Breaking News: જામનગર શહેરના રાજપાર્ક વિસ્તારમાં આવેલા રંગમતી પાર્કની શેરી નંબર-2માં એક મકાનનો સ્લેબ અચાનક ધસી પડતાં (House Slab Collapse) એક જ પરિવારના ત્રણ સભ્યો ઈજાગ્રસ્ત થયા હતા. ઘટના સમયે પરિવાર ઘરમાં આરામ કરી રહ્યો હતો ત્યારે છતનો સ્લેબ તૂટી પડતાં અફરાતફરી મચી ગઈ હતી. ઘટનાની જાણ થતાં જ ફાયર વિભાગ અને 108 ઈમરજન્સી સેવા તાત્કાલિક સ્થળ પર પહોંચી હતી અને બચાવ કામગીરી શરૂ કરી હતી.
કાટમાળ નીચે દબાયેલા પરિવારને સુરક્ષિત બહાર કાઢાયા
ફાયર વિભાગની ટીમે યુદ્ધના ધોરણે કામગીરી હાથ ધરી કાટમાળ નીચે દબાયેલા પરિવારના ત્રણેય સભ્યોને બહાર કાઢ્યા હતા. ત્યારબાદ ઈજાગ્રસ્તોને તાત્કાલિક સારવાર માટે જામનગરની જી.જી. હોસ્પિટલમાં ખસેડવામાં આવ્યા હતા.સમયસર બચાવ કામગીરી થતાં વધુ મોટી જાનહાનિ ટળી હોવાનું સ્થાનિકોએ જણાવ્યું હતું.
House Slab Collapse: ત્રણેય ઈજાગ્રસ્તોની હાલત સ્થિર
આ દુર્ઘટનામાં ઈજાગ્રસ્ત થયેલા લોકોમાં 54 વર્ષીય પ્રતાપગીરી ગોસ્વામી, 47 વર્ષીય ડોલીબેન પ્રતાપગીરી ગોસ્વામી અને 24 વર્ષીય સાગર પ્રતાપગીરી ગોસ્વામીનો સમાવેશ થાય છે. ડોક્ટરોના જણાવ્યા અનુસાર, પ્રતાપગીરીને પ્રાથમિક સારવાર બાદ નિરીક્ષણ હેઠળ રાખવામાં આવ્યા છે. ડોલીબેનના માથામાં ગંભીર ઈજા થતાં ટાંકા લેવામાં આવ્યા છે, જ્યારે સાગરને સામાન્ય ઈજાઓ થતાં જરૂરી સારવાર આપવામાં આવી છે.
સ્લેબ ધસી પડવાનું કારણ તપાસ હેઠળ
હાલ મકાનનો સ્લેબ કયા કારણોસર ધસી પડ્યો તેની તપાસ કરવામાં આવી રહી છે. સ્થાનિક તંત્ર દ્વારા પણ ઘટનાની માહિતી મેળવી આગળની કાર્યવાહી હાથ ધરવામાં આવી છે. જી.જી. હોસ્પિટલના તબીબોના જણાવ્યા મુજબ, ત્રણેય ઈજાગ્રસ્તોની સ્થિતિ હાલ સ્થિર છે અને તેઓ સારવાર હેઠળ છે.
આ પણ વાંચો:સુરતમાં જર્જરિત મકાનનો સ્લેબ ધરાશાયી, મેડિકલ સ્ટોરના 75 વર્ષીય માલિકનું મોત
આ પણ વાંચો:પાલડીમાં ‘વર્ધમાન ફ્લેટ’ની ગેલેરીનો સ્લેબ અચાનક તૂટી પડ્યો, સ્થાનિકોમાં ફેલાયો ભય
આ પણ વાંચો:અમદાવાદના મેમનગરમાં મકાનની ગેલેરીનો સ્લેબ તૂટી પડતા એક વ્યક્તિનું મોત
