Vadodara News: વડોદરા શહેરના રાવપુરા વિસ્તારમાં આવેલી દાંડિયાબજારની એક હોટલમાં યુવકનું રહસ્યમય સંજોગોમાં મોત (Vadodara Hotel Death) થતાં ચકચાર મચી છે. 18 ઓગસ્ટની મોડી રાત્રે એક યુવક અન્ય યુવક સાથે હોટલમાં રોકાયો હતો. સવારે રૂમમાંથી યુવકની તબિયત લથડેલી હોવાની જાણ થતાં હોટલ સ્ટાફે 108 અને પોલીસને જાણ કરી હતી. ઘટનાસ્થળે પહોંચેલી ટીમે યુવકને મૃત હાલતમાં જોયો હતો. પોલીસે મૃતદેહને પોસ્ટમોર્ટમ માટે સયાજી હોસ્પિટલ ખસેડ્યો છે. હાલ મોત (Vadodara Hotel Death)નું ચોક્કસ કારણ જાણવા તપાસ ચાલી રહી છે.

રાત્રે 3 વાગ્યે હોટલમાં પહોંચ્યા

પોલીસ તપાસ મુજબ પાણીગેટના ખાટકીવાડ વિસ્તારમાં રહેતા યુવકનું નામ ઓળખ છુપાવવા માટે ‘યુનુસ’ રાખવામાં આવ્યું છે, જ્યારે ભાયલી વિસ્તારમાં રહેતા અન્ય યુવકનું નામ ‘મહેશ’ રાખવામાં આવ્યું છે. બંને યુવકો WhatsAppના માધ્યમથી એકબીજાના સંપર્કમાં આવ્યા હતા અને ત્યારબાદ હોટલમાં મળવાનું નક્કી કર્યું હતું. બંને મોડી રાત્રે આશરે 3 વાગ્યે દાંડિયાબજારની હોટલમાં પહોંચ્યા હતા અને રૂમ બુક કરાવ્યો હતો. પોલીસના જણાવ્યા પ્રમાણે બંને એકબીજાના પરિચિત હતા. અધિકારીઓએ બંને પુરુષો વચ્ચે સમલૈંગિક સંબંધ હોવાની માહિતી પણ આપી છે.

રૂમમાં અચાનક લાઈટ જતી રહી

હોટલમાં રોકાયા બાદ રાત્રિ દરમિયાન રૂમમાં અચાનક વીજ પુરવઠો ખોરવાયો હતો. અંધારામાં યુનુસ વોશરૂમ તરફ જવા માટે ઊભો થયો ત્યારે ઠોકર વાગતાં નીચે પડી ગયો હતો. પડવાથી તેના માથા અને કપાળના ભાગે ઈજા થઈ હોવાનું પોલીસને પ્રાથમિક માહિતી મળી છે. ત્યારબાદ વીજળીની સમસ્યાને કારણે બંનેએ હોટલ સ્ટાફને રૂમ બદલવાની વિનંતી કરી હતી અને તેમને બીજા રૂમમાં શિફ્ટ કરવામાં આવ્યા હતા.

સવારે મહેશે રિસેપ્શન પર જઈ મદદ માગી

સવારે આશરે 7 વાગ્યે મહેશ ગભરાયેલી હાલતમાં હોટલના રિસેપ્શન પર પહોંચ્યો હતો. તેણે યુનુસની તબિયત અંગે ચિંતા વ્યક્ત કરીને તાત્કાલિક 108 એમ્બ્યુલન્સ બોલાવવાની વિનંતી કરી હતી. હોટલ સ્ટાફે વિલંબ કર્યા વિના 108 અને પોલીસને જાણ કરી હતી. થોડા સમય બાદ એમ્બ્યુલન્સ અને પોલીસની ટીમ હોટલના રૂમમાં પહોંચી હતી. તપાસ કરતાં યુનુસ મૃત હાલતમાં મળી આવ્યો હતો. ત્યારબાદ મૃતદેહને પોસ્ટમોર્ટમ માટે સયાજી હોસ્પિટલ મોકલવામાં આવ્યો હતો.

