિકેટર ઓફ ધ યરનો એવોર્ડ
તોફાની મિડલ ઓર્ડર બેટ્સમેન ટિમ ડેવિડે ‘T20 ઈન્ટરનેશનલ ક્રિકેટર ઓફ ધ યર’નો એવોર્ડ જીત્યો છે. ટૂંકા ફોર્મેટમાં પોતાની આક્રમક બેટિંગ માટે જાણીતા ટિમ ડેવિડે ઓસ્ટ્રેલિયા માટે મહત્વપૂર્ણ ઇનિંગ્સ રમી છે. તેમના પ્રદર્શનને કારણે તેમને T20 ઈન્ટરનેશનલ કેટેગરીમાં શ્રેષ્ઠ ખેલાડી તરીકે પસંદ કરવામાં આવ્યા છે.
મહિલા ક્રિકેટમાં અનાબેલ સધરલેન્ડને સન્માન
ઓસ્ટ્રેલિયન મહિલા ક્રિકેટમાં અનાબેલ સધરલેન્ડને ‘બેલિન્ડા ક્લાર્ક મેડલ’થી સન્માનિત કરવામાં આવ્યા હતા. મહિલા અને પુરુષ બંને ટીમોના વ્યસ્ત ક્રિકેટ કાર્યક્રમને કારણે ક્રિકેટ ઓસ્ટ્રેલિયા (Cricket Australia)આ વખતે પરંપરાગત રીતે એકસાથે ઔપચારિક એવોર્ડ સમારોહનું આયોજન કરી શક્યું નહોતું. આ કારણે અનાબેલ સધરલેન્ડને ફેબ્રુઆરીમાં જ ‘બેલિન્ડા ક્લાર્ક મેડલ’ એનાયત કરવામાં આવ્યો હતો.
કોને મળ્યો કયો એવોર્ડ?
ટ્રેવિસ હેડ- એલન બોર્ડર મેડલ
મિચેલ સ્ટાર્ક- શેન વોર્ન મેન્સ ટેસ્ટ પ્લેયર ઓફ ધ યર
મિચેલ માર્શ- વનડે ક્રિકેટર ઓફ ધ યર
ટિમ ડેવિડ- T20 ઈન્ટરનેશનલ ક્રિકેટર ઓફ ધ યર
અનાબેલ સધરલેન્ડ- બેલિન્ડા ક્લાર્ક મેડલ
આ રીતે ક્રિકેટ ઓસ્ટ્રેલિયાના એવોર્ડ્સમાં ટ્રેવિસ હેડે સતત બીજી વખત એલન બોર્ડર મેડલ જીતીને પોતાની ખાસ ઓળખ બનાવી છે, જ્યારે મિચેલ સ્ટાર્ક, મિચેલ માર્શ અને ટિમ ડેવિડે પણ પોતાના ફોર્મેટમાં શ્રેષ્ઠ ખેલાડીનો એવોર્ડ મેળવીને શાનદાર સિઝનને યાદગાર બનાવી છે.
