Rajkot News : રાજકોટમાં તિરંગા યાત્રા (Rajkot Tiranga Yatra)બાદ કોર્પોરેશનની એજન્સીની બેદરકારી સામે આવી છે. શહેરના બહુમાળી ચોક (Bahumali Chowk) વિસ્તારમાં રસ્તા પર મંડપ સર્વિસ માટે ઉપયોગમાં લેવાયેલી ખીલીઓ જોવા મળતાં વાહનચાલકોની મુશ્કેલી વધી છે.
સ્થળ પર રસ્તા પર છૂટીછવાઈ પડેલી ખીલીઓના કારણે ટૂ-વ્હીલર સહિત અન્ય વાહનોના ટાયર પંચર થવાની ફરિયાદો સામે આવી રહી છે. વાહનચાલકો માટે રસ્તા પર પડેલી આ ખીલીઓ અકસ્માતનું કારણ પણ બની શકે છે.
રાજકોટમાં તિરંગા યાત્રા (Rajkot Tiranga Yatra)બાદ રસ્તા પરથી ખીલી સહિતની સામગ્રી દૂર કરવાની જવાબદારી સંબંધિત એજન્સીની
તિરંગા યાત્રા માટે મંડપ સહિતની વ્યવસ્થા કરવામાં આવી હતી. કાર્યક્રમ પૂર્ણ થયા બાદ સ્થળની સફાઈ અને રસ્તા પરથી ખીલી સહિતની સામગ્રી દૂર કરવાની જવાબદારી સંબંધિત એજન્સીની હોવાનું માનવામાં આવે છે. જોકે, બહુમાળી ચોક વિસ્તારમાં રસ્તા પર ખીલીઓ રહી જતાં એજન્સીની કામગીરી સામે સવાલો ઉઠ્યા છે.
વાહનચાલકોનું કહેવું છે કે રસ્તા પર પડેલી નાની ખીલીઓ દેખાતી ન હોવાથી અચાનક ટાયર પંચર થઈ શકે છે અને વાહનનું સંતુલન ગુમાવવાથી અકસ્માતની શક્યતા પણ રહે છે.
હવે સવાલ એ છે કે કોર્પોરેશન (Rajkot Corporation)તંત્ર આ બેદરકારીની નોંધ લઈને સંબંધિત મંડપ સર્વિસ એજન્સી સામે કોઈ કાર્યવાહી કરશે કે નહીં? તેમજ રસ્તા પરથી ખીલીઓ સહિતની સામગ્રી તાત્કાલિક દૂર કરવામાં આવશે કે નહીં તે જોવું રહ્યું.
