નવી દિલ્હી,
પંજાબ પોલીસ ઇન્ટેલિજન્સના ઈનપુટના આધારે પાકિસ્તાનની બોર્ડર પરથી પંજાબના ફિરોજપુરમાં ઘૂસેલા આતંકીઓનો ખુલાસો થયા બાદ રાજધાની દિલ્હીમાં હાઈએલર્ટ જાહેર કરવામાં આવ્યું હતું, ત્યારે આ વચ્ચે દિલ્હી પોલીસ દ્વારા બે શંકાસ્પદ આતંકીઓના સ્કેચ જાહેર કર્યા છે.
માનવામાં આવી રહ્યું છે કે, દિલ્હી પોલીસ દ્વારા જે બે આતંકીઓની તસ્વીર જાહેર કરી છે તેઓ રાજધાનીમાં ઘુસ્યા છે.
આ આતંકીઓના ઘુસવાને લઈ પોલીસ દ્વારા એક એડવાઇઝરી જાહેર કરવામાં આવી છે અને બંને આતંકીઓ અંગે કોઈ પણ પ્રકારની જાણકારી મળે તો તે અંગે પહાડગંજ પોલીસને જણાવવામાં માટે કહેવામાં આવ્યું છે.
આ બે આતંકીઓની જાણકારી આપવા માટે પોલીસ દ્વારા બે હેલ્પલાઇન નંબર ૦૧૧-૨૩૫૨૦૭૮૭ તેમજ ૦૧૧-૨૩૨૨૪૭૪ પણ જાહેર કર્યા છે.
દિલ્હી પોલીસ દ્વારા જાહેર કરવામાં આ તસ્વીરમાં આતંકીઓ એક પથ્થરનો ટેકો લઈને ઉભા છે અને જેના પાર ઉર્દુમાં લખ્યું છે કે, દિલ્હી ૩૬૦ કિલોમીટર અને ફિરોજપુર ૯ કિલોમીટર.
અત્રે ઉલ્લેખનીય છે કે, આ પહેલા પાકિસ્તાનની બોર્ડર પરથી પંજાબના ફિરોજપુરમાં જૈશ-એ-મોહમ્મદના ૭ આતંકી ઘુસ્યા હોવાનો ખુલાસો થયો હતો. ત્યારબાદ પંજાબ પોલીસ ઇન્ટેલિજન્સના ઈનપુટના આધારે ભારત-પાકિસ્તાન બોર્ડર પર એલર્ટ જાહેર કરવામાં આવ્યું હતું.
આ ઉપરાંત પંજાબના પઠાનકોટમાં માધોપુરથી ચાર શંકાસ્પદ દ્વારા એક કાર લુંટવામાં આવી હતી, ત્યારે હવે આ લૂંટને પણ આતંકીના ષડયંત્ર સાથે જોડવામાં આવી રહ્યું છે.
બીજી બાજુ આ ૭ આતંકીઓ રોડ માર્ગે દિલ્હી તરફ આગળ વધી રહ્યા છે, ત્યારે સુરક્ષા એજન્સીઓ દ્વારા ફિરોજપુરની તમામ બોર્ડર એરિયા સીલ કરવામાં આવ્યા હતા.
