Gujarat Government Administrative Changes : ગુજરાત સરકારના સામાન્ય વહીવટ વિભાગ (GAD) દ્વારા રાજ્યના વહીવટી માળખાને વધુ મજબૂત અને વેગવંતું બનાવવા માટે એક અત્યંત મહત્ત્વનો સરકારી આદેશ જાહેર કરવામાં આવ્યો છે. વહીવટી તંત્રની સુચારૂ કામગીરી અને સરકારી પ્રક્રિયાઓને ગતિ આપવા માટે રાજ્યના 6 વરિષ્ઠ પ્રશાસનિક અધિકારીઓને અન્ય મહત્ત્વના વિભાગો અને હોદ્દાઓનો વધારાનો પ્રભાર (વધારાનો હવાલો) સોંપવામાં આવ્યો છે. તાજેતરમાં વયનિવૃત્ત થયેલા વરિષ્ઠ અધિકારીઓને કારણે ખાલી પડેલી જગ્યાઓ પર કામકાજ ન ખોરવાય તે માટે સરકારે આ તાત્કાલિક નિમણૂકો કરી છે.
રાજ્યપાલના આદેશથી સામાન્ય વહીવટ વિભાગનું જાહેરનામું
રાજ્યપાલના આદેશથી સામાન્ય વહીવટ વિભાગ (General Administration Department) ના નાયબ સચિવ જૈમીન શાહ દ્વારા આ અંગેનું સત્તાવાર જાહેરનામું (Notification) બહાર પાડવામાં આવ્યું છે. આ સરકારી આદેશ અનુસાર, રાજ્યના 4 વરિષ્ઠ ભારતીય વહીવટી સેવા (IAS) અને 2 ગુજરાત વહીવટી સેવા (GAS) અધિકારીઓને તેમની વર્તમાન મૂળ જવાબદારીઓની સાથે-સાથે અન્ય ખાલી પડેલા મહત્વના વિભાગોનો વધારાનો હવાલો સંભાળવાનો આદેશ અપાયો છે.
Gujarat : શા માટે લેવાયો આ મહત્વનો નિર્ણય?
ગાંધીનગર સચિવાલયના સોર્સના જણાવ્યા અનુસાર, તાજેતરમાં કેટલાક વરિષ્ઠ સનદી અધિકારીઓ વયનિવૃત્ત (Retire) થયા હતા. આ નિવૃત્તિના કારણે રાજ્યના કેટલાક અતિ મહત્વના ગણાતા સરકારી વિભાગોમાં મુખ્ય હોદ્દાઓ ખાલી પડ્યા હતા. સરકારી સ્તરની ફાઈલોની અવરજવર, નીતિવિષયક નિર્ણયો અને જનહિતના કામકાજ કોઈ પણ અડચણ વિના સમયસર ચાલતા રહે તે હેતુથી આ આંતરિક વહીવટી વ્યવસ્થા ઊભી કરવામાં આવી છે.
આ આદેશને પગલે વરિષ્ઠ અધિકારીઓ હવે તાત્કાલિક અસરથી પોતાના મૂળ પદની સાથે નવા સોંપાયેલા વિભાગોનો વધારાનો ચાર્જ પણ સંભાળી લેશે.
