અમેરિકામાં મંકીપોક્સને જાહેર આરોગ્ય કટોકટી જાહેર કરવામાં આવી છે. સ્વાસ્થ્ય અને માનવ સેવા સચિવ ઝેવિયર બેસેરાએ ગુરુવારે આ માહિતી આપી હતી. ઉલ્લેખનીય છે કે દુનિયામાં મંકીપોક્સનો ભયંકર પ્રકોપ છે. આ ખતરનાક રોગ અત્યાર સુધીમાં 75 થી વધુ દેશોમાં ફેલાઈ ચૂક્યો છે. વિશ્વમાં 20 હજારથી વધુ કેસ નોંધાયા છે. આફ્રિકન દેશોમાં આ રોગને કારણે લગભગ 75 લોકોના મોત થયા છે.
ભૂતકાળમાં વિશ્વ આરોગ્ય સંસ્થા (WHO) એ મંકીપોક્સને લઈને વૈશ્વિક સ્વાસ્થ્ય ઈમરજન્સી જાહેર કરી હતી. જણાવી દઈએ કે આ પહેલા WHOએ પોલિયો, કોરોના, ઈબોલા, ઝીકા વાયરસ માટે ઈમરજન્સી જાહેર કરી હતી. સેન્ટર્સ ફોર ડિસીઝ કંટ્રોલ એન્ડ પ્રિવેન્શન મુજબ, વિશ્વભરમાં અત્યાર સુધીમાં મંકીપોક્સના 26000 થી વધુ કેસ નોંધાયા છે.
ન્યુયોર્કમાં સૌથી વધુ કેસો
નોંધનીય છે કે મંકીપોક્સના સૌથી વધુ કેસ ન્યુયોર્કમાં છે. મંકીપોક્સને ગયા અઠવાડિયે અહીં જાહેર આરોગ્ય કટોકટી જાહેર કરવામાં આવી હતી. આ પછી કેલિફોર્નિયા અને ઇલિનોઇસે આ ખતરનાક રોગને સ્વાસ્થ્ય કટોકટી જાહેર કરી.
રસી અંગે બિડેન સરકારની ટીકા
ઉલ્લેખનીય છે કે મંકીપોક્સ રસીની ઉપલબ્ધતાને લઈને બિડેન પ્રશાસનને ટીકાઓનો સામનો કરવો પડ્યો છે. ન્યુ યોર્ક અને સાન ફ્રાન્સિસ્કો જેવા મોટા શહેરોના ક્લિનિક્સ કહે છે કે તેમને માંગને પહોંચી વળવા માટે બે-ડોઝ રસીના પૂરતા ડોઝ મળ્યા નથી. કેટલાકે તો પ્રથમ ડોઝની સપ્લાય સુનિશ્ચિત કરવા માટે બીજો ડોઝ આપવાનું બંધ કરવું પડ્યું હતું.નિષ્ણાતોના મતે, મંકીપોક્સ પશ્ચિમ અને મધ્ય આફ્રિકાના ઘણા ભાગોમાં દાયકાઓથી હાજર છે, પરંતુ ઓછામાં ઓછા મે મહિનાથી આ રોગ યુરોપ, ઉત્તર અમેરિકા અને અન્ય સ્થળોએ ગે અને બાયસેક્સ્યુઅલ લોકોમાં ફેલાયો છે
