ભારત અને દક્ષિણ આફ્રિકા વચ્ચે રમાઈ રહેલી T20 સીરિઝ માટે ICC દ્વારા નવી રેન્કિંગ પણ જાહેર કરવામાં આવી છે. આ દરમિયાન મોટી વાત એ છે કે ભારતીય T20 ટીમનો કેપ્ટન સૂર્યકુમાર યાદવ હજુ પણ સારા ફોર્મમાં છે, જ્યારે પાકિસ્તાનનો મોહમ્મદ રિઝવાન ઘણો પાછળ રહી ગયો છે. આટલું જ નહીં છેલ્લા કેટલાક સમયથી T20માં શાનદાર બેટિંગ કરી રહેલી રિંકુ સિંહે પણ જબરદસ્ત છલાંગ લગાવી છે.
ICC દ્વારા જાહેર કરવામાં આવેલ T20 રેન્કિંગમાં સૂર્યકુમાર યાદવે દસ રેટિંગ મેળવ્યા છે. અગાઉ જ્યારે ગયા અઠવાડિયે રેટિંગ બહાર પાડવામાં આવ્યું હતું, ત્યારે તેનું રેટિંગ 855 હતું, જે હવે વધીને 865 થઈ ગયું છે. દક્ષિણ આફ્રિકા સામેની બીજી T20 મેચમાં સૂર્યકુમાર યાદવે 36 બોલમાં 56 રન બનાવ્યા હતા. આનો તેમને ફાયદો થયો છે. બીજા સ્થાને પાકિસ્તાનનો મોહમ્મદ રિઝવાન છે જે હવે સૂર્યકુમાર યાદવ કરતાં ઘણો પાછળ છે. રિઝવાનનું રેટિંગ હવે 787 છે. એટલે કે અત્યારે કોઈ એવો બેટ્સમેન દેખાતો નથી જે સૂર્યકુમાર યાદવને નંબર વનના સ્થાનેથી હટાવી શકે.
સૂર્યકુમાર યાદવ અને મોહમ્મદ રિઝવાન બાદ ત્રીજા સ્થાને દક્ષિણ આફ્રિકાનો એડન માર્કરામ છે. આ પહેલા એડન માર્કરામ 756 રેટિંગ સાથે ત્રીજા સ્થાને હતો. તેના રેટિંગમાં થોડો વધારો થયો છે, પરંતુ તે હજુ પણ ત્રીજા સ્થાને છે. પાકિસ્તાનના પૂર્વ કેપ્ટન બાબર આઝમ 734 રેટિંગ સાથે ચોથા સ્થાને છે. દક્ષિણ આફ્રિકાની રિલે રૂસો 695 રેટિંગ સાથે પાંચમા નંબરે છે.
ઈંગ્લેન્ડનો ઓપનર ડેવિડ મલાન 691 રેટિંગ સાથે છઠ્ઠા નંબર પર યથાવત છે. આ દરમિયાન ટીમ ઈન્ડિયાનો ઓપનિંગ બેટ્સમેન રૂતુરાજ ગાયકવાડ સાતમા સ્થાને યથાવત છે. અગાઉ ગાયકવાડનું રેટિંગ 688 હતું જે હવે 691 થઈ ગયું છે. ગાયકવાડ ખરાબ તબિયતના કારણે દક્ષિણ આફ્રિકા સામેની શ્રેણીની બીજી મેચમાં રમી શક્યો ન હતો. દક્ષિણ આફ્રિકાના રીઝા હેન્ડ્રિક્સ 674 રેટિંગ સાથે આઠમા સ્થાને છે અને ઈંગ્લેન્ડના કેપ્ટન જોસ બટલર 666 રેટિંગ સાથે નવમા સ્થાને છે. દસમા સ્થાને ન્યુઝીલેન્ડના ગ્લેન ફિલિપ્સ છે, જેનું રેટિંગ 649 છે.
આ દરમિયાન ખાસ વાત એ છે કે ભારતીય ટીમના સ્ટાર ખેલાડીઓમાંથી એક યુવા બેટ્સમેન રિંકુ સિંહ ટોપ 100માં સામેલ થઈ ગયો છે. રિંકુ સિંહ સીધા 59માં સ્થાને આવી ગયા છે. તેનું રેટિંગ 464 છે. તેણે સાઉથ આફ્રિકા સામે શાનદાર આક્રમક અડધી સદી ફટકારી છે. ટી20 ઈન્ટરનેશનલમાં આ તેની પ્રથમ અડધી સદી છે. આનો ફાયદો તેમને નવી T20 રેન્કિંગમાં જોવા મળી રહ્યો છે. તેઓ આવનારા સમયમાં હજુ પણ આગળ વધી શકે છે. ભારત અને દ.આફ્રિકા વચ્ચે ત્રીજી અને છેલ્લી મેચ 14 ડિસેમ્બરે રમાશે.
આ પણ વાંચો:
આ પણ વાંચો:
આ પણ વાંચો:
