Gujarat News: ગુજરાતના રાજકારણમાં ભાજપના ધારાસભ્ય હાર્દિક પટેલ (Hardik Patel) ફરી એકવાર પોતાની સોશિયલ મીડિયા પોસ્ટને લઈને ચર્ચામાં આવ્યા છે. વિરમગામના ધારાસભ્ય હાર્દિક પટેલે સોશિયલ મીડિયા સ્ટોરીમાં દેડકાનું કાર્ટૂન શેર કરીને એક કટાક્ષભર્યો સંદેશ પોસ્ટ કર્યો હતો, જેના કારણે રાજકીય વર્તુળોમાં અનેક અટકળો શરૂ થઈ ગઈ છે.
Hardik Patelની પોસ્ટથી રાજકારણ ગરમાયું
હાર્દિક પટેલે (Hardik Patel) પોતાની પોસ્ટમાં દેડકાનું ચિત્ર મૂકીને તેના ઉપર લખ્યું હતું કે, “દેડકાને સોનાના હિંચકા પર બેસાડો તો પણ છલાંગ તો ખાડામાં જ મારશે.” આ સાથે તેમણે વધુમાં લખ્યું કે, “ગમે તેવી સલાહ આપશો તો પણ વિરોધીઓ વિરોધ જ કરશે.”
આ પોસ્ટ કોને ધ્યાનમાં રાખીને કરવામાં આવી છે તે અંગે હજી સુધી કોઈ સ્પષ્ટતા થઈ નથી, પરંતુ રાજકીય વર્તુળોમાં આ પોસ્ટને લઈને ભારે ચર્ચા શરૂ થઈ ગઈ છે. હાર્દિક પટેલે પોતાના વિરોધીઓને નિશાન બનાવ્યા છે કે પક્ષની અંદરના કોઈ નેતાઓને ઈશારો કર્યો છે તે અંગે અનેક અટકળો ચાલી રહી છે.
હાર્દિક પટેલ (Hardik Patel) તેમના વેધક નિવેદનો અને આંદોલનકારી છબી માટે જાણીતા રહ્યા છે. અગાઉ તેઓ જાહેર મંચ પરથી તીખા પ્રહાર કરતા હતા, પરંતુ હવે તેઓ સોશિયલ મીડિયા મારફતે સંકેતાત્મક અને કટાક્ષભરી પોસ્ટ દ્વારા પોતાની વાત પહોંચાડતા જોવા મળે છે. રાજકારણમાં સક્રિય થયા બાદ હાર્દિક પટેલ વારંવાર સોશિયલ મીડિયા પોસ્ટથી ચર્ચા જગાવતા રહ્યા છે. તેઓ સીધું નામ લીધા વગર કટાક્ષભર્યા શબ્દોનો ઉપયોગ કરીને સંદેશ આપતા હોય છે, જેના કારણે તેમના પોસ્ટ બાદ રાજકીય માહોલ ગરમાઈ જતો હોય છે.
ઉલ્લેખનીય છે કે તાજેતરમાં ગુજરાત વિધાનસભાની ગૌણ વિધાન સમિતિના પ્રમુખ તરીકે પણ હાર્દિક પટેલની નિમણૂંક કરવામાં આવી છે. આ સમિતિ સરકાર દ્વારા અમલમાં મુકાતા નિયમો અને પ્રક્રિયાઓની સમીક્ષા કરીને તે કાયદાની મર્યાદામાં અને જનહિતમાં છે કે નહીં તેની દેખરેખ રાખે છે. સમિતિમાં કુલ 10 ધારાસભ્યોનો સમાવેશ થાય છે.
હાલ હાર્દિક પટેલની આ પોસ્ટ બાદ સોશિયલ મીડિયા અને રાજકીય વર્તુળોમાં એક જ ચર્ચા ચાલી રહી છે કે આખરે આ ‘દેડકા’ વાળો કટાક્ષ કોના માટે હતો?
આ પણ વાંચો:હાર્દિક પટેલને ગુજરાત વિધાનસભાની ગૌણ વિધાન સમિતિના પ્રમુખપદની જવાબદારી
આ પણ વાંચો:હાર્દિક પટેલને મોટી રાહત, 2018 નિકોલ પોલીસ કેસ પરત ખેંચવાની પ્રક્રિયા તેજ
આ પણ વાંચો:સોશિયલ મીડિયામાં કરાતા આક્ષેપોની પરવા નથી, હું ચૂપ રહેવાનો નથીઃ હાર્દિક પટેલ
