Reaction in Adani case: અદાણી ગ્રૂપના શેરમાં ઘટાડાની વચ્ચે નાણામંત્રી નિર્મલા સીતારમણે પ્રથમ વખત મોટું નિવેદન આપ્યું છે. નાણામંત્રીએ કહ્યું કે દેશના બજારની યોગ્ય રીતે દેખરેખ કરવામાં આવી છે. આ સાથે તેમણે એવી પણ આશા વ્યક્ત કરી હતી કે ગૌતમ અદાણી પરનો વિવાદ રોકાણકારોના વિશ્વાસને અસર કરશે નહીં. તો નાણામંત્રીએ SBI અને LIC અંગે પણ તેમની ખાતરી વ્યક્ત કરી હતી. નોંધપાત્ર વાત એ છે કે ગયા અઠવાડિયે હિંડનબર્ગનો રિપોર્ટ બહાર આવ્યા બાદ અદાણી ગ્રુપના શેરમાં 120 બિલિયન ડોલરથી વધુનો ઘટાડો થયો હતો. આ ઘટાડો કંપનીના કુલ મૂલ્યનો અડધો ભાગ છે.
નાણામંત્રી નિર્મલા સીતારમણે જણાવ્યું કે એક ઘટના પરથી કંઈપણ નક્કી કરવું ખોટું હશે. નાણામંત્રીએ કહ્યું કે SBI અને LIC સંપૂર્ણપણે સુરક્ષિત છે. નિર્મલા સીતારમણે કહ્યું કે તે અહીં અને ત્યાં વાત કરવાને બદલે આ કંપનીઓના વડાઓની વાત પર વિશ્વાસ કરશે. SBI અને LIC બંનેએ વિગતવાર નિવેદનો જારી કર્યા છે. નાણામંત્રીએ કહ્યું કે હાલમાં બંને નફાકારક છે અને જે પણ ખરીદી કરવામાં આવી છે તે નિર્ધારિત મર્યાદામાં કરવામાં આવી છે. નિર્મલા સીતારમણે એમ પણ કહ્યું હતું કે મૂલ્યાંકન ઘટી રહ્યું હોવા છતાં બંને કંપનીઓ હાલમાં નફાકારક છે. અદાણી કટોકટી પર વૈશ્વિક ખળભળાટ અંગે સીતારમણે કહ્યું કે ભારત હજુ પણ પહેલા જેવી જ સ્થિતિમાં છે. અમારું ગવર્નન્સ સારું છે, સરકાર સ્થિર છે અને અમે ફાઇનાન્શિયલ માર્કેટ પર સારી રીતે નજર રાખી રહ્યા છીએ. આના પરિણામે આજે પણ રોકાણકારોનો વિશ્વાસ અકબંધ છે.
નાણામંત્રીએ કહ્યું કે ભારતીય બેંકિંગ સેક્ટર પણ ખૂબ જ સુરક્ષિત સ્થિતિમાં છે. તેમણે કહ્યું કે તે આ વાત પૂરી જવાબદારી સાથે કહી રહી છે. NPAમાં સતત ઘટાડો થઈ રહ્યો છે અને રિકવરી પણ સતત થઈ રહી છે. ઉલ્લેખનીય છે કે હિંડનબર્ગ રિપોર્ટમાં અદાણી ગ્રૂપ પર અનેક આરોપો લગાવવામાં આવ્યા છે. જેમાં એકાઉન્ટિંગમાં છેતરપિંડી સાથે શેરના ભાવમાં ખોટી રીતે વધારો કરવાની વાત પણ કહેવામાં આવી છે. રિપોર્ટમાં તેને સ્ટોક મેનીપ્યુલેશન અને એકાઉન્ટિંગ ફ્રોડ સ્કીમ તરીકે નામ આપવામાં આવ્યું છે. તેમજ તેને કોર્પોરેટ ઈતિહાસની સૌથી મોટી છેતરપિંડી ગણાવી છે.
આ પણ વાંચો: ADANI GROUP/‘વિશ્વની ત્રીજી સૌથી ધનિક વ્યક્તિ કેવી રીતે સૌથી મોટી છેતરપિંડી કરી રહી છે
