ગયા જૂનમાં ઓડિશાના બાલાસોરમાં થયેલા ભયાનક ટ્રેન દુર્ઘટના કેસમાં CBIએ ચાર્જશીટ દાખલ કરી છે. શનિવારે દાખલ કરવામાં આવેલી ચાર્જશીટમાં CBIએ ત્રણ કર્મચારીઓ સામે અંતર્ગત દોષિત હત્યાનો આરોપ લગાવ્યો છે. અરુણ કુમાર મહંત, આમિર ખાન અને ટેકનિશિયન પપ્પુ કુમારની 7 જુલાઈએ ધરપકડ કરવામાં આવી હતી. તેના વિરુદ્ધ પુરાવાનો નાશ કરવાનો પણ આરોપ છે. આ ટ્રેન દુર્ઘટનામાં 290થી વધુ લોકોના મોત થયા હતા અને 1100થી વધુ લોકો ઘાયલ થયા હતા.
વિશેષ કોર્ટ સમક્ષ ચાર્જશીટ દાખલ કરી
આ અંગે માહિતી આપતા CBIના અધિકારીઓએ જણાવ્યું હતું કે ઓડિશાની રાજધાની ભુવનેશ્વરમાં વિશેષ કોર્ટમાં દાખલ કરવામાં આવેલી ચાર્જશીટમાં કલમ 304 પાર્ટ-2 (અંતર્ગત દોષિત હત્યા), કલમ 201 (પુરાવાનો નાશ કરવો), રેલ્વે અધિનિયમની કલમ 34 અને કલમ 153 હેઠળ આરોપીઓ સામે ગુનો નોંધ્યો છે.
મંજૂરી વગર રિપેરિંગ કામ કર્યું
આ પહેલા CBIએ 24 ઓગસ્ટે ભુવનેશ્વરની વિશેષ કોર્ટમાં પોતાનો રિપોર્ટ રજૂ કર્યો હતો. જેમાં તપાસ એજન્સીએ કહ્યું હતું કે, મંજૂરી વગર ટ્રેક પર રિપેરિંગના કામને કારણે આ સૌથી મોટી ટ્રેન દુર્ઘટના બની હતી. CBIએ એમ પણ કહ્યું હતું કે ત્યાં રિપેરિંગનું કામ સિનિયર ડિવિઝનલ સિગ્નલ અને ટેલિકોમ એન્જિનિયરની મંજૂરી વગર કરવામાં આવ્યું હતું. આ માટે સર્કિટ ડાયાગ્રામ પણ પસાર કરાયો ન હતો.
તપાસમાં સૌથી મોટો ખુલાસો થયો
ઉલ્લેખનીય છે કે CBIએ જુલાઈમાં કહ્યું હતું કે, આ ત્રણેયની બેદરકારીને કારણે આ સૌથી મોટી ટ્રેન દુર્ઘટના બની હતી. તપાસ એજન્સીએ એવો પણ દાવો કર્યો હતો કે ત્રણેય આરોપીઓ જાણતા હતા કે, તેમની બેદરકારીના કારણે મોટી દુર્ઘટના થઈ શકે છે. આ દુર્ઘટનાની તપાસ કરી રહેલા રેલ્વે સુરક્ષા કમિશનર (CRS)એ જુલાઈના શરૂઆતના સપ્તાહમાં દુર્ઘટના માટે સિગ્નલિંગ વિભાગના કર્મચારીઓની માનવીય ભૂલને જવાબદાર ગણાવી હતી.
કોરોમંડલ એક્સપ્રેસ લૂપ લાઇનમાં ગઈ
2 જૂનની સાંજે ચેન્નાઈ જતી કોરોમંડલ એક્સપ્રેસ મેઈન લાઈનના બદલે લૂપ લાઈનમાં ગઈ, જ્યાં માલગાડી ઊભી હતી. કોરોમંડલ એક્સપ્રેસ માલગાડી સાથે અથડાઈ હતી. અકસ્માતને કારણે કોરોમંડલ અને માલગાડીની કેટલીક બોગી બાજુના ટ્રેક પર વેરવિખેર થઈ ગઈ હતી. આના થોડા સમય બાદ હાવડા-બેંગલુરુ એક્સપ્રેસ પાટા પર વિખરાયેલા કોચ સાથે અથડાઈ હતી. સરકારી આંકડાઓ અનુસાર આ દુર્ઘટનામાં 290થી વધુ લોકોના મોત થયા હતા અને 1100થી વધુ લોકો ઘાયલ થયા હતા.
આ પણ વાંચો: Crime/ મસ્જિદમાં નમાજ અદા કરી રહેલા લોકો પર અંધાધૂંધ ગોળીબાર, 7ના મોત
આ પણ વાંચો: Hockey Asia Cup 2023/ ભારતીય હોકી ટીમે રચ્યો ઈતિહાસ, પાકિસ્તાનને હરાવી ભારત બન્યું ચેમ્પિયન
આ પણ વાંચો: G-20 Summit/ ભારત મંડપમમાં બેસશે આ મોટા વૈશ્વિક નેતાઓ, આતિથ્યની આવી ભવ્ય વ્યવસ્થા; દુનિયા યાદ રાખશે
