Johnson Baby Powder: બોમ્બે હાઈકોર્ટે બુધવારે જોન્સન એન્ડ જોન્સન બેબી પાઉડરના નમૂનાઓનું નવેસરથી પરીક્ષણ કરવાનો આદેશ આપ્યો છે. આ સાથે કોર્ટે કંપનીને બેબી પાવડર બનાવવાની મંજૂરી આપી હતી, પરંતુ તેને વેચી શકાતી નથી. કંપનીએ રાજ્ય સરકારના બે આદેશોને પડકારતી અરજી કરી હતી. જેમાંથી 15 સપ્ટેમ્બરના આદેશમાં લાયસન્સ રદ કરવા અને 20 સપ્ટેમ્બરના આદેશમાં કંપનીના બેબી પાવડરનું ઉત્પાદન અને વેચાણ તાત્કાલિક ધોરણે બંધ કરવા જણાવ્યું હતું.
આ ઓર્ડર સ્ટેટ ફૂડ એન્ડ ડ્રગ એડમિનિસ્ટ્રેશન (FDA) ના જોઈન્ટ કમિશનર અને લાયસન્સિંગ ઓથોરિટી દ્વારા જારી કરવામાં આવ્યા હતા. જસ્ટિસ એસવી ગંગાપુરવાલા અને જસ્ટિસ એસજી ડિગેની ડિવિઝન બેન્ચે બુધવારે FDAને મુંબઈના મુલુંડ વિસ્તારમાં આવેલી કંપનીની ફેક્ટરીમાંથી ત્રણ દિવસમાં તાજા સેમ્પલ એકત્રિત કરવાનો નિર્દેશ આપ્યો હતો. આ પછી આ નમૂનાઓ પરીક્ષણ માટે ત્રણ લેબોરેટરી એટલે કે બે સરકારી અને એક ખાનગીમાં મોકલવામાં આવશે.
એક સપ્તાહમાં રિપોર્ટ આપવાનો આદેશ આપતા કોર્ટે જણાવ્યું હતું કે, ‘સેમ્પલ સેન્ટ્રલ ડ્રગ ટેસ્ટિંગ લેબોરેટરી, એફડીએ લેબ અને ઈન્ટરટેક લેબોરેટરીમાં તપાસ માટે મોકલવામાં આવશે.’ ત્યારપછી આ લેબોરેટરીઓએ એક સપ્તાહની અંદર પોતાનો રિપોર્ટ આપવાનો રહેશે. કંપની તરફથી હાજર રહેલા વરિષ્ઠ વકીલ રવિ કદમે માંગ કરી હતી કે કોર્ટ કંપનીને ત્યાં સુધી ઓછામાં ઓછું ઉત્પાદન બનાવવાની મંજૂરી આપે. બેન્ચે જણાવ્યું કે, ‘સરકારે અરજદારને બેબી પાઉડર વહેંચવાથી રોક લગાવી દીધી છે. કંપનીએ આ આદેશનું પાલન કરવાનું રહેશે. જો કંપની ઉત્પાદન બનાવવા માંગે છે, તો તે તેના પોતાના જોખમે હશે.” આ મામલાની આગામી સુનાવણી 30 નવેમ્બરે થશે.
જણાવી દઈએ કે, ઓગસ્ટ 2022ની શરૂઆતમાં જોન્સન એન્ડ જોન્સને જાહેરાત કરી હતી કે તે 2023ના પ્રથમ ત્રિમાસિક ગાળાથી ભારતમાં ટેલ્ક આધારિત બેબી પાવડરનું ઉત્પાદન બંધ કરશે. આ સંદર્ભમાં, જોન્સન એન્ડ જોન્સન ઇન્ડિયાના પ્રવક્તાએ કહ્યું હતું કે, અમે આ સંબંધમાં અમારા ગ્રાહકો અને ભાગીદારો સાથે મળીને કામ કરીશું.
આ પણ વાંચો: World/ઋષિ સુનકના સસરા નારાયણ મૂર્તિએ કઈ વાત પર કહ્યું – ભારત માટે ખૂબ જ
