દક્ષિણ ગુજરાતના કેટલાક ભાગોમાં ભારે વરસાદ ને કારણે કેટલીક નદીઓના જળસ્તરમાં વધારો થયો છે અને વિવિધ નીચાણવાળા વિસ્તારોમાં પાણી ભરાયા છે. નવસારી અને વલસાડ જિલ્લામાંથી 700થી વધુ લોકોને સલામત સ્થળે ખસેડવામાં આવ્યા હતા. અધિકારીઓએ રવિવારે આ જાણકારી આપી. તેમણે જણાવ્યું હતું કે ઓરસંગ નદીના પાણીના સ્તરમાં વધારો થતાં વલસાડના કેટલાક નીચાણવાળા વિસ્તારોમાં પાણી ભરાયા હતા. કાવેરી અને અંબિકા નદીઓ ખતરાના નિશાનથી ઉપર વહી રહી હોવાથી નવસારી જિલ્લાના અધિકારીઓ પણ એલર્ટ પર છે.
વલસાડ અને નવસારી જિલ્લામાં શનિવારે રાત્રે અને રવિવારે સવારે ખૂબ જ ભારે વરસાદ થયો હતો, એમ અધિકારીઓએ જણાવ્યું હતું. તેમણે કહ્યું કે છોટા ઉદેપુર અને નર્મદા જિલ્લામાં પણ ભારે વરસાદ થયો છે, જેના કારણે નદીઓ વહેતી થઈ છે અને નીચાણવાળા વિસ્તારોમાં પાણી ભરાઈ ગયા છે. ભારતીય હવામાન વિભાગ (IMD) એ રવિવારે દક્ષિણ ગુજરાતના ડાંગ, નવસારી અને વલસાડ જિલ્લામાં આગામી પાંચ દિવસ દરમિયાન ભારેથી અતિભારે વરસાદની આગાહી કરી છે. IMD એ જણાવ્યું છે કે દક્ષિણ ગુજરાત અને સૌરાષ્ટ્રના અન્ય ઘણા જિલ્લાઓમાં પણ આ સમયગાળા દરમિયાન ભારેથી અતિભારે વરસાદની અપેક્ષા છે.
જિલ્લા મેજિસ્ટ્રેટ અમિત પ્રકાશ યાદવે જણાવ્યું હતું કે, “નવસારી જિલ્લામાં કાવેરી અને અંબિકા નદીઓ ખતરાના નિશાનથી ઉપર વહી રહી છે. અમે નીચાણવાળા વિસ્તારોમાંથી લોકોને બહાર કાઢી રહ્યા છીએ. અત્યાર સુધીમાં 300 થી વધુ લોકોને સુરક્ષિત સ્થળોએ ખસેડવામાં આવ્યા છે અને નેશનલ ડિઝાસ્ટર રિસ્પોન્સ ફોર્સ (NDRF)ની એક કંપનીની મદદથી ઓપરેશન ચાલુ છે.
વલસાડમાં ઓરસંગ નદીનું જળસ્તર વધતાં અને નીચાણવાળા વિસ્તારોમાં પાણી ભરાઇ જતાં 400 થી વધુ લોકોને સલામત સ્થળે ખસેડવામાં આવ્યા હતા, એમ અધિકારીઓએ જણાવ્યું હતું. તેમણે કહ્યું કે રવિવારે વલસાડમાં થોડી રાહત થઈ હતી અને પાણીનું સ્તર ઘટ્યું હતું, ત્યારબાદ લોકો તેમના ઘરે પાછા ફરવા લાગ્યા હતા.
શનિવારથી પડી રહેલા ભારે વરસાદને કારણે દક્ષિણ અને મધ્ય ગુજરાત અને સૌરાષ્ટ્ર વિસ્તારમાં અનેક ડેમ છલકાઈ ગયા છે અને નદીઓ વહેતી થઈ છે. અનેક નદીઓ ખતરાના નિશાનની નજીક વહી રહી છે, જેના કારણે સંબંધિત વહીવટીતંત્રને સતર્ક રહેવાની સૂચના આપવામાં આવી છે.
સ્ટેટ ઇમરજન્સી ઓપરેશન સેન્ટર (SEOC) દ્વારા શેર કરાયેલ ડેટા મુજબ, વલસાડ જિલ્લાના ધરમપુર તાલુકા અને નવસારીના વાંસદામાં રવિવારે સવારે 6 વાગ્યા સુધીના 24 કલાકના સમયગાળામાં અનુક્રમે 216 અને 213 મિમી વરસાદ નોંધાયો હતો.
આ પણ વાંચો:રાજ્યમાં ભારે વરસાદના લીધે સરકાર એલર્ટ,NDRFની 13 ટીમ જુદા જુદા જિલ્લામાં રવાના કરાઇ
આ પણ વાંચો:અમદાવાદના પ્રહલાદનગરમાં ઐાડા તળાવની પાળ તૂટતાં પાણી વ્રજવિહાર એપાર્ટમેન્ટમાં ઘૂસ્યાં
આ પણ વાંચો:અમદાવાદના આ કર્મચારીએ અવિરત વરસાદમાં કર્યું આ કામ,તમે પણ દિલથી કરશો સલામ!
