Chhota Udepur News: છોટાઉદેપુર જિલ્લાના નસવાડી ગ્રામ પંચાયતમાં (Nasvadi Gram Panchayat) સરપંચ સામે લાવવામાં આવેલી અવિશ્વાસની દરખાસ્તને (No Confidence Motion) લઈને યોજાયેલી સામાન્ય સભા પહેલાં જ ભારે હોબાળો મચી ગયો હતો. સભામાં હાજરી આપવા આવેલા સભ્યોને રોકવાના પ્રયાસ દરમિયાન પરિસ્થિતિ તંગ બની હતી. આક્ષેપ મુજબ, ત્રણ સભ્યોને પંચાયતના રૂમમાં પૂરી દેવામાં આવ્યા હતા, જ્યારે અન્ય આઠ સભ્યોને ગાડીમાંથી નીચે પણ ઉતરવા દેવામાં આવ્યા નહોતા. આ દરમિયાન ગાડીના કાચ તોડવામાં આવ્યા હોવાનો પણ આક્ષેપ થયો છે.

Nasvadi Gram Panchayat: 15માંથી 12 સભ્યોએ સરપંચ સામે અવિશ્વાસની દરખાસ્ત મૂકી

મળતી માહિતી મુજબ, ગત 14 ઓક્ટોબરના રોજ ગ્રામ પંચાયતના 15માંથી 12 સભ્યોએ સરપંચ સામે અવિશ્વાસની દરખાસ્ત રજૂ કરી હતી. આ દરખાસ્ત અંગે સુનાવણી અને કાર્યવાહી માટે આજે સામાન્ય સભા બોલાવવામાં આવી હતી.

સભામાં હાજરી આપવા માટે આઠ સભ્યો એક જ ગાડીમાં પંચાયત કચેરીએ પહોંચ્યા હતા. જોકે, ત્યાં સરપંચના સમર્થકોએ તેમને ગાડીમાંથી બહાર આવતાં રોક્યા હોવાનો આક્ષેપ છે. આ દરમિયાન ગાડીના કાચની તોડફોડ કરવામાં આવી હોવાની પણ ફરિયાદ સામે આવી છે.

ત્રણ સભ્યોને રૂમમાં પૂરી રાખ્યાનો આક્ષેપ

પંચાયત પરિસરમાં સર્જાયેલી અફરાતફરી વચ્ચે ત્રણ સભ્યોને પંચાયતના રૂમમાં પૂરી દેવામાં આવ્યા હોવાનો આક્ષેપ થયો છે. બીજી તરફ, ગાડીમાં આવેલા આઠ સભ્યોને બહાર ઉતરવા ન દેવાતાં તેઓ સામાન્ય સભામાં હાજરી આપી શક્યા નહોતા. ઘટનાને પગલે પંચાયત પરિસરમાં તંગદિલીનો માહોલ સર્જાયો હતો.

સભા મોકૂફ રાખવાની ફરજ પડી

સભ્યો સમયસર અને નિયમ મુજબ સભાખંડમાં હાજર ન રહી શકતાં ગ્રામ પંચાયતની સામાન્ય સભા મોકૂફ રાખવામાં આવી હતી. બહુમતી સભ્યો દ્વારા અવિશ્વાસની દરખાસ્ત રજૂ કરવામાં આવી હોવા છતાં સભા યોજાઈ ન શકતાં સ્થાનિક રાજકારણમાં ગરમાવો આવી ગયો છે.

ઘટનાને પગલે સભ્યોને રોકવા, રૂમમાં પૂરી રાખવા અને વાહનોમાં તોડફોડ કરવાના આક્ષેપો અંગે કાયદાકીય કાર્યવાહી થશે કે કેમ તે અંગે હવે સૌની નજર પોલીસ અને વહીવટી તંત્રના આગળના પગલાં પર છે.

આ પણ વાંચો: નસવાડી સરકારી બી.એડ્ કૉલેજના વિદ્યાર્થીઓએ તાલુકા કક્ષાની ખેલ મહાકુંભ સ્પર્ધામાં ઝળક્યા

આ પણ વાંચો: નસવાડી APMC ચૂંટણી પરિણામ: ભાજપ પ્રેરિત સહકાર પેનલનો વિજય, ખેડૂત વિભાગની 10 બેઠકો કબજે

આ પણ વાંચો: નસવાડીમાં ₹500માં બોગસ ST દાખલો બનાવવાના આક્ષેપ, VCEની ધરપકડથી કૌભાંડ પર સવાલો