સાથી યુવકની પોલીસ પૂછપરછ

ઘટનાની ગંભીરતાને ધ્યાનમાં લઈને પોલીસે મૃતક સાથે હોટલમાં રોકાયેલા મહેશની અટકાયત કરી પૂછપરછ હાથ ધરી છે. પોલીસના જણાવ્યા પ્રમાણે મહેશના શરીર પર કોઈ સ્પષ્ટ મારામારી અથવા ઝપાઝપીના નિશાન મળ્યા નથી. તેમ છતાં યુવકના મોત (Vadodara Hotel Death) પાછળનું ચોક્કસ કારણ જાણવા અને ઘટનાક્રમની સંપૂર્ણ કડી જોડવા માટે પોલીસ તેની પૂછપરછ કરી રહી છે.

નશો કર્યો હતો કે કેમ? બ્લડ સેમ્પલ લેવાયા

મૃતકના મોતનું કારણ માત્ર માથામાં થયેલી ઈજાના કારણે છે કે અન્ય કોઈ કારણ જવાબદાર છે તે અંગે હાલમાં સ્પષ્ટતા થઈ નથી. મૃતકે કોઈ નશીલા પદાર્થનું સેવન કર્યું હતું કે નહીં તે જાણવા માટે તેના બ્લડ સેમ્પલ લેવામાં આવ્યા છે. પોસ્ટમોર્ટમ રિપોર્ટ અને અન્ય તપાસના પરિણામ બાદ જ મોતનું ચોક્કસ કારણ સામે આવશે.

Vadodara Hotel Death: પોલીસે અકસ્માતે મોતનો ગુનો નોંધ્યો

રાવપુરા પોલીસે હાલ અકસ્માતે મોત (Vadodara Hotel Death)નો ગુનો નોંધી તપાસ શરૂ કરી છે. હોટલના રૂમ, CCTV ફૂટેજ, બંને યુવકોની હિલચાલ અને ઘટનાક્રમ અંગે પોલીસ માહિતી એકત્ર કરી રહી છે. ACP અશોક રાઠવાના જણાવ્યા મુજબ, બંને યુવકો એકબીજાના પરિચિત હતા અને તેમની વચ્ચે સમલૈંગિક સંબંધ હોવાની માહિતી સામે આવી છે. હાલ પોલીસ દરેક સંભાવનાને ધ્યાનમાં રાખીને તપાસ કરી રહી છે.

પોસ્ટમોર્ટમ બાદ હકીકત સામે આવશે

હાલ આ ઘટના અકસ્માત છે કે યુવકના મોત પાછળ કોઈ અન્ય કારણ છે તે અંગે પોલીસ તરફથી અંતિમ નિષ્કર્ષ આપવામાં આવ્યો નથી. રૂમમાં થયેલી ઈજા, વીજ પુરવઠો ખોરવાવાની ઘટના, મૃતકના બ્લડ સેમ્પલ અને પોસ્ટમોર્ટમ રિપોર્ટ જેવા પુરાવા તપાસ માટે મહત્વના બની શકે છે. પોલીસની તપાસ પૂર્ણ થયા બાદ જ યુનુસના મોત (Vadodara Hotel Death)નું સાચું કારણ સ્પષ્ટ થશે.

આ પણ વાંચો:સુરતની હોટેલમાં રિસેપ્શન પર યુવકનું મોત: મહિલા મિત્ર સાથે ચેક-ઇન માટે આવ્યો હતો, CCTVમાં કેદ ઘટના

આ પણ વાંચો:સુરતની હોટેલમાં દંપતીનો આપઘાતનો પ્રયાસ, પત્નીનું મોત

આ પણ વાંચો:હોટેલની આગમાં લાઠીના એક જ પરિવારના 3 સભ્ચોના મોત, જનાજામાં મોટી સંખ્યામાં લોકો જોડાયા