Gandhinagar News: વિદેશ જવાની લાલચ આપી લોકો પાસેથી રૂપિયા પડાવી લેવાના કિસ્સાઓ વચ્ચે અમદાવાદમાં વિઝા ફ્રોડનો વધુ એક મામલો સામે આવ્યો છે. કેનેડા અને ઓસ્ટ્રેલિયાના વિઝા (Canada Australia Visa Fraud) તથા વર્ક પરમિટ અપાવવાની ખાતરી આપીને ત્રણ વ્યક્તિઓ પાસેથી રૂ.25 લાખથી વધુની રકમ લેવામાં આવી હોવાનો આક્ષેપ છે. આ મામલે ગાંધીનગરના નીતીશ રાવલ અને તેના પુત્ર દેવ રાવલ સામે અમદાવાદના નરોડા પોલીસ સ્ટેશનમાં ફરિયાદ નોંધાઈ છે. ફરિયાદ મુજબ, પિતા-પુત્રે અલગ-અલગ લોકોને વિદેશ મોકલવાની વાત કરી તેમની પાસેથી લાખો રૂપિયા લીધા હતા.
કેનેડા મોકલવાના નામે રૂ.6 લાખ લીધા
ફરિયાદ મુજબ, આરોપીઓએ કેનેડા મોકલવાના નામે ગૌતેશકુમાર નામના યુવક પાસેથી રૂ.6 લાખ લીધા હતા. તેવી જ રીતે ઓસ્ટ્રેલિયા મોકલવાની વાત કરી જગદીશ પટેલ પાસેથી રૂ.9.50 લાખની રકમ લેવામાં આવી હતી. આ ઉપરાંત અન્ય એક વ્યક્તિ પાસેથી વર્ક પરમિટ વિઝા (Canada Australia Visa Fraud) અપાવવાની વાત કરી રૂ.10 લાખ લેવામાં આવ્યા હોવાનો પણ આક્ષેપ છે. શરૂઆતમાં વિઝિટર વિઝા કરાવી આપ્યા બાદ તેને વર્ક પરમિટમાં કન્વર્ટ કરાવી આપવાની લાલચ આપવામાં આવી હતી.
Canada Australia Visa Fraud: વિઝા ન મળતા બોગસ ટિકિટ અને દસ્તાવેજો આપ્યાનો આક્ષેપ
ફરિયાદમાં જણાવ્યા મુજબ, લાંબો સમય પસાર થયા બાદ પણ વિઝા પ્રક્રિયા પૂર્ણ ન થતાં પીડિતોએ આરોપીઓ પાસે રકમ પરત કે વિઝા અંગે સ્પષ્ટતા માગી હતી. ત્યારે તેમને અલગ-અલગ બહાના બતાવવામાં આવ્યા હતા. આરોપીઓએ યુવકોના નામે કથિત બોગસ એર ટિકિટો અને અન્ય દસ્તાવેજો આપીને સમય પસાર કરવાનો પ્રયાસ કર્યો હોવાનો પણ ફરિયાદમાં આક્ષેપ કરવામાં આવ્યો છે.
નરોડા પોલીસે તપાસ શરૂ કરી
પોતાની સાથે છેતરપિંડી થઈ હોવાની જાણ થતાં પીડિતોએ પોલીસનો સંપર્ક કર્યો હતો. ત્યારબાદ નરોડા પોલીસ સ્ટેશનમાં નીતીશ રાવલ અને દેવ રાવલ વિરુદ્ધ છેતરપિંડી સહિતની સંબંધિત કલમો હેઠળ ફરિયાદ નોંધવામાં આવી છે. પોલીસે સમગ્ર મામલે તપાસ શરૂ કરી છે. ફરિયાદમાં કરવામાં આવેલા આક્ષેપોની ચકાસણી સાથે આરોપીઓએ અન્ય કેટલા લોકો પાસેથી આ રીતે રૂપિયા લીધા છે અને વિઝા પ્રક્રિયાના નામે કયા દસ્તાવેજો આપવામાં આવ્યા હતા તે સહિતના મુદ્દે તપાસ હાથ ધરવામાં આવી રહી છે.
વિદેશ જવાની લાલચમાં સાવચેતી જરૂરી
વિદેશમાં નોકરી કે વર્ક પરમિટ અપાવવાના નામે થતી છેતરપિંડીના કિસ્સાઓમાં અરજદારો માટે સાવચેતી રાખવી જરૂરી છે. કોઈપણ એજન્ટ અથવા વ્યક્તિને મોટી રકમ ચૂકવતા પહેલાં તેની વિશ્વસનીયતા, વિઝા પ્રક્રિયા અને દસ્તાવેજોની અધિકૃતતા ચકાસવી જરૂરી છે.
આ પણ વાંચો:હિંમતનગર વિઝા છેતરપિંડી કેસ: પ્રીતિ ઈન્સ્ટિટ્યૂટ સંચાલિકા સામે વધુ ફરિયાદો, 1.37 કરોડની ઠગાઈનો આરોપ
આ પણ વાંચો:સુરતના પાલમાં વિઝા કૌભાંડનો પર્દાફાશ, કરોડોની છેતરપિંડી કરનાર એજન્ટ ઝડપાયોમહેસાણામાં અમેરિકામાં વિઝાના નામે 6.80 લાખ રૂપિયાની છેતરપિંડી
આ પણ વાંચો:મહેસાણામાં અમેરિકામાં વિઝાના નામે 6.80 લાખ રૂપિયાની છેતરપિંડી
