રાજ્યમાં વિધાનસભાની ચૂંટણીને લઇને ખરાખરીનો જંગ જામ્યો છે. ચૂંટણીની તારીખ જાહેર થયા પછી તમામ પક્ષ પ્રજાને રીઝવવાના નીત નવા ગતકડાઓ અપનાવી રહ્યા છે. ઉલ્લેખનીય છે કે આગામી 1 અને 5 ડિસેમ્બરે મતદાન અને 8 ડિસેમ્બરે તેના પરિણામ જાહેર થવાના છે. ચૂંટણીને આડે હવે ગણતરીના દિવસો જ બાકી છે ત્યારે આ ચૂંટણીમાં 1621 ઉમેદવારો મેદાને ઉતર્યા છે. આ 182 બેઠકો પર એક બે કે ત્રણ નહીં પરંતુ 70 રાજકીય પક્ષો ઉમેદવારી કરી રહ્યા છે. જેમના નામ પણ લગભગ જ તમે સાંભળ્યા હશે. તો ચાલો જાણીએ ચૂંટણીના વિજય શંખ ફૂંકવાની તૈયારી કરતા પક્ષ વીશે..
વિધાનસભાની ચૂંટણીના પ્રથમ તબક્કાની વાત કરીએ તો 89 બેઠકો પર 1 ડિસેમ્બરે મતદાન થવાનું છે જેમાં 39 રાજકીય પક્ષો અને અપક્ષોને મળીને કુલ 788 ઉમેદવારો મેદાનમાં છે. આ 788માં માત્ર 70 જ મહિલા ઉમેદવારો છે જ્યારે 718 પુરુષ ઉમેદવારો છે. આ દિવસે 339 અપક્ષ ઉમેદવારોના ભાવીનો પણ ફેંસલો થવાનો છે.
જ્યારે બીજા તબક્કાનું ઇલેક્શન 5 ડિસેમ્બરે થવાનું છે. જેમાં બાકી રહેલી 93 બેઠકોનો સમાવેશ કરવામાં આવ્યો છે. આ 93 બેઠકો પર 60 જેટલા રાજકીય પક્ષોએ ઉમેદવારો ઉતાર્યા છે. જ્યારે અપક્ષને મળીને કુલ 833 ઉમેદવારો વચ્ચે આ 93 બેઠકો માટે ચૂંટણી જંગ યોજાવાનો છે. 833માં 764 પુરુષ ઉમેદવારો છે જ્યારે 69 મહિલા ઉમેદવારો છે. આ તબક્કા દરમિયાન 285 અપક્ષોએ ઉમેદવારી નોંધાવી છે.
નોંધનીય છે કે 29 રાજકીય પક્ષોએ બંને તબક્કામાં પોતાના ઉમેદવાર ઉતાર્યા છે. જ્યારે 10 રાજકીય પક્ષોએ માત્ર પ્રથમ જ તબક્કામાં અને 31 રાજકીય પક્ષોએ માત્ર બીજા તબક્કાની બેઠકોમાં જ પોતાના ઉમેદવારોને ઉતાર્યા છે. આવો વિસ્તૃત રીતે જાણીએ કઈ પાર્ટી પાસે કેટલા ઉમેદવારો છે અને તે કયા તબક્કામાં ચૂંટણી જંગ લડશે.