Junagadh News: જૂનાગઢ જિલ્લાના માણાવદરમાં એન.જી. મિલ નજીક અંદાજે 50 કાચબા મૃત હાલતમાં મળી (Manavadar Turtle Deaths) આવતાં ચકચાર મચી છે. ઘટનાની માહિતી મળતાં જ વન વિભાગની ટીમ ઘટનાસ્થળે પહોંચી હતી અને સમગ્ર મામલે તપાસ હાથ ધરી હતી. કાચબાઓનાં મોત પાછળનું ચોક્કસ કારણ જાણવા મૃતદેહોને પોસ્ટમોર્ટમ માટે મોકલવામાં આવ્યા છે.
Manavadar Turtle Deaths: એન.જી. મિલ નજીક મૃત હાલતમાં મળી આવ્યા કાચબા
મળતી માહિતી મુજબ, માણાવદર (Manavadar News)માં એન.જી. મિલ નજીકના વિસ્તારમાં સ્થાનિક યુવાનોને મોટી સંખ્યામાં કાચબા મૃત હાલતમાં જોવા મળ્યા હતા. આ અંગે તેમણે તાત્કાલિક વન વિભાગને જાણ કરી હતી.
માહિતી મળતાં માણાવદરના રાઉન્ડ ફોરેસ્ટર (Gujarat Forest Department) એ.બી. રાઠોડ સ્ટાફ સાથે ઘટનાસ્થળે પહોંચ્યા હતા. પ્રાથમિક નિરીક્ષણ દરમિયાન કાચબાઓના શરીર પર કોઈ હિંસક પ્રાણી કે જીવજંતુએ ખાધાના સ્પષ્ટ નિશાન જોવા મળ્યા ન હોવાનું જણાવાયું છે.
ઝેરી અસરની આશંકા, વન વિભાગની તપાસ
એકસાથે આટલી મોટી સંખ્યામાં કાચબાઓનાં મોત થવાથી ઝેરી પદાર્થની અસર અથવા પાણીમાં કેમિકલ ભળ્યું હોવાની આશંકા વ્યક્ત કરવામાં આવી રહી છે. જોકે, તપાસ પૂર્ણ થયા પહેલાં મોતનું ચોક્કસ કારણ સ્પષ્ટ થયું નથી.
આ ઘટનાને પગલે પર્યાવરણપ્રેમીઓમાં પણ ચિંતા જોવા મળી રહી છે. વન વિભાગ દ્વારા ઘટનાસ્થળની તપાસ કરીને મોતનું કારણ જાણવા માટે જરૂરી કાર્યવાહી કરવામાં આવી રહી છે.
પોસ્ટમોર્ટમ રિપોર્ટ બાદ કારણ સ્પષ્ટ થશે
વન વિભાગના અધિકારીના જણાવ્યા અનુસાર, સ્થળ પરથી અંદાજે 50 મૃત કાચબાઓના મૃતદેહો એકત્રિત કરવામાં આવ્યા છે. મોતનું કારણ જાણવા માટે તેમને પોસ્ટમોર્ટમ અર્થે અમરાપુર ખાતે મોકલવામાં આવ્યા છે.
હવે પોસ્ટમોર્ટમ રિપોર્ટ આવ્યા બાદ જ કાચબાઓનાં મોત પાછળનું સાચું કારણ (Turtle Death Investigation) જાણી શકાશે. વન વિભાગની તપાસમાં વધુ વિગતો સામે આવવાની શક્યતા છે.
આ પણ વાંચો: સણોસરીમાં દીપડાનો આતંક; 3 વર્ષના માસૂમને ફાડી ખાધો, વન વિભાગે માનવભક્ષી દીપડાને પકડ્યો
આ પણ વાંચો: સાણંદની સીમમાં ફરી દીપડાની હાજરીથી ફફડાટ: કૂતરાના મારણ બાદ વન વિભાગે ગોઠવ્યું પાંજરું
આ પણ વાંચો: નાના સમઢિયાળામાં કૂવામાં પડ્યો સિંહ, વન વિભાગે સિંહનું સફળ રેસ્ક્યૂ કર્યું
