Gandhinagar News : ગુજરાત પોલીસ (Gujarat POlice)માં PSI ભરતી (PSI Recruitment)ની રાહ જોઈ રહેલા ઉમેદવારો માટે મહત્વની માહિતી સામે આવી છે. રાજ્ય સરકારે ગ્રામ્ય સુરક્ષા કવચ યોજના (GSKY) હેઠળ બિનહથિયારી પોલીસ સબ-ઇન્સ્પેક્ટરની 200 નવી જગ્યાઓ ઊભી કરવાની મંજૂરી આપી છે. ગૃહ વિભાગના ઠરાવ બાદ આ જગ્યાઓ પર નિયમ મુજબ ભરતી પ્રક્રિયા હાથ ધરવાનો માર્ગ મોકળો થયો છે.
GSKY હેઠળ નવી જગ્યાઓનું સર્જન
રાજ્યમાં ગ્રામ્ય વિસ્તારોની પોલીસ વ્યવસ્થા વધુ મજબૂત બનાવવાના હેતુથી આ નિર્ણય લેવામાં આવ્યો છે. ગૃહ વિભાગના 27 એપ્રિલ, 2026ના મંજૂરી પત્રના આધારે પોલીસ મહાનિર્દેશક અને મુખ્ય પોલીસ અધિકારીની કચેરી દ્વારા નવી સેવા વર્ષ 2026-27 માટે દરખાસ્ત કરવામાં આવી હતી.
આ દરખાસ્તમાં ગ્રામ્ય સુરક્ષા કવચ યોજના અંતર્ગત 200 બિનહથિયારી PSIની જગ્યાઓ ઊભી કરવાની માંગ કરવામાં આવી હતી. સરકાર દ્વારા આ દરખાસ્તને મંજૂરી આપવામાં આવતા ગુજરાત પોલીસ (Gujarat Police)માં નવી જગ્યાઓનો ઉમેરો થયો છે.
₹36,600થી ₹1,16,600નું પગારધોરણ
મંજૂર થયેલી તમામ 200 જગ્યાઓ બિનહથિયારી પોલીસ સબ-ઇન્સ્પેક્ટરની છે. દસ્તાવેજમાં આ પદ માટે ₹36,600થી ₹1,16,600નું પગારધોરણ દર્શાવવામાં આવ્યું છે. નવી જગ્યાઓ પાછળ થનારો ખર્ચ રાજ્યના બજેટમાં કરવામાં આવેલી જોગવાઈમાંથી કરવામાં આવશે.
આ જગ્યાઓ વિવિધ ગ્રામ્ય પોલીસ મથકો અને વિસ્તારોમાં ફાળવવામાં આવશે. જેના કારણે સંબંધિત વિસ્તારોમાં પોલીસની ઉપલબ્ધતા અને કામગીરીને વધુ મજબૂતી મળવાની શક્યતા છે.
વર્તમાન નિયમો પ્રમાણે ભરતી થશે
200 PSI જગ્યાઓ (200 PSI Posts) પર ભરતી પ્રવર્તમાન ભરતી નિયમો અને સરકાર દ્વારા નિર્ધારિત પ્રક્રિયા મુજબ કરવામાં આવશે. સીધી ભરતી હેઠળ આવતી જગ્યાઓ માટે નિયમિત ભરતી પ્રક્રિયા હાથ ધરાશે.
ઉમેદવારો માટે લાયકાત, વયમર્યાદા, કમ્પ્યુટર કૌશલ્ય, ભાષાકીય પરીક્ષા અથવા અન્ય જરૂરી શરતો પ્રવર્તમાન ભરતી નિયમો મુજબ રહેશે. પસંદગી પ્રક્રિયા પૂર્ણ થયા બાદ લાયક ઉમેદવારોને નિયમ અનુસાર તાલીમ આપવામાં આવશે.
PSI ભરતી 2026 (PSI Recruitment 2026) અંગે ઉમેદવારોએ સત્તાવાર ભરતી જાહેરાત બહાર પડે ત્યારે જ અરજીની તારીખ, શૈક્ષણિક લાયકાત, વયમર્યાદા, પરીક્ષા પદ્ધતિ અને અન્ય વિગતોની ચોક્કસ માહિતી તપાસવી જરૂરી રહેશે. હાલ સરકારની મંજૂરીથી 200 નવી જગ્યાઓ માટે ભરતીનો વહીવટી માર્ગ ખુલ્યો છે.
