વર્લ્ડ કપ 2023ની 32મી મેચમાં દક્ષિણ આફ્રિકાએ ન્યૂઝીલેન્ડને 190 રનથી હરાવ્યું છે. આ જીત સાથે દક્ષિણ આફ્રિકાની ટીમ પોઈન્ટ ટેબલમાં 12 પોઈન્ટ સાથે ટોપ પર પહોંચી ગઈ છે. પુણેના મહારાષ્ટ્ર ક્રિકેટ એસોસિએશન સ્ટેડિયમમાં બુધવારે રમાયેલી મેચમાં, દક્ષિણ આફ્રિકાએ ન્યુઝીલેન્ડ સામે પ્રથમ બેટિંગ કરતા ક્વિન્ટન ડી કોક અને રાસી ડુસેનની સદીની મદદથી 50 ઓવરમાં 4 વિકેટ ગુમાવીને 357 રન બનાવ્યા હતા. જવાબમાં ન્યૂઝીલેન્ડની ટીમ 35.3 ઓવરમાં તમામ વિકેટ ગુમાવીને 167 રન જ બનાવી શકી હતી. વર્લ્ડ કપ 2023માં ન્યૂઝીલેન્ડની આ સતત ત્રીજી હાર છે, આ પહેલા ન્યૂઝીલેન્ડને ભારત અને ઓસ્ટ્રેલિયાએ હરાવ્યું હતું.
358 રનના વિશાળ લક્ષ્યાંકનો પીછો કરવા ઉતરેલી ન્યુઝીલેન્ડની ટીમને ત્રીજી ઓવરમાં પહેલો ઝટકો લાગ્યો હતો. ઓપનર ડેવોન કોનવે 2 રન બનાવીને આઉટ થયો હતો. માર્કો જાનસેને રચિન રવિન્દ્રને આઉટ કરીને કીવી ટીમને મોટો ઝટકો આપ્યો હતો. રચિન 16 બોલમાં 9 રન બનાવીને આઉટ થયો હતો. આ પછી ન્યૂઝીલેન્ડની ટીમે વારંવાર અંતરાલ પર વિકેટ ગુમાવી હતી. વિલ યંગ 37 બોલમાં 33 રન બનાવીને પેવેલિયન પરત ફર્યો હતો. કેપ્ટન ટોમ લાથમ માત્ર 4 રન બનાવી શક્યો હતો. ડેરીલ મિશેલ 30 બોલમાં 24 રન બનાવીને આઉટ થયો હતો.
